Assembly Meetings: ఈ నెల 29 నుంచి అసెంబ్లీ సమావేశాలు.. ఎంపీటీసీ, జడ్పీటీసీ ఎన్నికలపై కీలక నిర్ణయం

ముఖ్యమంత్రి రేవంత్ రెడ్డి అధ్యక్షతన సచివాలయంలో జరిగిన మంత్రుల కీలక సమావేశం ముగిసింది. రాష్ట్ర ప్రయోజనాలకు సంబంధించిన పలు కీలక అంశాలపై ఈ భేటీలో సుదీర్ఘంగా చర్చించారు. ప్రధానంగా నీటి పారుదల రంగానికి సంబంధించిన అంశాలు, కేంద్రం వద్ద పెండింగ్‌లో ఉన్న ప్రాజెక్టులు మరియు రాజకీయ పరిణామాలపై ప్రభుత్వం ఒక స్పష్టమైన కార్యాచరణను సిద్ధం చేసింది.

ప్రధాన చర్చ వీటి పైనే..

ఈ సమావేశంలో కృష్ణా మరియు గోదావరి నదీ జలాల పంపకాలు, ప్రాజెక్టుల నిర్వహణపై మంత్రులు లోతుగా చర్చించారు. రాష్ట్ర వాటాను కాపాడుకోవడంలో రాజీ పడకూడదని ప్రభుత్వం నిర్ణయించింది. ముఖ్యంగా కేంద్ర ప్రభుత్వం వద్ద పెండింగ్‌లో ఉన్న అంతర్రాష్ట్ర జల వివాదాలు, కొత్త ప్రాజెక్టులకు అనుమతుల సాధనపై ప్రత్యేక దృష్టి సారించాలని నిర్ణయించారు. ఉమ్మడి ప్రాజెక్టుల వద్ద తెలంగాణ హక్కులను కాపాడటమే లక్ష్యంగా ముందుకు సాగాలని అధికారులను ఆదేశించారు.

పెండింగ్ అంశాలపై ఫోకస్..

రాష్ట్రంలోని అసంపూర్తిగా ఉన్న నీటి పారుదల ప్రాజెక్టులను త్వరితగతిన పూర్తి చేయడంపై ముఖ్యమంత్రి దిశానిర్దేశం చేశారు. కేంద్ర ప్రభుత్వం నుంచి రావాల్సిన నిధులు, పర్యావరణ అనుమతులు మరియు విభజన చట్టంలోని హామీల అమలుపై కేంద్రంపై ఒత్తిడి తీసుకురావాలని మంత్రులు అభిప్రాయపడ్డారు. ప్రాజెక్టుల వారీగా ఉన్న సాంకేతిక సమస్యలను పరిష్కరించి, రైతులకు సాగునీరు అందించడమే ప్రథమ ప్రాధాన్యత అని సీఎం స్పష్టం చేశారు.

పాలనాపరమైన అంశాలతో పాటు రాష్ట్రంలోని రాజకీయ పరిణామాలపై కూడా చర్చ సాగింది. ఇటీవల జరిగిన సర్పంచ్ ఎన్నికల్లో ప్రభుత్వానికి ప్రజల నుంచి పూర్తిస్థాయి మద్దతు లభించిందని ముఖ్యమంత్రి రేవంత్ రెడ్డి ఈ సందర్భంగా వ్యాఖ్యానించారు. ప్రభుత్వ విధానాలు, సంక్షేమ పథకాలపై ప్రజలు నమ్మకం ఉంచారని, అదే ఉత్సాహంతో రాబోయే రోజుల్లో స్థానిక సంస్థలను మరింత బలోపేతం చేయాలని మంత్రులకు సూచించారు. గ్రామ స్థాయి నుంచి పాలనను మరింత పటిష్టం చేసేలా చర్యలు తీసుకోవాలని నిర్ణయించారు.

ALSO READ: Pawan Kalyan: యువత కోసమే జనసేన.. పదవి అంటే అధికారం కాదు బాధ్యత, పవన్ కీలక వ్యాఖ్యలు