Bus Accident: శ్రీశైలం డ్యామ్ వద్ద టీఎస్‌ఆర్టీసీ బస్సుకు పెను ప్రమాదం తప్పింది. శ్రీశైలం నుంచి మహబూబ్‌నగర్‌ వెళ్తున్న ఆర్టీసీ బస్సు జలాశయం వద్దకు రాగానే మలుపు వద్ద అదుపుతప్పింది. డ్రైవర్‌ బస్సు వేగాన్ని నియంత్రించలేకపోయాడు. దీంతో ఘాట్‌రోడ్‌ రక్షణ గోడను బస్సు ఢీకొట్టింది. ఈ ప్రమాదంలో రక్షణ గోడ ధ్వంసమైంది. అయితే ఇనుప బారికేడ్‌ ఉండటంతో బస్సు లోయలో పడకుండా ఆగిపోయింది.
పెనుప్రమాదం త్రుటిలో తప్పడంతో బస్సులోని ప్రయాణికులు ఊపిరి పీల్చుకున్నారు. ప్రమాద సమయంలో బస్సులో 30 మంది ప్రయాణికులు ఉన్నారు. బస్సు ఘూట్ రోడ్డు రక్షణగోడను ఢీకొట్టగానే తీవ్ర భయాందోళనకు గురయ్యారు. ఆ తర్వాత తేరుకుని వెంటనే బస్సు నుంచి కిందకు దిగిపోయారు. శ్రీశైలం జలాశయానికి ఇరువైపులా ఉన్న ఘాట్‌రోడ్‌ మలుపుల వద్ద రక్షణ గోడలు బలహీనంగా ఉన్నాయి. ఇనుప బారికేడ్‌ ఉండటంతో పెనుప్రమాదం తప్పింది. 30 మంది ప్రయాణికులు ప్రాణాలతో బయటపడ్డారు.
ఘాట్ రోడ్డు రక్షణ గోడలను పటిష్టం చేయాల్సిన అవసరం ఉంది. వాహనాలు వేగంగా వెళ్లకుండా డ్రైవర్లు జాగ్రత్తలు పాటించాలి. లేకపోతే ఈ ఘాట్ రోడ్డులో ప్రమాదాలు జరిగే అవకాశాలు ఎక్కువగా ఉన్నాయి. బస్సులాంటి పెద్ద వాహనాలు ఘాట్ రోడ్డు గూండా ప్రయాణం ఓ సాహసం మారుతోంది. ప్రయాణికులు ప్రాణాలు అరచేతిలో పెట్టుకుని ప్రయాణించాల్సిన పరిస్థితులు ఎదురవుతున్నాయి. ఇక ముందు ఇలాంటి ప్రమాదాలు జరగకుండా జాగ్రత్తలు తీసుకోవాలి. అలాగే కార్లు లాంటి వాహనాలు పరిమిత వేగంతో వెళ్లాలని తాజా ప్రమాదం హెచ్చరిస్తోంది.