AP Local Elections: రాష్ట్రవ్యాప్తంగా జరిగిన స్థానిక సంస్థల ఎన్నికల్లో అధికార కూటమి అధిపత్యం ప్రదర్శించినప్పటికీ విజయనగరం జిల్లాలోని కొన్ని నియోజకవర్గాల్లో కూటమి.. వైఎస్సార్ కాంగ్రెస్ అభ్యర్థుల మధ్య తీవ్ర పోటీ నెలకొంది. రాష్ట్రవ్యాప్తంగా అధికార కూటమి ప్రభంజనం వీస్తున్న వేళ.. విజయనగరం జిల్లా స్థానిక సంస్థల సమరంలో వైఎస్సార్ కాంగ్రెస్ పార్టీ కంచుకోటలా నిలబడటం రాజకీయ వర్గాల్లో తీవ్ర చర్చనీయాంశమైంది.
కీలక స్థానాల్లో పోటీ, ఫలితాలు
ముఖ్యంగా గరివిడి జెడ్పీటీసీ స్థానంలో ప్రముఖ నేతల కుటుంబాల మధ్య పోరు సాగింది. చీపురుపల్లి ఎమ్మెల్యే కిమిడి కళా వెంకట్రావు కోడలు కిమిడి సంధ్య అధికార పార్టీ టీడీపీ నుంచి బరిలో దిగగా.. మాజీ మంత్రి బొత్స సత్యనారాయణ కోడలు బొత్స పూజిత వైసీపీ నుంచి పోటీ చేశారు. కౌంటింగ్ ప్రారంభమైన తొలి రౌండ్ నుంచే పూజిత తిరుగులేని లీడ్‌తో దూసుకుపోయి అఖండ విజయాన్ని సొంతం చేసుకున్నారు.
అంతేకాకుండా గరివిడి మండలంలోని మెజార్టీ ఎంపీటీసీ స్థానాలను సైతం వైఎస్సార్సీపీ చేజిక్కించుకుని మండల పరిషత్ పీఠాన్ని కైవసం చేసుకున్నారు. దీంతో సిట్టింగ్ ఎమ్మెల్యే సొంత గడ్డపైనే ఆయన కోడలిని ఓడించి మండలాన్ని కైవసం చేసుకోవడం కళా వెంకట్రావుకు తీరని ఎదురుదెబ్బగా మిగిలింది. మరోవైపు గరివిడి మండలంలోని మెజారిటీ ఎంపీటీసీ స్థానాలను సైతం వైసీపీ కైవసం చేసుకోవడం విశేషం.
గుర్ల జెడ్పీటీసీ స్థానం నుంచి వైసీపీ అభ్యర్థిగా పోటీ చేసిన బొత్స సత్యనారాయణ సోదరి సంగంరెడ్డి వెంకటలక్ష్మి కూటమి అభ్యర్థిపై విజయం సాధించారు. దీనితో పాటు గుర్ల మండల పరిషత్ స్థానాన్ని కూడా వైసీపీ సొంతం చేసుకుంది. బొండపల్లి గజపతినగరం పరిధిలోని బొండపల్లి జెడ్పీటీసీ స్థానంలో హోరాహోరీ పోరు జరిగగా.. వైసీపీ తరఫున డాక్టర్ బొత్స అనూష పోటీ చేయగా, అధికార కూటమి మద్దతుదారుల నుంచి తీవ్ర పోటీ ఎదురైంది. పలు రాజకీయ సమీకరణాలు, తీవ్ర ఒత్తిళ్ల మధ్య జరిగిన ఈ పోరులో అనూష స్వల్ప తేడాతో ఓడిపోయారు.
Share
కూటమికి ప్రభుత్వానికి ఊహించని షాక్.. రాజానగరంలో వైసీపీ ఘనవిజయం!
