మతిమరుపు మొగుడితో కిలాడీ పెళ్లాం… మామూలుగా లేదు ఈ రచ్చ

Romantic Comedy OTT :ఆడియన్స్ కి కంటెంట్ నచ్చితే చాలు, ఎలాంటి జానర్ అయినా హిట్ అయిపోతుంది. ఇక ఎక్కువగా ప్రేక్షకులు థ్రిల్లర్, కామెడీ కంటెంట్ నే ఇష్టంగా చూస్తుంటారు. ఈ నేపథ్యంలో ఒక రొమాంటిక్ కామెడీ సినిమా గురించి చెప్పుకోవాల్సిందే. ఈ సినిమాలో ఒక ప్రమాదంలో జ్ఞాపకశక్తిని కోల్పోయిన వ్యక్తిని ఒక మహిళ మోసం చేసి భార్యగా నటిస్తుంది. ఈ క్రమంలో వచ్చే సన్నివేశాలు కడుపుబ్బా నవ్విస్తాయి కూడా. ఈ సినిమా అటు ఓటీటీలో, ఇటు థియేటర్లలో సూపర్ హిట్ కూడా అయింది. దీని పేరు ఏమిటి ? ఏ ఓటీటీలో ఉంది ? అనే వివరాల్లోకి వెళ్తే…

ప్రైమ్ వీడియోలో స్ట్రీమింగ్

2014లో వచ్చిన ఈ ఫిలిప్పీన్ రొమాంటిక్ కామెడీ సినిమా పేరు ‘మై ఇల్లీగల్ వైఫ్’ (My Illegal Wife). టోనీ వై. రేయిస్ దర్శకత్వంలో తెరకెక్కిన ఈ సినిమాలో పోక్వాంగ్, జాంజో మరుడో లీడ్ రోల్స్ లో నటించారు. ఈ జంట కలిసి నటించిన రెండో సినిమా ఇది. దీనికంటే ముందు 2010లో ‘సింకో’ (Cinco) అనే హారర్ సినిమాలో వీళ్ళు కలిసి నటించారు. ఈ చిత్రం 2014 జూన్ 11న ఫిలిప్పీన్స్‌ థియేటర్లలో విడుదలై బాక్సాఫీస్ వద్ద మంచి విజయాన్ని అందుకుంది. ఈ సినిమా 109 నిమిషా రన్‌ టైమ్ తో ప్రైమ్ వీడియోలో అందుబాటులో ఉంది.

స్టోరీ ఏమిటంటే

క్లారీస్ అనే ఒక ఒంటరి మహిళ తన పిల్లల కోసం ఒక తండ్రి కావాలని, తనకో తోడు ఉండాలని కలలు కంటుంటుంది. ఒక విమాన ప్రయాణంలో ఆమెకు హెన్రీ అనే వ్యక్తి పరిచయమవుతాడు. మొదట అతను ఆమెను తిరస్కరిస్తాడు. అదే సమయంలో అనుకోకుండా జరిగిన విమాన ప్రమాదం వల్ల హెన్రీ తన పాత జ్ఞాపకాలను పూర్తిగా మర్చిపోతాడు. దీన్ని అవకాశంగా తీసుకున్న క్లారీస్, తామిద్దరం జపాన్‌లో పెళ్లి చేసుకున్నామని, తనే అతడి భార్యనని అబద్ధం చెప్పి నమ్మిస్తుంది. పాపం ఏమీ గుర్తులేని హెన్రీ ఆమెను నిజంగానే తన భార్య అనుకుని ఆమె ఇంటికి వెళ్తాడు.

అక్కడ క్లారీస్ తన పిల్లలకు, కుటుంబానికి హెన్రీని భర్తగా పరిచయం చేసి ఒక దొంగ సంసారాన్ని మొదలుపెడుతుంది. కానీ క్లారిస్ కి లోపల ఒకటే భయం, ఎక్కడ వీడికి పాత విషయాలు గుర్తొస్తాయో అని! అతను స్నానం చేస్తున్నా, పడుకున్నా గతం గుర్తు రాకుండా చేయడానికి ఈమె చేసే కామెడీ మాములుగా ఉండదు. మధ్యలో వీళ్ళిద్దరి మధ్య కొంచెం రొమాన్స్ కూడా నడుస్తుంది. అయితే హెన్రీకి గతంలోనే ఎలెన్ అనే ప్రేయసి ఉంటుంది. కొన్నాళ్ల తర్వాత హెన్రీకి మెల్లమెల్లగా తన పాత జ్ఞాపకాలు తిరిగి రావడం, అసలు విషయం బయటపడటంతో కథలో పెద్ద ట్విస్ట్ వస్తుంది. చివరికి తనను మోసం చేసిన క్లారీస్‌ను హెన్రీ క్షమించాడా? చివరకు వీరిద్దరూ నిజంగానే ఒక్కటయ్యారా? హెన్రీ పాత ప్రేమికురాలి సంగతి ఏంటి ? అన్నదే ఈ సినిమా ముగింపు.