Karnataka style Butter Dosa: బ్రేక్‌ఫాస్ట్ స్పెషల్.. నోట్లో వేస్తే కరిగిపోయే కర్ణాటక బటర్ దోస రెసిపీ!

Karnataka style Butter Dosa: సౌత్ ఇండియాలో దోసలకు ఉన్న క్రేజే వేరు. అందులోనూ కర్ణాటక స్టైల్ బటర్ దోస అంటే చాలా మందికి ఇష్టం. దవణగెరె నగరంలో పుట్టిన ఈ దోసె, వెన్న సువాసనతో, బయట క్రిస్పీగా లోపల మెత్తగా ఉండి విభిన్నమైన రుచిని ఇస్తుంది. సాధారణ దోసల కంటే దీని పిండి తయారీ విధానం కొంచెం భిన్నంగా ఉంటుంది. మనం ఇంట్లో వాడే రెగ్యులర్ పిండితో కాకుండా.. కొన్ని ప్రత్యేక పదార్థాలు చేర్చి ఈ బెన్నె దోసను హోటల్ స్టైల్‌లో ఎలా చేసుకోవాలో ఇప్పుడు వివరంగా తెలుసుకుందాం.

కర్ణాటక స్టైల్ బటర్ దోస తయారీ విధానం:

కావలసిన పదార్థాలు:

దోస బియ్యం (సోనా మసూరి లేదా రేషన్ బియ్యం): 3 కప్పులు

మినపప్పు: 1 కప్పు

అటుకులు (లావువి): 1/2 కప్పు

మెంతులు: 1 టీస్పూన్

ముర్మురాలు (మరమరాలు): 1 కప్పు

ఉప్పు: రుచికి తగినంత

వెన్న: దోసెలు కాల్చడానికి సరిపడా

తయారీ విధానం:

1. ముందుగా ఒక గిన్నెలో బియ్యం, మినపప్పు, మెంతులను శుభ్రంగా కడిగి 5 నుంచి 6 గంటల పాటు నానబెట్టాలి. మరొక చిన్న గిన్నెలో అటుకులు, మరమరాలను గ్రైండ్ చేసే అరగంట ముందు నానబెడితే సరిపోతుంది.

2. నానిన బియ్యం, పప్పు మిశ్రమాన్ని గ్రైండర్ లేదా మిక్సీలో వేసి మెత్తగా రుబ్బుకోవాలి. ఇందులోనే నానబెట్టిన అటుకులు, మరమరాలు కూడా వేసి కలపాలి. పిండి మరీ నీళ్లలా కాకుండా.. కొంచెం చిక్కగా ఉండేలా చూసుకోవాలి.

3. రుబ్బిన పిండిని ఒక పెద్ద గిన్నెలోకి తీసుకుని.. కనీసం 8 నుంచి 10 గంటల పాటు లేదా రాత్రంతా పులియబెట్టాలి. పిండి ఎంత బాగా పులిస్తే.. దోసలు అంత రుచిగా, ప్లఫీగా వస్తాయి. దోసలు వేసే ముందు మాత్రమే అందులో రుచికి సరిపడా ఉప్పు కలపాలి.

4. స్టవ్ మీద దోస పెనం (Iron Tawa అయితే మంచిది) పెట్టి బాగా వేడి చేయాలి. పెనం వేడెక్కిన తర్వాత కొద్దిగా నీళ్లు చిలకరించి తుడిచేయాలి. ఇప్పుడు ఒక గరిటెడు పిండిని తీసుకుని పెనం మధ్యలో వేసి కొంచెం మందంగా రుద్దాలి.

Also Read: బోర్ కొట్టే పన్నీర్ కూరలకు గుడ్ బై.. ఈ కొత్త రకం పన్నీర్ రారా ట్రై చేయండి!

5. దోస వేసిన వెంటనే దాని చుట్టూ, మధ్యలో ఒక పెద్ద చెంచా వెన్నను వేయాలి. మంటను మీడియం ఫ్లేమ్‌లో ఉంచి దోసెను ఎర్రగా కాలే వరకు ఉంచాలి. వెన్న కరిగి దోస లోపలికి వెళ్లి మంచి గోల్డెన్ బ్రౌన్ కలర్ వస్తుంది.

6. ఈ దోసను రెండో వైపు కాల్చాల్సిన అవసరం లేదు. దోసె కాలిన తర్వాత మడతపెట్టి ప్లేట్‌లోకి తీసుకోవాలి. దీనిపై మరో చిన్న వెన్న ముద్దను ఉంచి సర్వ్ చేస్తే ఆ మజానే వేరు.

కర్ణాటక స్టైల్ బటర్ దోసను సాధారణంగా ‘ఆలుగడ్డ పల్యం’ (బంగాళదుంప కూర) , ‘కొబ్బరి చట్నీ’తో వడ్డిస్తారు. ముఖ్యంగా కర్ణాటకలో ఇచ్చే స్పైసీ కొబ్బరి చట్నీ ఈ దోసకు పర్‌ఫెక్ట్ కాంబినేషన్. మీరు కూడా ఈ వీకెండ్‌లో పైన చెప్పిన కొలతలతో ఈ బెన్నె దోసను ట్రై చేసి, మీ కుటుంబ సభ్యులను సర్ ప్రైజ్ చేయండి.