CM Revanth Reddy: డబ్బుతో కాదు.. నమ్మకంతో గెలవండి.. అభ్యర్థులకు సీఎం రేవంత్ రెడ్డి దిశానిర్దేశం

CM Revanth Reddy: కరీంనగర్ జిల్లా చొప్పదండి నియోజకవర్గంలో ముఖ్యమంత్రి రేవంత్ రెడ్డి పర్యటించి, పలు అభివృద్ధి పనులకు శంకుస్థాపన చేశారు. ఈ సందర్భంగా ఆయన కాంగ్రెస్ పార్టీ అభ్యర్థులను ఉద్దేశించి ప్రసంగం చేశారు. రాబోయే ఎన్నికలు కేవలం నాయకులవి మాత్రమే కాదని, ఇవి క్షేత్రస్థాయిలో కష్టపడే కార్యకర్తల ఎన్నికలని ఆయన స్పష్టం చేశారు. కార్యకర్తలకు పార్టీలో సముచిత స్థానం దక్కినప్పుడే వ్యవస్థ బలపడుతుందని, నాయకులు ఈ ఎన్నికలను అత్యంత ప్రతిష్టాత్మకంగా తీసుకోవాలని పిలుపునిచ్చారు. అధికార పార్టీలో టికెట్ ఆశించే వారు ఎక్కువగా ఉండటం సహజమని, ఎంతో మంది పోటీ పడినా బీ-ఫామ్ దక్కించుకోవడం అభ్యర్థుల అదృష్టమని ఆయన పేర్కొన్నారు.

ప్రభుత్వ విజయాలను వివరిస్తూ.. గత పదేళ్లలో మునుపటి ప్రభుత్వం రేషన్ కార్డుల ఊసే ఎత్తలేదని, కానీ తమ ప్రభుత్వం అధికారంలోకి వచ్చిన రెండేళ్లలోనే అర్హులైన ప్రతి ఒక్కరికీ రేషన్ కార్డులు అందించామని రేవంత్ రెడ్డి గుర్తు చేశారు. పేదలకు సన్న బియ్యం, 200 యూనిట్ల ఉచిత విద్యుత్, మహిళా సంఘాలకు సున్నా వడ్డీ రుణాలు, ఇందిరమ్మ ఇళ్లు మరియు ఆర్టీసీ బస్సుల్లో మహిళలకు ఉచిత ప్రయాణం వంటి పథకాలతో ప్రజల జీవితాల్లో వెలుగులు నింపామని తెలిపారు. పట్టణ ప్రాంతాల్లో ప్రభుత్వం అమలు చేసిన ఈ సంక్షేమ ఫలాలను ఇంటింటికీ తీసుకెళ్లాలని అభ్యర్థులకు సూచించారు. “మనం అబద్ధాలు చెప్పాల్సిన అవసరం లేదు, మనం చేసిన మంచిని చెబితే చాలు” అని ఆయన ధీమా వ్యక్తం చేశారు.

రాజకీయాల్లో గెలుపు అనేది కేవలం డబ్బుతో సాధ్యం కాదని, అది కేవలం ప్రజల నమ్మకంతోనే వస్తుందని ముఖ్యమంత్రి పేర్కొన్నారు. అభ్యర్థులు ఓటర్లలో నమ్మకాన్ని కలిగించాలని, అదే వారిని విజయతీరాలకు చేరుస్తుందని హితబోధ చేశారు. టికెట్ దక్కని వారిని కూడా కలుపుకుని, సమన్వయంతో ముందుకు వెళ్లాలని సూచించారు. ఈ పర్యటనలో భాగంగా రామడుగులో రూ. 45.15 కోట్లతో అడ్వాన్స్‌డ్ టెక్నాలజీ సెంటర్ (ATC) ఏర్పాటుకు మరియు గంగాధర మండలం మధురానగర్‌లో రూ. 5 కోట్లతో ప్రభుత్వ డిగ్రీ కళాశాల నిర్మాణానికి శంకుస్థాపన చేశారు. ఈ కార్యక్రమంలో మంత్రులు తుమ్మల నాగేశ్వర్ రావు, శ్రీధర్ బాబు, పొన్నం ప్రభాకర్, ఎమ్మెల్యేలు మరియు ఇతర ప్రజాప్రతినిధులు పాల్గొన్నారు.

Read Also: Municipal Elections 2026: ఓరుగల్లు మున్సిపాలిటీల్లో త్రిముఖ పోరు.. చేయి జారకుండా కాంగ్రెస్ జాగ్రత్తలు!