సముద్రపు సొరచేపలు.. టెక్నాలజీకి గొప్ప వరం.. ఈ ఆవిష్కరణలు చూస్తే మైండ్ బ్లాకే!

Shark Technology: కొన్ని వేల సంవత్సరాలుగా సముద్రాలను ఏలుతున్న వాటిలో షార్క్ చేపలు (సొర చేపలు) ముందు వరుసలో ఉంటాయి. ప్రమాదకరమైన జీవులుగానే ఇన్నాళ్లు మనకు తెలిసిన ఈ జీవులు.. ప్రస్తుతం ఆధునిక విజ్ఞాన శాస్త్రానికి సరికొత్త పాఠాలు నేర్పుతున్నాయి. షార్క్ చేపల శరీరాకృతి, వాటి జీవన విధానం ఆధారంగా శాస్త్రవేత్తలు మానవాళికి ఉపయోగపడే ఎన్నో అద్భుతమైన సాంకేతికతలను ఆవిష్కరిస్తున్నారు.

షార్క్‌తో బయోమిమిక్రీ

ప్రకృతిని చూసి సరికొత్త టెక్నాలజీని సృష్టించడాన్ని సైన్స్ భాషలో ‘బయోమిమిక్రీ’ అంటారు. షార్క్ చేపల చర్మంపై ఉండే ప్రత్యేకమైన నిర్మాణాలు ఇంజనీర్లకు, శాస్త్రవేత్తలకు ఒక పెద్ద లాబొరేటరీలా ఉపయోగపడుతున్నాయి. షార్క్ చేపలు నీటిలో ఎంత వేగంగా ఈదినప్పటికీ వాటి శరీరంపై నాచు కానీ బ్యాక్టీరియా కానీ చేరవు. దీని వెనుక ఉన్న రహస్యాన్ని ఛేదించిన పరిశోధకులు విస్తుపోయారు.

షార్క్ స్కిన్ టెక్నాలజీ

షార్క్ చేప చర్మాన్ని మైక్రోస్కోప్‌లో చూస్తే అది నునుపుగా కాకుండా ‘డెంటికల్స్’ అని పిలిచే చిన్న చిన్న పళ్ల వంటి నిర్మాణాలతో కూడి ఉంటుంది. ఇవి బ్యాక్టీరియా, ఇతర క్రిములు చర్మంపై స్థావరం ఏర్పరచుకోకుండా అడ్డుకుంటాయి. ఈ సూత్రాన్ని ఆధారంగా చేసుకుని శాస్త్రవేత్తలు ‘షార్క్‌లెట్’ (Sharklet) అనే ప్రత్యేకమైన ప్లాస్టిక్ పొరను తయారు చేశారు. దీనిని ఆసుపత్రులలోని బెడ్స్, మెడికల్ పరికరాలు, పబ్లిక్ ప్రదేశాల సర్ఫేస్‌లపై ఉపయోగిస్తున్నారు. ఎలాంటి కెమికల్స్ లేకుండా కేవలం భౌతిక ఆకృతి ద్వారానే ఇది 99% బ్యాక్టీరియా వృద్ధిని అడ్డుకుంటోంది.

వేగాన్ని పెంచే డిజైన్లు

సముద్రంలో షార్క్ చేపలు చాలా నిశ్శబ్దంగా, అత్యంత వేగంగా ప్రయాణిస్తాయి. వాటి చర్మంపై ఉండే గీతలు నీటి ఎదురయ్యే ఒత్తిడి తగ్గించడంలో కీలక పాత్ర పోషిస్తున్నాయి. ఈ అద్భుతమైన గుణాన్ని విమానాల తయారీలో, ఓడల డిజైనింగ్‌లో ఇంజనీర్లు వాడుతున్నారు. విమానాల రెక్కలపై, ఓడల కింది భాగంలో షార్క్ చర్మం లాంటి మైక్రో-గీతలను రూపొందించడం ద్వారా ఇంధన వినియోగాన్ని గణనీయంగా తగ్గించవచ్చని శాస్త్రవేత్తలు నిరూపించారు. దీనివల్ల ప్రయాణ వేగం పెరగడమే కాకుండా పర్యావరణ కాలుష్యం కూడా తగ్గుతోంది.

Also Read: ఉక్కపోతకు బై బై.. వర్షాలకు హాయ్ హాయ్.. దేశవ్యాప్తంగా ఇక వానలే వానలు!

సరికొత్త ఈత దుస్తులు

క్రీడా రంగంలో కూడా షార్క్ టెక్నాలజీ ఎంతగానో ఉపయోగపడుతోంది. ఒలింపిక్ ఈతగాళ్ల కోసం షార్క్ చర్మం ఆధారంగా ప్రత్యేకమైన హై టెక్ స్విమ్‌సూట్లను డిజైన్ చేశారు. ఇవి నీటి నిరోధకతను తగ్గించి, ఈతగాళ్లు మరింత వేగంగా దూసుకుపోవడానికి సహాయపడుతున్నాయి. అయితే ఈ సూట్లు ధరించిన వారికి విపరీతమైన అడ్వాంటేజ్ లభిస్తుండటంతో.. కొన్ని అంతర్జాతీయ పోటీలలో వీటిపై ఆంక్షలు కూడా విధించాల్సి రావడం గమనార్హం.

Also Read: ఫోన్లు, టీవీల వెనుక ఉండే.. ‘CE’ గుర్తు అర్థమేంటి? దాని రహస్యం ఇదే!