దిల్‌సుఖ్‌నగర్ సంతోషిమాత ఆలయంపై దాడి.. నిందితుడు అదుపులోకి!

Dilsukhnagar Temple: దిల్‌‌సుఖ్‌నగర్‌లోని సంతోషిమాత ఆలయంలో జరిగిన దాడి తీవ్ర దిగ్భ్రాంతిని, ఆగ్రహాన్ని కలిగిస్తోంది. పవిత్రమైన ప్రార్థనా స్థలంలోకి ప్రవేశించి పూజారిపై, అమ్మవారి విగ్రహంపై దాడికి ఒడిగట్టడం ఏమాత్రం సహించరాని నేరం. సమాజంలో శాంతి, సామరస్యాలను దెబ్బతీసేలా ఉన్న ఈ ఘటనపై సర్వత్రా నిరసన వ్యక్తమవుతోంది.

ఆలయంలో ఏం జరిగింది?

దిల్‌సుఖ్‌నగర్ బస్ డిపో సమీపంలో ఉన్న సంతోషిమాత ఆలయంలో శుక్రవారం ఉదయం సుమారు 10 గంటల ప్రాంతంలో ఈ ఘోరం చోటుచేసుకుంది. ఒక వ్యక్తి చేతిలో కర్రతో ఆలయంలోకి ప్రవేశించి, మతపరమైన నినాదాలు చేస్తూ పూజారిపై దాడికి తెగబడ్డాడు. అంతటితో ఆగకుండా అమ్మవారి విగ్రహాన్ని ధ్వంసం చేసేందుకు యత్నించాడు. అప్రమత్తమైన భక్తులు వెంటనే అతడిని అడ్డుకుని, పట్టుకుని పోలీసులకు అప్పగించారు. ఈ దృశ్యాలన్నీ ఆలయంలోని సీసీటీవీ కెమెరాల్లో స్పష్టంగా రికార్డయ్యాయి.

పోలీసుల దర్యాప్తు.. అదుపులోకి నిందితుడు

సమాచారం అందుకున్న వెంటనే చైతన్యపురి పోలీసులు సంఘటనా స్థలానికి చేరుకుని పరిస్థితిని సమీక్షించారు. దాడికి పాల్పడిన వ్యక్తిని మహమ్మద్ అన్సారీగా గుర్తించి అదుపులోకి తీసుకున్నారు. సీసీటీవీ ఫుటేజీ ఆధారంగా నిందితుడి కదలికలను, ఈ దాడి వెనుక ఉన్న అసలు ఉద్దేశాన్ని పోలీసులు తీవ్రంగా విచారిస్తున్నారు. ప్రస్తుతం ప్రాంతంలో పరిస్థితి అదుపులోనే ఉందని చైతన్యపురి ఇన్‌స్పెక్టర్ తెలిపారు.

చట్టప్రకారం కఠిన చర్యలు అవసరం

పట్టపగలే గుడిలోకి వచ్చి దాడికి తెగబడటంపై భక్తులు, హిందూ సంఘాలు తీవ్ర ఆగ్రహం వ్యక్తం చేస్తున్నాయి. బాధ్యులపై చట్టప్రకారం కఠిన చర్యలు తీసుకోవాలని డిమాండ్ చేస్తున్నాయి. ప్రార్థనా స్థలాల భద్రతను ప్రభుత్వం మరింత కట్టుదిట్టం చేయాలి. మత విశ్వాసాలను గౌరవిస్తూ, ఆలయాలను కాపాడుకుంటూ సమాజంలో శాంతి, సామరస్యాలను కాపాడుకోవడం మనందరి బాధ్యత.

Also Read: కొడంగల్‌లో కాదు.. ధైర్యముంటే ముందు సిరిసిల్లలో గెలువు! కేటీఆర్‌కు ఐలయ్య ఓపెన్ ఛాలెంజ్