Kannada Family Drama : మనసుకు హత్తుకునే ఓ మంచి సినిమా కోసం ఓటీటీలో వెతుకుతున్నారా ? అయితే ఈ మూవీ మీ కోసమే. పైగా దీన్ని కుటుంబం అంతా కలిసి చూడవచ్చు. ఆ మూవీనే ‘వలవర’ (Valavaara). 2026 జనవరిలో విడుదలైన హార్ట్ టచింగ్ కన్నడ రూరల్ కమింగ్-ఆఫ్-ఏజ్ ఫ్యామిలీ డ్రామా. సుతాన్ గౌడ దర్శకత్వం వహించిన ఈ సినిమా, గ్రామీణ నేపథ్యంలో పిల్లల మనస్తత్వాలు, పక్షపాతాలు, కుటుంబ బాధ్యతల చుట్టూ తిరుగుతుంది. మరి ఈ మూవీ స్టోరీ ఏంటి ? ఎక్కడ చూడవచ్చు ? అనే వివరాల్లోకి వెళ్తే…
ఒక పేద కుటుంబానికి చెందిన పెద్ద కొడుకు, అమాయకపు కుర్రాడు కుందేశి (మాస్టర్ వేద కౌశల్). వ్యవసాయ చేసుకుంటూ బతుకుతుంది ఈ ఫ్యామిలీ. కుందేశి తమ్ముడు కోసుడి (మాస్టర్ శయన్). తండ్రి మూర్తికి పెద్ద కొడుకు కంటే చిన్న కొడుకే ఇష్టం. చిన్న కొడుకుపైనే ఇష్టంతో ఎప్పుడూ పెద్ద కొడుకుపై కోప్పడుతూ పక్షపాతం చూపే కఠినమైన వ్యక్తి. కుందేశిని ఎంతగానో ప్రేమిస్తుంది తల్లి (హర్షిత గౌడ). కర్ణాటకలోని సకలేష్పూర్ అనే అందమైన పల్లెటూరి నేపథ్యంలో ఈ కథ సాగుతుంది.
ఇంట్లో ఇద్దరు అన్నదమ్ములు ఉన్నప్పటికీ, తండ్రి ఎప్పుడూ చిన్న కొడుకు కోసుడిపైనే ఎక్కువ ప్రేమ చూపిస్తూ, పెద్ద కొడుకు కుందేశిని నిర్లక్ష్యం చేస్తుంటాడు. తండ్రి ప్రవర్తన వల్ల కుందేశి మనసులో తీవ్రమైన అభద్రతాభావం, భయం ఏర్పడతాయి. అతనికి అమ్మే సర్వస్వం. ఒకరోజు తండ్రి ఇంట్లో లేని సమయంలో, ఈ అన్నదమ్ములు ఇద్దరూ తమ కుటుంబానికి ఎంతో ముఖ్యమైన, గర్భంతో ఉన్న ఒక ఆవును మేత కోసం బయటకు తీసుకెళ్తారు. అయితే ఆ ఆవు అకస్మాత్తుగా పక్కనే ఉన్న ఒక రైతు పొలంలోకి వెళ్లి పంటను పాడు చేసి, ఎక్కడికో తప్పిపోతుంది.
ఆవు కనిపించకుండా పోవడంతో కుందేశి తీవ్రమైన ఆందోళనకు గురవుతాడు. తండ్రి తిరిగి వచ్చేలోపు ఎలాగైనా ఆవును వెతికి పట్టుకోవాలని, లేదంటే తండ్రి చేతిలో తీవ్రమైన దెబ్బలు తప్పవని భయపడతాడు. అలా ఆ తప్పిపోయిన ఆవు కోసం ఆ ఇద్దరు చిన్న పిల్లలు అడవులు, కొండలు దాటుకుంటూ చేసే ఒకే ఒక్క రోజు ప్రయాణమే ఈ సినిమా. మరి ఆ ఆవును తిరిగి తీసుకురావడానికి ఆ పిల్లాడు ఏం చేశాడు ? ఎక్కడెక్కడ తిరిగాడు ? ఈ క్రమంలో వాడికి ఎదురైన సమస్యలు ఏంటి ? అన్నది సినిమా. క్లైమాక్స్ ఎమోషనల్ ఉంటుంది.
ఈ హార్ట్ టచింగ్, ఎమోషనల్ ఫ్యామిలీ డ్రామా చిత్రం కన్నడ, తెలుగు, తమిళం, హిందీ భాషలలో స్ట్రీమింగ్ అవుతోంది. దీన్ని ప్రముఖ ఓటీటీ ప్లాట్ఫామ్ అయిన ZEE5లో వీక్షించవచ్చు.
Read Also : 816 కోట్ల క్లాసిక్ సూపర్ హిట్ వార్ యాక్షన్ థ్రిల్లర్ డ్రామా… ఏ ఓటీటీలో ఉందంటే ?
Share
ఎలాంటి వ్యక్తిని పెళ్లి చేసుకోవాలి? మంచి జీవిత భాగస్వామిలో ఈ లక్షణాలు తప్పనిసరిగా చూడాలి
బుల్లితెర ‘కిలాడీ లేడీ’.. సోషల్ మీడియా ట్రాప్తో యువకులకు టోకరా వేసిన ప్రముఖ నటి అరెస్ట్!
