Cyber Fraud: సైబర్ నేరగాళ్ల మాయమాటలు నమ్మి సామాన్యులే కాదు, చట్టాన్ని పరిరక్షించే పోలీసులు కూడా మోసపోతున్న ఘటనలు ఆందోళన కలిగిస్తున్నాయి. తాజాగా హైదరాబాద్‌లో వెలుగుచూసిన ఒక ఘటనలో, ఓ పోలీస్ కానిస్టేబుల్ ఏకంగా రూ.30 లక్షల వరకు సమర్పించుకుని రోడ్డున పడ్డారు.
పరిచయం కాస్తా పెట్టుబడుల వైపు..
గచ్చిబౌలి పోలీస్ స్టేషన్‌లో పనిచేస్తున్న ఒక కానిస్టేబుల్‌కు ఫేస్‌బుక్‌లో ‘సుకన్య రెడ్డి’ అనే పేరుతో ఉన్న ఖాతా నుండి ఫ్రెండ్ రిక్వెస్ట్ వచ్చింది. ఏమాత్రం అనుమానం రాకుండా ఆ రిక్వెస్ట్‌ను యాక్సెప్ట్ చేసిన కానిస్టేబుల్, ఆమెతో చాటింగ్ చేయడం ప్రారంభించారు. ఆ తర్వాత ఇద్దరూ వాట్సాప్ నంబర్లు మార్చుకుని మరింత చనువుగా మాట్లాడటం మొదలుపెట్టారు.
ఆశ చూపి.. లాభాలు చూపించి..
కొద్దిరోజుల పరిచయం తర్వాత, ఆ మహిళ ‘డార్విన్ ఎక్స్ గ్లోబల్’ అనే ట్రేడింగ్ ప్లాట్‌ఫామ్ గురించి అతనికి చెప్పింది. అందులో పెట్టుబడి పెడితే తక్కువ సమయంలోనే ఊహించని రీతిలో భారీ లాభాలు వస్తాయని నమ్మబలికింది. మొదట ఆమె మాటలు నమ్మి సదరు కానిస్టేబుల్ చిన్న మొత్తంలో డబ్బులు డిపాజిట్ చేశారు. దానికి తగ్గట్టుగానే ఖాతాలో లాభాలు కనిపించడం, వాటిని విత్‌డ్రా చేసుకునేందుకు కూడా వెసులుబాటు ఉండటంతో అతనికి నమ్మకం కుదిరింది.
అసలు రంగు బయటపడింది ఇలా..
ఈ నమ్మకంతోనే కానిస్టేబుల్ విడతలవారీగా ఏకంగా రూ.29.20 లక్షల వరకు సదరు ట్రేడింగ్ యాప్‌లో పెట్టుబడి పెట్టారు. ఆ తర్వాత అతని ఖాతాలో ఏకంగా రూ.76 లక్షల లాభం వచ్చినట్లు చూపించింది. అయితే, ఆ మొత్తాన్ని తన బ్యాంక్ ఖాతాలోకి ఉపసంహరించుకోవాలని ప్రయత్నించాడు. ముందస్తుగా రూ.12 లక్షల ఫీజు చెల్లిస్తేనే విత్‌డ్రా అవుతుందని నిర్వాహకులు తేల్చిచెప్పారు.
సైబర్ క్రైమ్ పోలీసులకు ఫిర్యాదు..
దాంతో తాను దారుణంగా మోసపోయానని గ్రహించిన సదరు కానిస్టేబుల్, వెంటనే సైబర్ క్రైమ్ పోలీసులను ఆశ్రయించి ఫిర్యాదు చేశారు. పరిచయం లేని వ్యక్తుల నుంచి వచ్చే సోషల్ మీడియా రిక్వెస్ట్‌లు, ఆన్‌లైన్ ట్రేడింగ్ ఆఫర్ల పట్ల అప్రమత్తంగా ఉండాలని పోలీసులు సూచిస్తున్నారు.
Also Read: మురసు తుఫాన్ ఎఫెక్ట్.. ఏపీలో పలు రైళ్లు రద్దు, మరికొన్ని దారి మళ్లింపు
Share
ఈ నేషనల్ హైవే ఒకప్పుడు మరణాలకు కేరాఫ్.. నిత్యం రక్తంతో ఎరుపెక్కేది!
అన్‌హెల్దీ అని తినడం మానేశారా? నిజానికి ఈ 5 ఫుడ్స్‌తో కలిగే లాభాలు అన్నీ ఇన్నీ కావు!
