హైదరాబాద్‌ వాన బీభత్సం.. సీఎం రేవంత్ రెడ్డి విమానం దారి మళ్లింపు.. ఎక్కడికంటే?

Revanth Reddy: హైదరాబాద్‌లో హఠాత్తుగా మారిన వాతావరణం, కురుస్తున్న భారీ వర్షాలు ప్రయాణికులను తీవ్ర ఇబ్బందులకు గురిచేస్తున్నాయి. సాధారణ ప్రజలకే కాదు, సాక్షాత్తూ రాష్ట్ర ముఖ్యమంత్రికి కూడా ఈ వాతావరణం వల్ల ప్రయాణంలో అంతరాయం తప్పలేదు. తెలంగాణ సీఎం రేవంత్ రెడ్డి ప్రయాణిస్తున్న విమానం వాతావరణం అనుకూలించకపోవడంతో బెంగళూరుకు మళ్లించాల్సి వచ్చింది.

ముఖ్యమంత్రి రేవంత్ రెడ్డి ఢిల్లీ పర్యటన ముగించుకుని శుక్రవారం సాయంత్రం 6:30 గంటల ప్రాంతంలో ఇండిగో విమానంలో హైదరాబాద్‌కు తిరుగుపయనమయ్యారు. షెడ్యూల్ ప్రకారం ఈ విమానం శంషాబాద్‌లోని రాజీవ్ గాంధీ అంతర్జాతీయ విమానాశ్రయంలో ల్యాండ్ కావాల్సి ఉంది. అయితే, అదే సమయంలో హైదరాబాద్ నగరంతో పాటు విమానాశ్రయ పరిసర ప్రాంతాల్లో ఒక్కసారిగా ఈదురుగాలులతో కూడిన భారీ వర్షం ముంచెత్తింది.

దీంతో శంషాబాద్ ఎయిర్‌పోర్టులో విమానాల ల్యాండింగ్‌కు రన్‌వే అనుకూలంగా లేకపోవడంతో పాటు విజిబిలిటీ (కనిపించే సామర్థ్యం) బాగా తగ్గిపోయింది. ప్రమాదాలు జరగకుండా అప్రమత్తమైన ఎయిర్ ట్రాఫిక్ కంట్రోల్ (ATC) అధికారులు, సీఎం ప్రయాణిస్తున్న విమానానికి శంషాబాద్‌లో ల్యాండింగ్‌కు అనుమతి నిరాకరించారు. పైలట్లకు ప్రత్యామ్నాయ మార్గాన్ని సూచిస్తూ, విమానాన్ని సురక్షితంగా బెంగళూరుకు దారి మళ్లించారు.

ప్రస్తుతం హైదరాబాద్ నగరంలోని పలు ప్రాంతాల్లో కుండపోత వర్షం కురుస్తోంది. కాగా తెలంగాణ ముఖ్యమంత్రి రేవంత్ రెడ్డి బెంగళూరులో వాతావరణ పరిస్థితులు, ఇంధన లభ్యత తదితర అంశాలను పరిశీలించిన అనంతరం విమానం హైదరాబాద్‌కు తిరిగి బయలుదేరే అవకాశముందని అధికారులు తెలిపారు. వాతావరణం ప్రతికూలంగా మారినప్పుడు విమానాల భద్రత దృష్ట్యా ఏటీసీ అధికారులు ఇలాంటి నిర్ణయాలు తీసుకోవడం సర్వసాధారణం. అయితే సీఎం విమానం దారి మళ్లడంతో ఒక్కసారిగా ఇటు అధికార వర్గాల్లో, అటు ప్రజల్లో ఈ వార్త ఆసక్తికరంగా మారింది.

Also Read: మియాపూర్‌లో విషాదం.. చిన్నారితో ఆరో అంతస్తు నుంచి దూకిన మహిళ