భాగ్యనగర వాసులు ఎప్పుడెప్పుడా అని ఎదురుచూసే చారిత్రాత్మక ‘నుమాయిష్’ మరోసారి సందడి చేసేందుకు సిద్ధమైంది. 2026 నూతన సంవత్సరం కానుకగా జనవరి 1వ తేదీన నాంపల్లి ఎగ్జిబిషన్ గ్రౌండ్స్లో ఈ ప్రదర్శన ఘనంగా ప్రారంభం కానుంది. ఫిబ్రవరి 15వ తేదీ వరకు సుమారు 46 రోజుల పాటు ఈ మేళా కొనసాగనుంది.
ఈ ఏడాది కూడా సామాన్యులకు అందుబాటులో ఉండేలా ప్రవేశ రుసుమును నిర్ణయించారు. పెద్దలకు ఎంట్రీ ఫీజు 40 రూపాయలు కాగా.. 5 ఏళ్ల లోపు చిన్నారులకు, సీనియర్ సిటిజన్లకు, దివ్యాంగులకు ప్రవేశం పూర్తిగా ఉచితంగా ఉంటుంది. ప్రదర్శన సమయాల విషయానికి వస్తే.. సోమవారం నుండి శుక్రవారం వరకు సాయంత్రం 4:00 గంటల నుండి రాత్రి 10:30 గంటల వరకు ఉంటుంది. వారాంతాల్లో (శని, ఆదివారాల్లో) రద్దీని దృష్టిలో ఉంచుకుని రాత్రి 11:00 గంటల వరకు అనుమతిస్తారు.
ఎగ్జిబిషన్ గ్రౌండ్స్ లోపల కార్లు, ద్విచక్ర వాహనాలకు పార్కింగ్ ఉచితం. బయట ఇతర ప్రాంతాల్లో పార్కింగ్ చేసే వారు కారుకు రూ.50, బైక్కు రూ.20 చెల్లించాల్సి ఉంటుంది. గాంధీ భవన్ ఎదురుగా ఉన్న ప్రభుత్వ జూనియర్ కళాశాల ప్రాంగణంలో కూడా పార్కింగ్ సదుపాయం కల్పించారు. అయితే, ఎగ్జిబిషన్ పరిసరాల్లోని ఖాళీ స్థలాలను లీజుకు తీసుకున్నామని చెబుతూ కొందరు మోసగాళ్లు అధిక ధరలు వసూలు చేసే అవకాశం ఉన్నందున, సందర్శకులు అప్రమత్తంగా ఉండాలని నిర్వాహకులు సూచించారు.
దాదాపు 23 ఎకరాల విస్తీర్ణంలో ఏర్పాటు చేస్తున్న ఈ ప్రదర్శనలో దేశవ్యాప్తంగా వివిధ రాష్ట్రాల నుంచి స్టాల్స్ రానున్నాయి. కాశ్మీర్ డ్రై ఫ్రూట్స్ నుండి లక్నో చికెన్ కర్రీ వరకు, ఇరానీ చాయ్ నుండి స్థానిక హస్తకళల వరకు అన్నీ ఒకే చోట లభిస్తాయి. షాపింగ్ ప్రియులకే కాకుండా పిల్లల కోసం రకరకాల రైడ్స్, టాయ్ ట్రైన్, సాంస్కృతిక కార్యక్రమాలు ప్రత్యేక ఆకర్షణగా నిలవనున్నాయి.
హైదరాబాద్ వారసత్వానికి ప్రతీకగా నిలిచే ఈ నుమాయిష్ను సందర్శించడం ఒక ప్రత్యేక అనుభూతి. నగర పర్యటనకు వచ్చే పర్యాటకులు తప్పనిసరిగా సందర్శించాల్సిన వేడుక ఇది. మరిన్ని వివరాల కోసం 040-24603015 లేదా +91 9642356746 నంబర్లను సంప్రదించవచ్చు.
Share
Eng - Aus 4th Test: చెలరేగిన బౌలర్లు.. ఒక్కరోజే 20 వికెట్లు డౌన్
Railway Charges: రైల్వే ఛార్జీల పెంపు నేటి నుంచే.. ఈ టికెట్లకు మినహాయింపు
