Korean Crime Thriller: సైకోలు అంటే ఎలా ఉంటారు ? ఇప్పటిదాకా మనం చూసిన సిరీస్, సినిమాలను బట్టి చూస్తే… వాళ్లకు మానసికంగా ఏదైనా జబ్బు ఉండడం వల్ల ఎదుటి వాళ్ళను చంపుతారు. లేదా పగతోనో, తమకు జీవితంలో ఎదురైన దారుణమైన పరిస్థితుల వల్ల సైకోలుగా మారతారు. అయితే అన్ని సినిమాలలోనూ సైకోలే విలన్లు. కానీ హీరో సైకో అయితే ఎలా ఉంటుంది ? అందులోనూ ఆ సైకో హీరోకి సూపర్ పవర్స్ ఉంటే ? వినడానికి క్రేజీగా ఉన్నా ఇలాంటి స్టోరీ లైన్ తో రూపొందిన సినిమానే ఈరోజు మన మూవీ సజెషన్. అదే కొరియన్ డార్క్ కామెడీ క్రైమ్ థ్రిల్లర్ సిరీస్ ‘ఎ కిల్లర్ పారడాక్స్’ (A Killer Paradox).
ఈ సిరీస్ ఒక అమాయకుడు అనుకోకుండా సీరియల్ కిల్లర్గా ఎలా మారాడు ? అతడిని పట్టుకోవడానికి ఒక తెలివైన డిటెక్టివ్ ఎలాంటి వేట సాగించాడు ? అనే ఆసక్తికరమైన పాయింట్ చుట్టూ తిరుగుతుంది. లీ టాంగ్ అనే కాలేజీ విద్యార్థి ఇందులో హీరో. అతను ఒక కన్వీనియన్స్ స్టోర్లో పార్ట్-టైమ్ జాబ్ చేస్తుంటాడు. ఒకరోజు రాత్రి పని ముగించుకుని ఇంటికి వెళ్తుండగా, ఒక కస్టమర్ తో గొడవ జరుగుతుంది. ఆవేశంలో అతనిపై దాడి చేసి అనుకోకుండా అతడిని చంపేస్తాడు. తను ఇలా మనిషిని ఎలా చంపేసాను అనే భయంతో వణికిపోతుంటాడు.
కానీ లీ టాంగ్ చంపిన వ్యక్తి సాధారణమైన వాడు కాదని, అతను గతంలో ఎన్నో ఘోరమైన నేరాలు చేసిన ఒక క్రూరమైన సీరియల్ కిల్లర్ అని తెలుస్తుంది. విచిత్రం ఏమిటంటే, లీ టాంగ్ చేసిన హత్యకు సంబంధించిన ఎలాంటి ఆధారాలు లభించవు. దీనితో లీ టాంగ్కు ఒక వింత అతీంద్రియ శక్తి ఉందని అర్థమవుతుంది. సమాజంలో తిరుగుతున్న దుర్మార్గులను, క్రూరమైన నేరస్థులను గుర్తించే సిక్స్త్ సెన్స్ అతనిలో మేల్కొంటుంది. ఈ శక్తులతో అతను సమాజంలోని చట్టం నుండి తప్పించుకు తిరుగుతున్న కిరాతకులను, రేపిస్టులను వెతికి మరీ చంపడం ప్రారంభిస్తాడు.
చట్టం శిక్షించలేని నేరస్థులను తనే శిక్షిస్తూ ‘గాడ్సెంట్ హీరో’గా మారుతాడు. అయితే అతను చేసే ప్రతి హత్య తాలూకూ ఆధారాలు ఏదో ఒక రూపంలో దానంతట అదే మాయమైపోతుంటాయి. ఈ వింత హత్యల వెనుక ఉన్న నిజాన్ని కనిపెట్టడానికి డిటెక్టివ్ జాంగ్ నాన్-గామ్ రంగంలోకి దిగుతాడు. నాన్-గామ్ చాలా మొండివాడు, తెలివిగలవాడు. లీ టాంగ్ వైపు ఆధారాలు ఏవీ చూపించకపోయినా, అతనిపైనే అనుమాన పడతాడు. ఈ వేటలో లీ టాంగ్ దొరికాడా ? ఒక హంతకుడిని పట్టుకునే క్రమంలో డిటెక్టివ్ ఎలాంటి నిజాలు తెలుసుకున్నాడు ? లీ టాంగ్ తన శక్తిని మంచి కోసం వాడుతున్నాడా లేదా ? అనేది తెలియాలంటే ఈ సిరీస్ ను చూడాల్సిందే. ఈ 8 ఎపిసోడ్ల సిరీస్ ప్రస్తుతం Netflixలో అందుబాటులో ఉంది. తెలుగు ఆడియో లేదు, కానీ ఇంగ్లీష్ సబ్టైటిల్స్తో చూడవచ్చు.
Read Also: కారు ప్రమాదం… కళ్ళు తెరిచి చూస్తే మరో ప్రపంచంలో… మైండ్ బెండింగ్ సై-ఫై సిరీస్
Share
Intinti Ramayanam Today Episode: పల్లవిని అవమానించిన శ్రీయ.. అవని పై సీరియస్.. బిడ్డ రాకతో ఫుల్ హ్యాపీ..
మబ్బు పట్టింది.. వాన పడింది! రెండు రాష్ట్రాల్లో వాతావరణం కూల్.. కానీ ఆ ఇబ్బందులు తప్పట్లేదుగా!
