Parivarik ManuRanjan OTT: పెళ్లి చేసుకోవడానికి వయసుతో సంబంధం లేదని చెప్పే కథలు చాలానే వచ్చాయి. నలభై ఏళ్ల వయసులోనూ బ్యాచిలర్‌గా ఉంటూ, తన జీవితంలోకి అనుకోకుండా వచ్చిన ఓ యువతితో ప్రేమలో పడితే పరిస్థితులు ఎలా మారతాయో సరదాగా చూపిస్తోంది ‘Parivarik ManuRanjan’ సినిమా. బాలీవుడ్ విలక్షణ నటుడు పంకజ్ త్రిపాఠి, అందాల తార అదితి రావు హైదరి జంటగా నటించిన అవుట్ అండ్ అవుట్ ఫ్యామిలీ కామెడీ ఎంటర్‌టైనర్ కి వరుణ్ వి. శర్మ దర్శకత్వం వహించారు. ఈ చిత్రం థియేటర్లకు వెళ్ళకుండా నేరుగా ఓటీటీలో స్ట్రీమింగ్ అవుతోంది. లక్నో నేపథ్యంలో సాగే ఈ కథలో రొమాన్స్‌తో పాటు కుటుంబ బంధాలు, పొరుగువారి గాసిప్స్, చిన్నపాటి సస్పెన్స్ కూడా ఉంటాయి. ఈ సినిమాను ఎందుకు చూడాలి? కథ ఏమిటి ? ఏ ఓటీటీలో ఉంది ? అనే వివరాలను తెలుసుకుందాం పదండి.
ఈ కథ లక్నోకు చెందిన 40 ఏళ్ల బ్రహ్మచారి రంజన్ దూబే (పంకజ్ త్రిపాఠి) చుట్టూ తిరుగుతుంది. ప్రభుత్వ ఉద్యోగి అయిన రంజన్, తన ముగ్గురు చెల్లెళ్ల పెళ్లిళ్లు చేసే బాధ్యతలో పడి తన పెళ్లిని వాయిదా వేసుకుంటూ ఒంటరిగా మిగిలిపోతాడు. తండ్రి వదిలివెళ్లిన పెద్ద పురాతన భవనంలో నివసించే రంజన్, ఇంటి పనులు చూసుకోవడం కష్టమవడంతో ఒక హౌస్ కీపర్ కోసం పేపర్‌లో ప్రకటన ఇస్తాడు. ఆ ప్రకటన చూసి హెలెన్ (అదితి రావ్ హైదరీ) ఆ ఇంటికి ప్రాపర్టీ మేనేజర్‌గా వస్తుంది. హెలెన్ రాకతో పాడుబడినట్లు ఉన్న ఆ భవనం కళకళలాడటమే కాకుండా, రంజన్ నిస్సారమైన జీవితంలోకి కొత్త వెలుగు వస్తుంది. పెళ్లికాని ఆడ, మగ ఒకే ఇంట్లో కలిసి ఉండటంపై ఇరుగుపొరుగు వారు రకరకాలుగా మాట్లాడుకుంటున్నప్పటికీ, వారిద్దరి మధ్య మంచి స్నేహం ఏర్పడుతుంది. రోజులు గడిచేకొద్దీ ఒకరినొకరు అర్థం చేసుకుంటూ, ఆ స్నేహం నెమ్మదిగా ప్రేమగా మారుతుంది.
అయితే కథ సాఫీగా సాగుతున్న సమయంలో హెలెన్ అసలు పేరు మను జోషి అని, ఆమె గతానికి సంబంధించి ఒక పెద్ద రహస్యం ఉందని బయటపడుతుంది. ఈ నిజం తెలియడంతో రంజన్ కుటుంబంలో మరియు కాలనీలో ఒక్కసారిగా కలకలం రేగుతుంది. అసలు మను ఆ ఇంటికి ఎందుకు వచ్చింది, ఆమె గతం ఏమిటి, ఆ పరిస్థితులన్నింటినీ దాటుకుని రంజన్, మను ఒక్కటయ్యారా లేదా అనేదే మిగిలిన కథ. పెద్దగా ఉత్కంఠభరితమైన మలుపుల కోసం కాకుండా, తేలికపాటి హాస్యం, రొమాన్స్‌తో కూడిన కుటుంబ కథను చూడాలనుకునేవారికి ఇది ఒకసారి ప్రయత్నించదగ్గ సినిమా.
ఈ సినిమాలో రంజన్ దూబేగా పంకజ్ త్రిపాఠి, హెలెన్‌గా అదితి రావు హైదరి నటించారు. వీరితో పాటు బ్రిజేంద్ర కాలా, ముకేశ్ తివారీ, సునీతా రాజ్వర్, విజయంత్ కోహ్లీ తదితరులు కీలక పాత్రల్లో కనిపిస్తారు. వరుణ్ వి. శర్మ దర్శకత్వం వహించిన ఈ చిత్రానికి బ్రిజేంద్ర కాలా, అలీ అబ్బాస్ జాఫర్, వరుణ్ వి. శర్మ కథ, స్క్రీన్‌ప్లే అందించారు. ఈ సినిమా 2026 నవంబర్ 13 నుంచి SonyLIVలో నేరుగా స్ట్రీమింగ్ అవుతోంది. హిందీ భాషలో అందుబాటులో ఉన్న ఈ సినిమా నిడివి 1 గంట 54 నిమిషాలు.
Share
డబ్బు మనది.. పర్మిషన్ నెటిజన్లది, వైరల్‌ చైనా యాప్ కథేంటి?
మెక్సికో ప్రపంచ ఫుట్‌బాల్ పోటీలకు.. హుస్నాబాద్ ఆడబిడ్డ ఎంపిక!
