LG Washing Machines: ప్రముఖ ఎలక్ట్రానిక్స్ దిగ్గజం ‘ఎల్జీ ఎలక్ట్రానిక్స్ ఇండియా’ దేశీయ మార్కెట్లోకి కొత్త శ్రేణి సెమీ ఆటోమేటిక్ వాషింగ్ మిషన్లను లాంచ్ చేసింది. మొండి మరకలు తొలగింపు, బట్టలు వేగంగా ఆరేందుకు వీలుగా వీటిని రూపొందించారు. మొత్తం 15 విభిన్న మోడళ్లలో 8 కేజీల నుంచి 12 కేజీల కెపాసిటీల్లో ఈ వాషింగ్ మిషన్లను పరిచయం చేశారు. వాటిలోని ప్రధాన ఫీచర్లు ఏంటో ఇప్పుడు చూద్దాం.
ఎల్జీ ఈ సెమీ ఆటోమేటిక్ వాషింగ్ మిషన్ల డిజైన్ విషయంలో ప్రత్యేక శ్రద్ధ వహించింది. అంతేకాకుండా ఒనిక్స్ బ్లాక్, మిడిల్ బ్లాక్, బర్గండి వంటి ప్రీమియం రంగుల్లో ఎంతో ఆకర్షణీయంగా అందుబాటులోకి తెచ్చింది. ప్రధాన ఫీచర్ల విషయానికి వస్తే.. ఈ వాషింగ్ మిషన్లలో ప్రత్యేకమైన సాంకేతికను ఎల్జీ పొందుపరిచింది. డ్యూయల్ స్పిన్ షవర్ ఫీచర్ తో వీటిని తీసుకొచ్చింది. ఇందులో ఉండే రెండు వాటర్ ఇన్లెట్లు దుస్తులను నీటితో శుభ్రంగా కడిగి సబ్బు చారలు పూర్తిగా తొలగిపోయేలా సాయపడతాయి.
ఈ సెమీ వాషింగ్ మిషన్లలోని రోలర్ జెట్ పల్సేటర్+ ను.. తిమింగలం తోక ఆకారాన్ని స్ఫూర్తిగా తీసుకుని తయారు చేశారు. ఇది నీటిని బలంగా తిప్పడం ద్వారా మొండి మరకలను సులువుగా తొలగిస్తుందని కంపెనీ వర్గాలు తెలిపాయి. అలాగే ఆల్ట్రా స్క్రబ్ వాల్ ఫీచర్.. కాలర్లు, కఫ్‌ల దగ్గర ఎక్కువగా ఉండే మురికిని తొలగిస్తుందని పేర్కొన్నాయి. అటు విండ్ జెట్ డ్రై+ ఫీచర్.. బట్టలు పిండే సమయంలో గాలి ప్రసరణ పెంచి తేమను త్వరగా తొలగించనుంది. తద్వారా దుస్తులు వేగంగా ఆరడానికి సాయపడనుంది. మరోవైపు బట్టలు ఉతికేటప్పుడు వచ్చే పీచును స్మార్ట్ ఫిల్టర్ పట్టుకొని తొలగించనుంది. మరోవైపు ఎలుకల నుంచి మిషన్ ను కాపాడేందుకు ‘ర్యాట్ అవే టెక్నాలజీ’ని సైతం ఇందులో వినియోగించారు.
Also Read: యూపీఐ వాడేవారికి అదిరిపోయే గుడ్ న్యూస్.. భీమ్ యాప్‌లోకి కొత్తగా ‘MyUPI’ ఏఐ అసిస్టెంట్!
లాంచ్ సందర్భంగా ఎల్జీ ఎలక్ట్రానిక్స్ ఇండియా హోమ్ అప్లయన్సెస్ విభాగాధిపతి యాగగ్ మిన్ హ్వాంగ్ మాట్లాడారు. రోజువారీ లాండ్రీలో మెరుగైన అనుభవాన్ని కోరుకునే భారతీయ వినియోగదారుల కోసం అధునాతన సాంకేతికతతో, ప్రీమియం డిజైన్‌తో వీటిని తెచ్చినట్లు తెలిపారు. ఈ కొత్త ఉత్పత్తులన్నీ ఎల్జీకి చెందిన గ్రేటర్ నోయిడా ప్లాంట్‌లో తయారవుతున్నాయని పేర్కొన్నారు. త్వరలోనే వీటి ధరలకు సంబంధించిన మరింత సమాచారం పంచుకుంటామని స్పష్టం చేశారు. కాగా, ప్రతీ మిషన్ నాణ్యతను ‘ఏఐ విజన్ ఇన్స్పెక్షన్’ ద్వారా 100 శాతం తనిఖీ చేసిన తర్వాతే మార్కెట్లోకి విడుదల చేస్తున్నట్లు ఎల్జీ కంపెనీ వెల్లడించింది.
Also Read: డేటా అక్కర్లేని వారికి గుడ్ న్యూస్.. Airtel, Jio, Vi నుంచి.. అత్యంత చౌకైన ప్లాన్స్ వచ్చేస్తున్నాయ్!
Share
శ్రీకాకుళంలో విషాదం.. టెక్కలి వద్ద రైలు ఢీకొని నలుగురు యువకులు దుర్మరణం!
యోగా మ్యాట్ To బ్యూటీ క్రౌన్.. తెలంగాణ అమ్మాయి ప్రీతి క్రేజీ సక్సెస్ స్టోరీ!
