టెక్ ప్రపంచంలో సంచలనం.. 10 ఇంచుల భారీ డిస్‌ప్లేతో Rollable Phone తెస్తున్న శాంసంగ్!

Samsung Rollable Phone: ఫోల్డబుల్ ఫోన్ల విభాగంలో సంచలనాలు సృష్టించిన ప్రముఖ దిగ్గజం సాంసంగ్.. ఇప్పుడు మరో సరికొత్త టెక్నాలజీతో మొబైల్ ప్రపంచాన్ని ఆశ్చర్యపరచడానికి సంసిద్ధమవుతోంది. ఇప్పటివరకు మనం మడతబెట్టే (ఫోల్డబుల్) ఫోన్లను చూశాం కానీ, త్వరలోనే స్క్రీన్‌ను పక్కకు లాగితే సాగిపోయే ‘రోలబుల్’ స్మార్ట్‌ఫోన్‌ను సాంసంగ్ మార్కెట్లోకి తీసుకురానుందని తాజా నివేదికలు చెబుతున్నాయి. ఈ అద్భుతమైన డివైజ్ గురించిన ఆసక్తికరమైన వివరాలు ఇప్పుడు లీకయ్యాయి.

మార్కెట్లోకి వచ్చేది ఎప్పుడంటే?

దక్షిణ కొరియాకు చెందిన ఒక ప్రముఖ బిజినెస్ పత్రిక కథనం ప్రకారం.. శాంసంగ్ డిస్‌ప్లే విభాగం ఈ రోలబుల్ టెక్నాలజీపై శరవేగంగా పనిచేస్తోంది. ఈ సరికొత్త వినూత్న స్మార్ట్‌ఫోన్‌ను 2028 ప్రథమార్థంలో వినియోగదారుల ముందుకు తీసుకురావడమే లక్ష్యంగా కంపెనీ అడుగులు వేస్తోంది. సాంసంగ్ చరిత్రలోనే ఇదొక అతిపెద్ద డిస్‌ప్లే విప్లవంగా నిలవనుందని టెక్ నిపుణులు భావిస్తున్నారు.

టాబ్లెట్‌లా మారిపోయే స్క్రీన్:

ఈ రోలబుల్ ఫోన్ ప్రత్యేకత ఏంటంటే.. సాధారణ సమయంలో ఇది మన చేతికి సరిపోయే మామూలు ఫోన్‌లానే ఉంటుంది. కానీ అవసరమైనప్పుడు దీని స్క్రీన్‌ను పక్కకు విస్తరిస్తే ఏకంగా 10 ఇంచుల భారీ డిస్‌ప్లేలా మారిపోతుంది. దీనికి 16:9 యాస్పెక్ట్ రేషియోతో పాటు అత్యంత స్పష్టమైన విజువల్స్ కోసం 440MP డెన్సిటీని అందించనున్నారు. దీనికి ‘గెలాక్సీ జెడ్ స్లైడ్’ (Galaxy Z Slide) అనే పేరు పెట్టే అవకాశం ఉంది. అంతేకాదు.. 2030 నాటికి మరో రోలబుల్ మోడల్‌ను కూడా తీసుకురావాలని కంపెనీ యోచిస్తోంది.

Also Read: వారెవ్వా.. సింగిల్ ఛార్జ్‌తో 50 గంటలు నడిచే ఇయర్‌బడ్స్ తెచ్చిన వివో, ధర ఎంతంటే?

పోటీని తట్టుకునేందుకే ఈ ప్లాన్:

ప్రస్తుతం మార్కెట్లో ఫోల్డబుల్ ఫోన్ల విభాగంలో పోటీ విపరీతంగా పెరిగిపోయింది. ఒక నివేదిక ప్రకారం.. ఫోల్డబుల్ డిస్‌ప్లే మార్కెట్లో సాంసంగ్ వాటా గతంతో పోలిస్తే కొంత తగ్గింది. ఈ నేపథ్యంలో తన పూర్వ వైభవాన్ని చాటుకోవడానికి, ప్రీమియం స్మార్ట్‌ఫోన్ విభాగంలో మళ్లీ నెంబర్ వన్ స్థానాన్ని సుస్థిరం చేసుకోవడానికి సాంసంగ్ ఈ రోలబుల్ ఫోన్ల వైపు మొగ్గు చూపుతోంది.

ఎన్నో సవాళ్లు.. మరెన్నో ప్రయోగాలు:

స్క్రీన్‌ను మడతబెట్టడం కంటే.. దానిని రోల్ చేయడం వెనుక ఎంతో సాంకేతిక శ్రమ దాగి ఉంది. ఫోన్ లావుగా అవ్వకుండా, సన్నని ప్రొఫైల్‌లోనే స్క్రీన్ సాఫీగా లోపలికి, బయటకు వచ్చేలా చేయడం ఒక పెద్ద ఇంజనీరింగ్ సవాలు. గతంలో జరిగిన పలు టెక్ ఈవెంట్లలో సాంసంగ్ ‘ఫ్లెక్స్ హైబ్రిడ్’, ‘రోలబుల్ ఫ్లెక్స్’ వంటి ప్రోటోటైప్స్ (నమూనాలు) ప్రదర్శించి తన ప్రతిభను చాటుకుంది. ఇప్పుడు అదే టెక్నాలజీని నిజమైన స్మార్ట్‌ఫోన్‌గా మార్చి, వీడియోలు చూసేందుకు, మల్టీటాస్కింగ్ చేసుకునేందుకు వీలుగా ఒక అద్భుతమైన డివైజ్‌ను మనకు అందించబోతోంది.

Also Read: యాపిల్ స్మార్ట్ స్కెచ్.. మెటా మార్కెట్‌ను దెబ్బకొట్టేలా సరికొత్త గ్లాసెస్.. లాంచింగ్ ఎప్పుడంటే?