Bangaluru: ఆమెకు వందనం. ఐదుగురి ప్రాణాలు కాపాడిన ఆ వనితకు వందనం. వారంతా ఆపదలో ఉన్నారని తెలిసి.. తాను మహిళనే విషయం మరిచి.. అందరిముందే కట్టుకున్న చీరను విప్పేసింది. వరదలో చిక్కుకుపోయి ప్రాణాలతో పోరాడుతున్న ఆ బాధితులకు ఆసరాగా అందించింది. ఆ మహిళ ఇచ్చిన చీరతోనే ఏకంగా ఐదుగురి ప్రాణాలు నిలిచాయి. వరద నీరు వారిని మింగేయకుండా.. ఆమె చీర వారధిగా నిలిచింది. అందుకే, ఆమెకు సెల్యూట్.
బెంగళూరులో భారీ వర్షాలు కురుస్తున్నాయి. నగరం వరద మయంగా మారింది. ఆదివారం అండర్‌ పాస్‌లో తన్నుకొచ్చిన నీటిలో మునిగి ఏపీకి చెందిన సాఫ్ట్‌వేర్ ఉద్యోగిని భానురేఖ మృతి చెందిన విషయం తెలిసిందే. ఆ ఘటనలోనే మరో ఐదుగురూ మృత్యువాత పడాల్సింది. కానీ, ఓ మహిళ చేసిన సాహసం వారిని కాపాడింది. భానురేఖను మాత్రం కాపాడలేకపోయింది. ఇంతకీ అసలేం జరిగిందంటే…
స్థానిక కేఆర్‌ కూడలిలోని అండర్‌ పాస్‌ దగ్గర ఏదో అలజడిని గుర్తించింది అటుగా వెళ్తున్న ఓ మహిళ(42). చూస్తే ఓ కారు వరద నీటిలో చిక్కుకుంది. అందులో ప్యాసింజర్లు ఉన్నారు. కొందరు వారిని రక్షించే ప్రయత్నం చేస్తున్నారు. అయితే, ఆ నీటిలోని వారిని బయటకు లాగాలంటే తాడు అవసరమైంది. చుట్టుపక్కల తాడు, కర్రలాంటి వేవీ లేవు. ఆ సమయంలో ఆ మహిళ డేరింగ్ డెసిషన్ తీసుకుంది. తాను కట్టుకున్న చీరను విప్పి.. బాధితులను రక్షించేందుకు సహకరించింది. ఆ చీరను ఓ ఇనుప చువ్వకు కట్టి.. మరోక చివరను బాధితులకు అందించారు. వారు ఆ చీర సహాయంతో ఒక్కొక్కరుగా ఒడ్డుకు రాగలిగారు. అంతలోనే రక్షణ బృందాలు అక్కడికి చేరుకొని.. వారిని రెస్క్యూ చేశారు. ఆ ఐదుగురు ఇప్పుడు ప్రాణాలతో ఉన్నారంటే.. అప్పుడు ఆ మహిళ అందించిన చీరే కారణం.
ఆమె చూపించిన తెగువకు అక్కడి వారంతా అవాక్కయ్యారు. అంతలోనే తేరుకొని ఆమెను అభినందించారు. అక్కడే ఉన్న మరో మహిళ తన చున్నీని ఆమెకు అందించింది. మరో వ్యక్తి తన చొక్కాను విప్పి ఆ మహిళకు ఇచ్చాడు. ఇలా అంతా ఆమె గౌరవాన్ని నిలిపారు. ఫోటో, వివరాలు లేకున్నా.. ఆ సాహస వనితను అభినందించకుండా ఉండలేం.