Nothing Phone 4b RCB Edition: లండన్‌కు చెందిన ప్రముఖ స్మార్ట్‌ఫోన్ తయారీ సంస్థ నథింగ్.. భారత మార్కెట్లోకి తమ సరికొత్త బడ్జెట్ ఫోన్ ‘నథింగ్ ఫోన్ 4b’ని తీసుకురావడానికి సిద్ధమైంది. ఈ సిరీస్‌లో భాగంగా ప్రత్యేకంగా క్రికెట్ అభిమానుల కోసం రాయల్ ఛాలెంజర్స్ బెంగళూరు (RCB) స్పెషల్ ఎడిషన్‌ను కూడా అదే రోజున విడుదల చేయనున్నట్లు సంస్థ ప్రకటించింది. ఈ లిమిటెడ్ ఎడిషన్ ఫోన్ డిజైన్, కలర్ వివరాలు లాంచ్‌కు ముందే బయటకు వచ్చాయి.
ఈ సరికొత్త నథింగ్ ఫోన్ 4b ఆర్‌సీబీ ఎడిషన్ జూలై 7న మధ్యాహ్నం 3:30 గంటలకు భారత మార్కెట్లో అడుగుపెట్టనుంది. విడుదలైన వెంటనే.. బెంగళూరులోని నథింగ్ అధికారిక బ్రాండెడ్ స్టోర్‌లో సాయంత్రం 4 గంటల నుండి ఒక ప్రత్యేక సేల్ (డ్రాప్ ఈవెంట్) ద్వారా ఇది కొనుగోలుదారులకు అందుబాటులోకి రానుంది. ఇవి చాలా పరిమిత సంఖ్యలో మాత్రమే ఉన్నందున, ముందు వచ్చిన వారికి ముందు అనే ప్రాతిపదికన విక్రయించనున్నారు.
ఈ స్పెషల్ ఎడిషన్ డిజైన్ సాధారణ మోడల్‌ను పోలి ఉన్నప్పటికీ.. ఆర్‌సీబీ అభిమానులను ఆకట్టుకునేలా కొన్ని కీలక మార్పులు చేశారు. ఫోన్ వెనుక భాగంలో మధ్యలో ఐపీఎల్ ఫ్రాంచైజీ RCB లోగోను ముద్రించారు. అలాగే, ఆర్‌సీబీ జెర్సీ రంగును ప్రతిబింబించేలా ఈ ఫోన్‌ను పూర్తిగా ఎరుపు (రెడ్) రంగులో డిజైన్ చేశారు. దీనికి అదనపు లుక్ ఇచ్చేలా పక్కన ఉండే ఫిజికల్ బటన్స్‌ను బ్లాక్ కలర్‌లో అందించారు.
ఐపీఎల్ 2026 సీజన్ కోసం రాయల్ ఛాలెంజర్స్ బెంగళూరు జట్టుకు నథింగ్ సంస్థ జెర్సీ, టైటిల్ స్పాన్సర్‌గా వ్యవహరిస్తోంది. ఈ భాగస్వామ్యంలో భాగంగానే కంపెనీ తమ తొలి భారతీయ బ్రాండ్ స్టోర్‌ను కూడా బెంగళూరులోనే ప్రారంభించింది. ఈ నేపథ్యంలోనే క్రికెట్ ప్రేమికులను టార్గెట్ చేస్తూ ఈ సరికొత్త కలెక్టబుల్ డివైజ్‌ను మార్కెట్లోకి తెస్తోంది.
సాధారణ నథింగ్ ఫోన్ 4b మోడల్ జూలై 7న లాంచ్ అయిన తర్వాత ప్రముఖ ఈ-కామర్స్ సైట్ ఫ్లిప్‌కార్ట్ ద్వారా విక్రయానికి రానుంది. ఈ ఫోన్ కనీసం బ్లూ కలర్ ఆప్షన్‌లో లభిస్తుందని కంపెనీ స్పష్టం చేసింది. అంతేకాకుండా.. ఈ స్మార్ట్‌ఫోన్ క్వాల్కమ్ స్నాప్‌డ్రాగన్ ప్రాసెసర్‌తో పనిచేస్తుందని నథింగ్ సంస్థ ధృవీకరించింది. తక్కువ బడ్జెట్లో వినూత్న డిజైన్ కోరుకునే వారికి ఇది మంచి ఆప్షన్ కానుంది.
Share
కొత్త లాప్టాప్ కొంటున్నారా? ఈ 4 స్టెప్స్ ఫాలో అయితే అస్సలు నష్టపోరు!
సీటు మార్చిన ఎయిర్ ఇండియాకు భారీ షాక్.. ఏకంగా రూ.60 వేల జరిమానా!
