Crime Thriller: చుట్టూ మనుషుల జాడే కనిపించని ఎడారి. సహాయం కోసం పిలిచినా ఎవ్వరూ స్పందించే పరిస్థితి లేదు. అలాంటి చోట ఓ చిన్న విమానం కూలిపోతే… దాన్ని చూసి సహాయం చేయడానికి వెళ్లిన యువతినే పైలట్ తుపాకీతో బెదిరించి తన వెంట తీసుకెళ్తే ? పైగా ఆ విమానంలో ఉన్నది సాధారణ సరుకు కాదు… డ్రగ్స్ అని తెలిస్తే ? అప్పటికే ఆ డ్రగ్స్ కోసం ఓ క్రూరమైన క్రిమినల్ ముఠా వాళ్ల వెంటపడుతుంటే పరిస్థితి ఎలా మారుతుంది ? ఇలాంటి ఉత్కంఠభరితమైన సర్వైవల్ క్రైమ్ థ్రిల్లర్నే ‘బొర్రెగో’ (Borrego). మరి ఈ క్రైమ్ థ్రిల్లర్ మూవీ తెలుగులో ఎక్కడ అందుబాటులో ఉందంటే ?
కాలిఫోర్నియాలోని ఓ మారుమూల ఎడారి ప్రాంతానికి ఎల్లి అనే యువ వృక్షశాస్త్రజ్ఞురాలు వస్తుంది. ఓ ప్రత్యేకమైన మొక్కల జాతిపై పరిశోధన చేయడానికి ఆమె అక్కడ ఒంటరిగా గడుపుతుంటుంది. వ్యక్తిగత జీవితంలో ఎదురైన విషాదం నుంచి బయటపడేందుకు కూడా ఈ ఏకాంతాన్ని ఎంచుకుంటుంది. ఓ సాయంత్రం ఎడారిలో ఉన్న సమయంలో ఆమె కళ్ల ముందే ఓ చిన్న అల్ట్రాలైట్ విమానం కూలిపోతుంది. అందులో ఉన్న వ్యక్తికి సహాయం చేయాలని ఎల్లి దగ్గరకు వెళ్తుంది. కానీ అక్కడ ఆమెకు ఎదురయ్యేది ఊహించని ప్రమాదం. విమానం నడిపిన టోమస్ డ్రగ్స్ స్మగ్లింగ్ చేసే వ్యక్తి.
ప్రమాదం తర్వాత తన పని పూర్తిచేయాల్సిన ఆతురతలో ఉన్న అతను… ఎల్లిని తుపాకీతో బెదిరించి తనకు దారి చూపించాలని బలవంతం చేస్తాడు. ఎడారిలో సరైన నీరు, ఆహారం, రక్షణ లేకుండా టోమస్ తో కలిసి ప్రయాణించాల్సిన పరిస్థితి ఎల్లికి ఎదురవుతుంది. మొదట అతన్ని ప్రమాదకరమైన వ్యక్తిగానే చూసిన ఆమెకు, క్రమంగా అతని పరిస్థితి గురించి కొన్ని విషయాలు తెలుస్తాయి. టోమస్ వెనుక ఉన్న పరిస్థితులు, అతన్ని డ్రగ్స్ దందాలోకి నెట్టిన కారణాలు బయట పడుతుండటంతో వారి మధ్య సంబంధం కూడా మారుతూ ఉంటుంది. కానీ అసలు ముప్పు ముందు ఉంటుంది. విమానంలో ఉన్న ఫెంటానిల్ గమ్యస్థానానికి చేరకపోవడంతో గిల్లెర్మో అనే క్రూరమైన డ్రగ్ కార్టెల్ వ్యక్తి రంగంలోకి దిగుతాడు. డ్రగ్స్తో పాటు తనకు సంబంధించిన ఆధారాలు కూడా మాయం చేయాలని చూస్తున్న అతను ఎల్లి, టోమస్ల కోసం ఎడారిని జల్లెడ పడతాడు.
ఇదిలా ఉండగా ఎల్లి కనిపించకుండా పోవడంతో డిప్యూటీ షెరీఫ్ జోస్ గోమెజ్, అతని కుమార్తె అలెక్స్ ఆమె కోసం వెతకడం మొదలు పెడతారు. ఒకవైపు కార్టెల్ వేట… మరోవైపు మండుతున్న ఎడారి… ఇంకోవైపు నమ్మలేని వ్యక్తితో కలిసి ప్రయాణం. ఈ పరిస్థితుల నుంచి ఎల్లి ఎలా బయట పడుతుంది ? టోమస్ నిజంగా ఆమెకు అండగా నిలుస్తాడా ? గిల్లెర్మో వాళ్లను చేరుకునేలోపే పోలీసులు ఎల్లిని కనుగొంటారా ? అసలు ఆ ఎడారిలో మొదలైన ఈ డ్రగ్స్ వ్యవహారం ఎక్కడికి దారి తీస్తుంది ? ఈ ప్రశ్నలకు సమాధానం తెలుసుకోవాలంటే సినిమా చూడాల్సిందే.
‘బొర్రెగో’ జియోహాట్స్టార్ (JioHotstar)లో ఇంగ్లీష్, హిందీతో పాటు తెలుగు ఆడియోలోనూ అందుబాటులో ఉంది. యూట్యూబ్లోకూడా తెలుగు వెర్షన్ లభిస్తుంది. లూసీ హేల్ ప్రధాన పాత్రలో నటించిన ఈ సినిమా యాక్షన్ హంగామాలా కాకుండా… ఎడారి వాతావరణం, సర్వైవల్ టెన్షన్, క్రైమ్ థ్రిల్… వంటి అంశాలతో సింపుల్గా సాగుతూ చివరి వరకు ఆసక్తికరంగా ఉటుంది. సర్వైవల్ థ్రిల్లర్స్ ఇష్టపడేవాళ్లు ఒకసారి ట్రై చేయొచ్చు.
Read Also: తేనె కోసం కొట్టుకుచచ్చే బిజినెస్ మ్యాన్లు… ఇలాంటి గ్యాంగ్స్టర్ డ్రామాను ఎక్కడా చూసుండరు
Share
అక్రమ భవనాలు కూలడానికి అసలు కారణం ఇదే.. హైడ్రా కమిషనర్ క్లారిటీ!
సెన్సార్ బోర్డు పునర్వ్యవస్థీకరణ.. CBFCలో చోటు దక్కించుకున్న సుప్రియ యార్లగడ్డ
