Premalu OTT Update: ఒక సినిమా సూపర్ హిట్ అయితే థియేటర్లలోనే కాదు, ఓటీటీలోకి వచ్చిన తర్వాత కూడా ప్రేక్షకులు మళ్లీ మళ్లీ చూస్తుంటారు. కానీ అదే సినిమాను మరో భాషలో రీమేక్ చేస్తున్న సమయంలో… ఒరిజినల్ సినిమానే ఓటీటీ నుంచి అకస్మాత్తుగా మాయమైతే ? ఇప్పుడు మలయాళ సూపర్ హిట్ ‘ప్రేమలు’ (Premalu) విషయంలో ఇదే జరుగుతోంది. హిందీలో ఈ సినిమాను ‘ప్రేమ్ కీటాను’ (Prem Keetanu) పేరుతో రీమేక్ చేస్తున్న నేపథ్యంలో… జియోహాట్‌స్టార్‌లో ఉన్న మలయాళంతో పాటు హిందీ, తమిళ వెర్షన్లు కనిపించకుండా పోయాయి. దీంతో అసలు ఈ సినిమాను ఎందుకు తొలగించారు ? రీమేక్‌కు దీనికి సంబంధం ఉందా ? మరి తెలుగు వెర్షన్ పరిస్థితి ఏంటి ? అనే టాక్ మొదలైంది నెట్టింట్లో.
నస్లెన్, మమితా బైజు జంటగా నటించిన ‘ప్రేమలు’ చిన్న సినిమాగా వచ్చి భారీ విజయాన్ని అందుకున్న యూత్‌ఫుల్ రొమాంటిక్ ఎంటర్టైనర్. క్యూట్ లవ్ స్టోరీ, కామెడీ, ఫ్రెండ్‌షిప్, సహజమైన పాత్రలతో యూత్‌ను ఈ సినిమా బాగా ఆకట్టుకుంది. ముఖ్యంగా తెలుగు వెర్షన్‌కు కూడా ఊహించని స్థాయిలో మంచి స్పందన వచ్చింది. థియేటర్లలోనే కాదు, ఓటీటీలోకి వచ్చిన తర్వాత ఇతర భాషల ప్రేక్షకులు కూడా ఈ సినిమాను విపరీతంగా చూశారు. ఇలాంటి సమయంలో ‘ప్రేమలు’ను బాలీవుడ్‌లో ‘ప్రేమ్ కీటాను’ పేరుతో రీమేక్ చేస్తున్నారు. వీర్ పహారియా, అపర్‌శక్తి ఖురానా ప్రధాన పాత్రల్లో నటిస్తున్న ఈ సినిమాను అక్టోబర్ 2న విడుదల చేయడానికి ప్లాన్ చేశారు.
ఆగస్టు 17న హిందీ రీమేక్ ట్రైలర్ విడుదలైన కొద్దిసేపటికే జియోహాట్‌స్టార్‌లో మరో ట్విస్ట్ కనిపించింది. అందులో ఉన్న ‘ప్రేమలు’ ఒరిజినల్ మలయాళ వెర్షన్‌తో పాటు హిందీ, తమిళ డబ్బింగ్ వెర్షన్లు కూడా అందుబాటులో లేకుండా పోయాయి. దీంతో సోషల్ మీడియాలో అసలు హాట్ స్టార్ ఇలా చేయడానికి గల కారణం ఏంటి ? అనే చర్చ మొదలైంది. రీమేక్ విడుదలకు ముందు ప్రేక్షకులు ఒరిజినల్ కథను చూడకుండా ఉండేందుకు ఈ నిర్ణయం తీసుకున్నారా ? లేక కొత్త సినిమాపై ఆసక్తి పెంచడంలో భాగంగానే ఒరిజినల్ వెర్షన్లను తాత్కాలికంగా తొలగించారా ? అనే ప్రశ్నలు వినిపిస్తున్నాయి.
ఇదిలా ఉంటే తెలుగు ప్రేక్షకులకు మాత్రం ఓ గుడ్ న్యూస్ ఉంది. జియోహాట్‌స్టార్‌లో మిగతా వెర్షన్లు కనిపించకపోయినా తెలుగు వెర్షన్ మాత్రం ఆహాలో అందుబాటులోనే ఉంది. తెలుగు రాష్ట్రాల్లో సినిమాను గీతా ఆర్ట్స్ విడుదల చేయగా, డిజిటల్ హక్కులు ఆహా వద్ద ఉండటంతో జియోహాట్‌స్టార్‌లో జరిగిన మార్పు తెలుగు వెర్షన్‌పై ప్రభావం చూపలేదని తెలుస్తోంది.
హిందీ రీమేక్ థియేటర్లలోకి వచ్చే వరకు ఈ పరిస్థితి కొనసాగుతుందా? ఒరిజినల్ వెర్షన్లు మళ్లీ జియోహాట్‌స్టార్‌లోకి వస్తాయా? అనేది ఇప్పుడు ఆసక్తికరంగా మారింది. మొత్తానికి రీమేక్ కారణంగా ఒరిజినల్ వెర్షన్లు ఓటీటీ నుంచి మాయమవడం.. తెలుగు వెర్షన్ మాత్రం సేఫ్‌గా ఉండటం ‘ప్రేమలు’ విషయంలో కొత్త చర్చకు తెరలేపింది.
Read Also: తల్లిదండ్రుల ప్రేమకథ వెనుక ఎయిడ్స్ విషాదం… ఈ అమ్మాయి తెలుసుకున్న నిజం కదిలిస్తుంది మావా
Share
మెడికల్ ఆఫీసరే డ్యూటీకి రాకపోతే ఎలా.. యూపీహెచ్‌సీలో బయటపడ్డ నిర్లక్ష్యం!
విజయ్ పక్కన త్రిష.. విమర్శలకు సంజనా గల్రాని దిమ్మతిరిగే ఆన్సర్!
