Social Media Age Limit: ఆస్ట్రేలియా బాటలో భారత్? సోషల్ మీడియా వినియోగంపై కేంద్రం కొత్త ప్లాన్!

Social Media Age Limit: సోషల్ మీడియా వినియోగంపై వయసుల వారీగా నియంత్రణలు తీసుకువచ్చే దిశగా కేంద్ర ప్రభుత్వం అడుగులు వేస్తోంది. ఢిల్లీలో జరుగుతున్న ‘ఇండియా ఏఐ ఇంపాక్ట్ సదస్సు 2026’ వేదికగా కేంద్ర ఐటీ, ప్రసార శాఖ మంత్రి అశ్వినీ వైష్ణవ్ ఈ విషయాన్ని ధృవీకరించారు. గ్లోబల్ డిజిటల్ ప్లాట్‌ఫారమ్‌లు భారత్ రాజ్యాంగ చట్రం, సాంస్కృతిక విలువలకు లోబడి పని చేయాలని స్పష్టం చేశారు. ఈ నేపథ్యంలో సోషల్ మీడియా సంస్థలతో ప్రభుత్వం విస్తృతస్థాయిలో చర్చలు జరుపుతోంది.

చిన్నపిల్లలు, యువతపై సోషల్ మీడియా ప్రతికూల ప్రభావాన్ని తగ్గించడానికి వయసు ఆధారిత నిబంధనలు అనివార్యమని మంత్రి పేర్కొన్నారు. ఆస్ట్రేలియా వంటి దేశాలు ఇప్పటికే 16 ఏళ్ల లోపు వారిపై సోషల్ మీడియా నిషేధాన్ని అమలు చేస్తున్న విషయాన్ని ఆయన గుర్తు చేశారు. ప్రపంచవ్యాప్తంగా అనేక దేశాలు ఈ తరహా నియంత్రణల వైపు మొగ్గు చూపుతున్నాయని, భారత్ కూడా ఆ దిశగానే యోచిస్తోందని వివరించారు. ఈ మేరకు వివిధ సంస్థలతో కలిసి సరైన విధివిధానాల రూపకల్పనపై కసరత్తు జరుగుతోందన్నారు.

డీప్‌ఫేక్స్, కృత్రిమ మేధస్సు (AI) దుర్వినియోగం సమాజానికి పెద్ద ముప్పుగా మారుతున్నాయని అశ్వినీ వైష్ణవ్ ఆందోళన వ్యక్తం చేశారు. సమాజంలోని నైతిక విలువలను దెబ్బతీసే ఇటువంటి సాంకేతిక ముప్పుల నుంచి పౌరులను రక్షించడానికి కఠినమైన చట్టాలు తీసుకురావాలని ప్రభుత్వం భావిస్తోంది. ఏఐ ద్వారా సృష్టించిన సమాచారాన్ని స్పష్టంగా గుర్తించేలా ‘వాటర్ మార్కింగ్’, ‘లేబులింగ్’ విధానాలను తప్పనిసరి చేస్తూ ఇప్పటికే ఐటీ నిబంధనలను సవరించినట్లు వెల్లడించారు.

గ్లోబల్ ప్లాట్‌ఫారమ్‌లు కేవలం తమ మాతృ సంస్థలు ఉన్న దేశాల చట్టాలనే కాకుండా తాము సేవలందిస్తున్న దేశాల స్థానిక చట్టాలను, సంస్కృతిని గౌరవించాలని మంత్రి కోరారు. ఒక దేశంలో సాధారణంగా భావించే అంశం మరో దేశంలో అభ్యంతరకరంగా ఉండవచ్చని, అందుకే సాంస్కృతిక సందర్భాన్ని అర్థం చేసుకోవడం ముఖ్యమని సూచించారు. పార్లమెంట్‌లో ఏకాభిప్రాయం ద్వారా డీప్‌ఫేక్స్ వంటి అంశాలపై అత్యంత కఠినమైన నియంత్రణలు తీసుకురావడానికి ప్రభుత్వం కట్టుబడి ఉందని స్పష్టం చేశారు.

సాంకేతిక ఆవిష్కరణలు విశ్వాసం ప్రాతిపదికన జరగాలని వైష్ణవ్ అభిప్రాయపడ్డారు. నమ్మకం లేని ఆవిష్కరణలు సమాజానికి భారమవుతాయని హెచ్చరించారు. డిజిటల్ వ్యక్తిగత డేటా రక్షణ చట్రం కింద కూడా మైనర్ల డేటా సేకరణపై కఠిన నిబంధనలు ఉన్నాయని గుర్తు చేశారు. సోషల్ మీడియా బాధ్యతాయుతమైన వేదికగా ఉండాలని, ఇందుకు అవసరమైన అన్ని చర్యలు తీసుకుంటామని మంత్రి భరోసా ఇచ్చారు.