Bandra OTT: సినిమా ఇండస్ట్రీ బయటకు ఎంతో గ్లామరస్‌గా కనిపించినా, తెర వెనుక జరిగే వ్యవహారాలు మాత్రం ఒక్కోసారి ఊహించని మలుపులు తిరుగుతుంటాయి. అలాంటి ఒక ఇంట్రెస్టింగ్ సినిమా ఇప్పుడు ప్రేక్షకుల ముందుకు వచ్చేసింది. 1990ల నాటి బాలీవుడ్ గ్లామర్ ప్రపంచం, అండర్‌వరల్డ్ మాఫియా సంబంధాలు, ఓ స్టార్ హీరోయిన్ అనుమానాస్పద మరణం చుట్టూ తిరిగే కథతో తెరకెక్కిన ఈ మలయాళ యాక్షన్ డ్రామా ‘బాంద్రా’ (Bandra). మలయాళ స్టార్ హీరో దిలీప్, తమన్నా భాటియా జంటగా నటించిన ఈ చిత్రానికి అరుణ్ గోపీ దర్శకత్వం వహించారు. నవంబర్ 13 నుంచి ఈ మూవీ ఓటీటీలో స్ట్రీమింగ్ అవుతోంది. మరి ఈ సినిమా కథేంటి? ఏ ఓటీటీలో ఉంది ? ఇందులో దాగి ఉన్న మిస్టరీ ఏమిటో తెలుసుకుందాం పదండి.
మొదటి సినిమా అవకాశం కోసం ఎదురుచూస్తున్న సాక్షి (మమతా మోహన్‌దాస్) అనే ఒక యంగ్ డైరెక్టర్, మంచి కథ కోసం వెతుకుతూ ఉంటుంది. అప్పుడు 1990లలో బాలీవుడ్‌లో స్టార్ హీరోయిన్‌గా వెలిగిన తారా జానకి (తమన్నా భాటియా) అనుమానాస్పద సూసైడ్ కేసు ఆమెకు ఆసక్తికరంగా అనిపిస్తుంది. ఆ కేసు వెనుక ఉన్న అసలు నిజాన్ని బయటపెట్టి, దాన్నే తన సినిమా కథగా తీయాలని సాక్షి ఫిక్స్ అవుతుంది. దానికోసం అప్పట్లో తారాకు దగ్గరగా ఉన్న మిర్చి (కళాభవన్ షాజోన్) అనే వ్యక్తిని కలుస్తుంది. మిర్చి ద్వారా సాక్షికి తారా గతం గురించి, ముంబైలోని బాంద్రా ఏరియాలో పెద్ద గ్యాంగ్‌స్టర్ అయిన *అలన్ అలెగ్జాండర్ డొమినిక్ అలియాస్ ఆలా (దిలీప్)*తో ఆమెకున్న లవ్ స్టోరీ గురించి తెలుస్తుంది.
ఫ్లాష్‌బ్యాక్‌లోకి వెళ్తే.. సినిమా ఇండస్ట్రీలో రాఘవేంద్ర దేశాయ్ (డినో మోరియా) అనే ఒక క్రూరమైన ప్రొడ్యూసర్ కమ్ డాన్ చేతిలో తారా చాలా ఇబ్బందులు పడుతూ ఉంటుంది. ఒక షూటింగ్ కోసం కేరళకు వచ్చినప్పుడు, వాళ్ల టార్చర్ భరించలేక తారా అక్కడే ఉన్న ఆలా ఇంట్లో తలదాచుకుంటుంది. అప్పటికే తారా అంటే ఎంతో ఇష్టపడే ఆలా, ఆమెకు అండగా నిలబడతాడు. అంతేకాకుండా, తారా సొంతంగా సినిమా తీసుకోవడానికి డబ్బు అవసరం పడితే, దానికోసం అండర్‌వరల్డ్‌లో పెద్ద పెద్ద రిస్కులు చేస్తూ ఆమెకు సపోర్ట్‌గా ఉంటాడు. ఈ క్రమంలో వాళ్లిద్దరూ ఒకరినొకరు గాఢంగా ప్రేమించుకుంటారు.
కానీ తారాను వదులుకోవడానికి ఇష్టపడని విలన్ రాఘవేంద్ర దేశాయ్ ఒకవైపు, ఆలా గ్యాంగ్‌స్టర్ సామ్రాజ్యాన్ని లేపేయాలని చూసే పోలీస్ ఆఫీసర్ వీరరాఘవన్ (శరత్ కుమార్) మరోవైపు వీళ్లకు పెద్ద తలనొప్పిగా మారుతారు. అండర్‌వరల్డ్ శత్రువులు, పోలీసుల మధ్య చిక్కుకున్న ఆలా, తన ప్రేయసి తారాను ఎలా కాపాడుకున్నాడు అనేది మిగతా కథ. చివరికి తారా ఆత్మహత్య వెనుక ఉన్న అసలు సీక్రెట్ ఏంటి, ఆలా జీవితం ఏమైంది ? అనే ట్విస్టులతో సినిమా ముగుస్తుంది.
ఈ సినిమాలో దిలీప్ అలన్ అలెగ్జాండర్ డొమినిక్ అలియాస్ ఆలా పాత్రలో నటించగా, తమన్నా భాటియా తారా జానకిగా కనిపించారు. మలయాళంలో తమన్నాకు ఇదే తొలి సినిమా. మమతా మోహన్‌దాస్ సాక్షి పాత్రలో, డినో మోరియా రాఘవేంద్ర దేశాయ్‌గా, కళాభవన్ షాజోన్ మిర్చిగా, ఆర్. శరత్‌కుమార్ వీరరాఘవన్ ఐపీఎస్‌గా నటించారు. అరుణ్ గోపీ దర్శకత్వం వహించిన ఈ చిత్రానికి ఉదయకృష్ణ కథ, స్క్రీన్‌ప్లే అందించారు. వినాయక అజిత్ నిర్మించగా, సామ్ సీఎస్ సంగీతం సమకూర్చారు. 2023 నవంబర్ 10న థియేటర్లలో విడుదలైన ఈ సినిమా, దాదాపు మూడేళ్ల తర్వాత 2026 నవంబర్ 13 నుంచి ZEE5లో స్ట్రీమింగ్ అవుతోంది. ప్రస్తుతం మలయాళం ఒరిజినల్ ఆడియోలో అందుబాటులో ఉంది.
Read Also: మనవళ్ల కోసం మళ్లీ ఆయుధం పట్టిన తాత… విలన్లకు దబిడి దిబిడే… అదిరిపోయే యాక్షన్ థ్రిల్లర్
Share
ఆటో డ్రైవర్లకు సర్కారు బంపర్ ఆఫర్.. రూ.220 కోట్లతో 2,000 ఫ్లాట్లు.. ఎక్కడెక్కడ కడుతున్నారంటే?
ఏపీకి మరో భారీ తుఫాన్ ముప్పు.. 'అక్వాన్' తుఫాన్ అనే పేరుతో నామకరణం!
