వాట్సప్ యూజర్లకు బిగ్ రిలీఫ్.. చాట్ స్క్రీన్ నుంచే రీసెంట్ ఫొటోలు, వీడియోలు షేర్ చేయండిలా!

WhatsApp New Feature: వాట్సప్‌లో ఫొటోలు, వీడియోలు పంపడం ఇక మరింత సులభం కానుంది. ఫోన్ గ్యాలరీలోకి వెళ్లి ఫైల్ వెతకాల్సిన పని లేకుండా.. చాట్‌లోనే తాజాగా తీసిన లేదా సేవ్ చేసిన మీడియాను చూపించే కొత్త ఫీచర్‌ను మెటా పరీక్షిస్తోంది. దీనికి Recent Media Suggestions అని పేరు పెట్టింది. ప్రస్తుతం కొంతమంది ఆండ్రాయిడ్, ఐఫోన్ వినియోగదారులకు ఈ సదుపాయం అందుబాటులోకి వస్తున్నట్లు సమాచారం. అయితే, ఈ ఫీచర్ కనిపించిందంటే ఫొటోలు ఆటోమేటిక్‌గా పంపబడతాయని కాదు. ఏది పంపాలనేది పూర్తిగా మన చేతుల్లోనే ఉంటుంది.

చాట్‌లోనే మీడియా ప్రివ్యూ..

ఈ ఫీచర్ అందుబాటులో ఉన్నప్పుడు, చాట్ తెరిచిన సమయంలో ఫోన్‌లో ఇటీవల జత చేసిన ఫొటో లేదా వీడియో చిన్న ప్రివ్యూగా కనిపించవచ్చు. కొన్ని సందర్భాల్లో అది మెసేజ్ టైప్ చేసే బార్ పైన కనిపిస్తుంది. మరికొన్ని సందర్భాల్లో కెమెరా ఐకాన్ స్థానంలో మీడియా ప్రివ్యూ కనిపించవచ్చు. దాన్ని చూడగానే పంపాల్సిన అవసరం లేదు. ఎప్పటిలాగే మెసేజ్ టైప్ చేస్తూ చాట్ కొనసాగించవచ్చు. మీడియా షేర్ చేయాలనుకున్నప్పుడే ప్రివ్యూను ఎంచుకోవాలి.

పంపే ముందు ఎడిట్ చేయొచ్చు..

ప్రివ్యూలో కనిపించిన ఫొటో లేదా వీడియోపై ట్యాప్ చేస్తే.. వాట్సప్‌లోని ఎడిటింగ్ ఆప్షన్లు తెరుచుకుంటాయి. అక్కడ క్యాప్షన్ రాయొచ్చు, స్టిక్కర్లు జోడించొచ్చు, అవసరమైన మార్పులు చేసుకోవచ్చు. ఆ తర్వాతే పంపే అవకాశం ఉంటుంది. కెమెరాతో తీసిన ఫొటోలే కాకుండా.. స్క్రీన్‌షాట్లు, డౌన్‌లోడ్ చేసిన చిత్రాలు, ఇతర యాప్‌ల నుంచి సేవ్ చేసిన మీడియా కూడా సూచనల్లో కనిపించవచ్చు. అందువల్ల ఫోన్‌లోని తాజా మీడియాను చాట్ నుంచే త్వరగా ఎంచుకోవచ్చు.

Also Read: ఇలాంటి ఉద్యోగం కూడా ఉంటుందా? ఇన్‌స్టా రీల్స్ స్క్రోల్ చేస్తే చాలు.. నెలాఖరుకు జీతం!

వద్దనుకుంటే ఆపేయొచ్చు..

చాట్‌లో ఇలాంటి సూచనలు వద్దనుకునేవారు వాటిని ఆఫ్ చేసుకోవచ్చు. దీనికోసం వాట్సప్ సెట్టింగ్స్‌లోకి వెళ్లి Chats విభాగాన్ని తెరవాలి. అక్కడ Recent media suggestions అనే ఆప్షన్ కనిపిస్తే.. దాన్ని ఆఫ్ చేయాలి. ఆ తర్వాత చాట్‌లో తాజా మీడియా సూచనలు కనిపించవు. ఈ ఫీచర్ వల్ల ఫొటోలు పొరపాటున పంపబడే అవకాశం లేదని గుర్తుంచుకోవాలి. మనం ఎంపిక చేసి పంపితేనే అవి ఎదుటివారికి చేరతాయి.

అందరికీ ఎప్పుడంటే?

WABetaInfo సమాచారం ప్రకారం.. తాజా వాట్సప్ వెర్షన్ వాడుతున్న కొంతమంది బీటా యూజర్లకు ఈ ఫీచర్ అందుతోంది. ఆండ్రాయిడ్, iOS యూజర్లకు దశలవారీగా విడుదల చేస్తున్నట్లు తెలుస్తోంది. అయితే, అందరికీ ఎప్పటిలోగా అందుబాటులోకి వస్తుందనే విషయంపై మెటా ఇంకా స్పష్టత ఇవ్వలేదు. మీ ఫోన్‌లో ఈ ఆప్షన్ కనిపించకపోతే యాప్‌ను అప్‌డేట్ చేసి కొంతకాలం వేచి చూడండి. రోజూ కుటుంబ సభ్యులు, స్నేహితులతో ఫొటోలు పంచుకునేవారికి ఈ మార్పు ఉపయోగపడొచ్చు. ముఖ్యంగా స్క్రీన్‌షాట్ లేదా కొత్తగా తీసిన ఫొటో కోసం గ్యాలరీలో వెతకాల్సిన సమయం తగ్గుతుంది.

Also Read: రూ.18 వేల ఖర్చుకి రూ.50 వేల బాదుడా? iPhone 18 Pro స్టోరేజ్ వెనుక యాపిల్ సీక్రెట్ దందా!