Public Wi-Fi Safety: మనం ఎక్కడికైనా ప్రయాణించినప్పుడు లేదా కాఫీ షాపులు, రైల్వే స్టేషన్లు, మాల్స్కు వెళ్లినప్పుడు ఫోన్లో ఫ్రీ వైఫై సిగ్నల్ కనిపిస్తే చాలు.. ఆలోచించకుండా వెంటనే కనెక్ట్ చేసేస్తాం. మన మొబైల్ డేటా ఆదా అవుతుందనే చిన్న ఆశతో చాలామంది ఎలాంటి జాగ్రత్తలు లేకుండా పబ్లిక్ వైఫైని వాడేస్తుంటారు. కానీ ఇలాంటి ఉచిత నెట్వర్క్లు మనకు ఎంత సౌకర్యంగా ఉంటాయో.. సైబర్ నేరగాళ్లకు కూడా అంతే సులభమైన దోపిడీగా మారుతున్నాయి. ఉచితంగా ఇంటర్నెట్ వస్తోంది కదా అని వాడితే.. మన వ్యక్తిగత సమాచారం మొత్తం హ్యాకర్ల చేతికి చిక్కే ప్రమాదం ఎప్పుడూ పొంచి ఉంటుంది.
ఇంట్లో మనం వాడుకునే వైఫైకి బలమైన పాస్వర్డ్, పటిష్టమైన భద్రత ఉంటాయి. కానీ బహిరంగ ప్రదేశాల్లో ఉండే పబ్లిక్ వైఫైలను అందరూ సులభంగా కనెక్ట్ అయ్యేలా తెరిచి ఉంచుతారు. వీటిలో డేటా రక్షణ నియమాలు చాలా బలహీనంగా ఉంటాయి. ఒకే నెట్వర్క్కు వందలాది మంది తెలియని వ్యక్తులు కనెక్ట్ అయి ఉండటం వల్ల, మన ఫోన్ నుండి వెళ్లే సమాచారాన్ని ఇతరులు సులభంగా గమనించే అవకాశం ఉంటుంది. సరైన భద్రత లేని ఈ నెట్వర్క్లలో మనం పంపే మెసేజ్లు, చూసే వెబ్సైట్ల వివరాలు బయటి వ్యక్తులకు స్పష్టంగా కనిపించే ముప్పు ఉంది.
పబ్లిక్ వైఫై వాడేటప్పుడు ఎదురయ్యే అతిపెద్ద ముప్పు మధ్యవర్తి దాడులు. అంటే.. మీరు వైఫై రూటర్కు కనెక్ట్ అయినప్పుడు, మీ ఫోన్కు, ఇంటర్నెట్కు మధ్యలో హ్యాకర్లు తమ పరికరాలను ఉంచి నిఘా పెడతారు. దీనివల్ల మీరు ఇంటర్నెట్లో చేసే ప్రతి పని నేరుగా సర్వర్కు వెళ్లకుండా, ముందుగా హ్యాకర్ల కంప్యూటర్ ద్వారా వెళ్తుంది. ఆ సమయంలో మీరు టైప్ చేసే పాస్వర్డ్లు, ఈ-మెయిల్ వివరాలు, బ్యాంక్ ఖాతా సమాచారం వంటివి వారికి ఇట్టే తెలిసిపోతాయి. మనకు ఏమాత్రం అనుమానం రాకుండానే మన వ్యక్తిగత వివరాలు నేరగాళ్ల చేతుల్లోకి వెళ్లిపోతాయి.
Also Read: మీకు వచ్చే ఫోన్ కాల్ బ్యాంక్ నుంచా లేక సైబర్ నేరగాళ్ల నుంచా? నంబర్ చూసి ఇలా కనిపెట్టేయొచ్చు!
కొన్నిసార్లు హ్యాకర్లు అసలైన పబ్లిక్ వైఫై పేరును పోలిన నకిలీ నెట్వర్క్లను సృష్టించి వల వేస్తారు. ఉదాహరణకు మీరు ఒక హోటల్ లేదా స్టేషన్లో ఉన్నప్పుడు అక్కడి అసలు వైఫై పేరుతో పాటు, దాదాపు అలాంటి పేరుతోనే మరో ఉచిత వైఫై కనిపిస్తుంది. పొరపాటున మనం ఆ నకిలీ నెట్వర్క్కు కనెక్ట్ అయితే, మన ఫోన్లోని డేటా మొత్తం నేరుగా నేరగాళ్ల చేతికి చిక్కుతుంది. అంతేకాకుండా ఈ నెట్వర్క్ల ద్వారా మన ఫోన్ లేదా ల్యాప్టాప్లోకి హానికరమైన వైరస్ ఫైళ్లను పంపించి ఫోన్ను పూర్తిగా తమ ఆధీనంలోకి తీసుకునే ప్రమాదం కూడా ఉంటుంది.
పబ్లిక్ వైఫై వాడాల్సి వచ్చినప్పుడు కొన్ని కనీస జాగ్రత్తలు పాటించడం చాలా అవసరం. ముఖ్యంగా బహిరంగ నెట్వర్క్లకు కనెక్ట్ అయినప్పుడు బ్యాంక్ లావాదేవీలు చేయడం, ఆన్లైన్ షాపింగ్ కోసం కార్డు వివరాలు నమోదు చేయడం వంటివి పూర్తిగా మానుకోవాలి. అత్యవసరమైన ఆర్థిక పనులు ఉంటే మీ సొంత మొబైల్ డేటాను వాడుకోవడమే ఎంతో సురక్షితం. అలాగే మీ ఫోన్ సెట్టింగ్స్లో వైఫై ఆటోమేటిక్గా కనెక్ట్ అయ్యే ఆప్షన్ను ఆపివేయాలి. దీనివల్ల తెలియని నెట్వర్క్లకు మీ ఫోన్ దానంతట అదే కనెక్ట్ కాకుండా ఉంటుంది. ఏదైనా వెబ్సైట్ తెరిచినప్పుడు అడ్రస్ బార్ ప్రారంభంలో తాళం గుర్తు ఉందో లేదో చూసుకోవడం ద్వారా కొంతవరకు రక్షణ పొందవచ్చు.
సాంకేతికత మన పనులను సులభతరం చేసినప్పటికీ.. దాన్ని వాడేటప్పుడు అవగాహనతో ఉండటం మన బాధ్యత. ఉచితంగా దొరుకుతోంది కదా అని ఏ నెట్వర్క్ పడితే ఆ నెట్వర్క్కు కనెక్ట్ కావడం వల్ల భవిష్యత్తులో ఆర్థిక నష్టాలు, వ్యక్తిగత ఇబ్బందులు ఎదుర్కోవాల్సి వస్తుంది. కాబట్టి.. పబ్లిక్ వైఫైని కేవలం సాధారణ వార్తలు చదవడానికి లేదా వినోదం కోసం మాత్రమే పరిమితం చేసి, ముఖ్యమైన పనులకు దూరంగా ఉంచడమే అత్యంత తెలివైన పని.