Rains : తెలంగాణలో మరో 3 రోజులు భారీ వర్షాలు..

Rains : తెలంగాణలో వర్షాలు ఆగడంలేదు. వరుణుడు తగ్గేదేలే అంటున్నాడు. 6 రోజులుగా రాష్ట్రవ్యాప్తంగా వానలు పడుతున్నాయి. మంగళవారం నుంచి ఇదే పరిస్థితి నెలకొంది. గురు, శుక్రవారాల్లో వర్షాలు భారీగా ముంచెత్తాయి. శని, ఆదివారాలు వరుణుడు కాస్త శాంతించాడు. కానీ మరో 3రోజులు భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం ప్రకటించింది.

ఈ నెల 25, 26 తేదీల్లో భారీ నుంచి అతి భారీ వర్షాలు రాష్ట్రంలో అక్కడక్కడా కురిసే అవకాశం ఉందని వాతవారణశాఖ అధికారులు తెలిపారు. వచ్చే మంగళ, బుధవారాల్లో వానలు జోరుగా కురుస్తాయని ప్రకటించారు. ఆరెంజ్‌ హెచ్చరికలు జారీ చేశారు.

బంగాళాఖాతంలో ఏర్పడిన ఆవర్తనం దక్షిణ ఒడిశా పరిసరాలలో సగటు సముద్రమట్టం నుంచి 3.1 కిలోమీటర్ల ఎత్తులో కొనసాగుతోందని వాతావరణశాఖ పేర్కొంది. షియర్ జోన్ 20°N అక్షాంశం వెంబడి సగటు సముద్ర మట్టం నుంచి 3.1 కిలోమీటర్ల – 5.8 కిలోమీటర్ల ఎత్తులో కొనసాగుతోందని తెలిపింది. ఈ నెల 24న దక్షిణ ఒడిశా – ఉత్తర ఆంధ్రా దగ్గరలోని వాయవ్య బంగాళాఖాతం పరిసరాల్లో అల్పపీడనం ఏర్పడే అవకాశం ఉందని వెల్లడించింది. దీంతో గంటకు 40 నుంచి 50 కిలోమీటర్ల వేగంతో గాలులు వీచే అవకాశం ఉందని వాతావరణశాఖ హెచ్చరించింది. అలాగే భారీ వర్షాలు కురుస్తాయని పేర్కొంది.

Share

• 
• 
• 
• 
• 
•