IMD Alert: మళ్లీ మబ్బులు, చినుకులు.. హైదరాబాద్ కు భారీ వర్షసూచన!

IMD Alert: ఎండలతో బేజారు.. వేడిగాలులతో అవస్థలు పడుతున్నారా? అయితే మీకోసమే భారత వాతావరణ శాఖ కీలక ప్రకటన చేసింది. దీనితో ఆ నగరంలో పెద్ద ఎత్తున వాతావరణ మార్పు రానుంది. సమ్మర్ కు ముందే ఆ నగరానికి ఎండలు పలకరించగా, ఇప్పుడు మాత్రం కాస్త ఉపశమనం లభించే ప్రకటనను ఐఎండి విడుదల చేసింది. ఇంతకు భారీ ఉపశమనం పొంది, వర్షాల రుచి చూసే నగరం ఏదో కాదు హైదరాబాద్ నగరమే.

హైదరాబాద్ నగరవాసులకు కొంత ఉపశమనం లభించనుంది. రుతుపవనాలకు ముందు వర్షాలు నగరంపై దూసుకొస్తున్నట్లు భారత వాతావరణ శాఖ (IMD) తాజాగా స్పష్టం చేసింది. జూన్ 7, 8 తేదీల్లో మేఘావృతమైన ఆకాశం కనిపించనుండగా, మోస్తరు వర్షాలు పడే అవకాశాలు ఎక్కువగా ఉన్నాయని అధికారులు తెలిపారు. అంతేకాకుండా, జూన్ 9న కూడా తేలికపాటి వర్షం, చినుకులు పడే అవకాశం ఉందని చెప్పారు.

వర్షాల తాకిడికి.. జై చెప్పే హైదరాబాదీలు
ఈ వేసవిలో ఎండలు ఎలా ఇబ్బందులు పెట్టాయో ప్రత్యేకంగా చెప్పనవసరం లేదు. గరిష్ట ఉష్ణోగ్రతలు 40 డిగ్రీలకు చేరుకున్న రోజులూ చాలా ఉన్నాయి. ఈ నేపథ్యంలో, ఇప్పుడిపుడే మబ్బులు కమ్ముకుంటుండటంతో, నగరవాసులు కాస్త ఊపిరి పీల్చుకుంటున్నారు. మేఘావృతమైన వాతావరణం, స్వల్ప వర్షాలు, ఇవి నగరానికి తాత్కాలిక ఉపశమనమే అయినా, ప్రజలకు కాస్త ఊరట లభించిందని చెప్పవచ్చు.

జూన్ 10,11.. మళ్ళీ ఉష్ణోగ్రతలు పెరుగుతాయా?
వాతావరణ శాఖ ప్రకారం, జూన్ 10 నుండి నగరంలో పాక్షికంగా మేఘావృతమైన ఆకాశం ఉండొచ్చు. ఉరుములతో కూడిన పరిణామాలు సంభవించే అవకాశం ఉంది. అయితే, జూన్ 11 నాటికి గరిష్ట ఉష్ణోగ్రతలు తిరిగి 37 డిగ్రీల సెల్సియస్‌కి చేరే అవకాశముందని అధికారులు హెచ్చరిస్తున్నారు. అంటే మరోసారి వేడి మళ్లీ పట్టేసే సూచనలు కనిపిస్తున్నాయి.

వర్షం పడినా.. మీ డైలీ రొటీన్‌కి అంతరాయం లేదు
రుతుపవనాలకు ముందు వర్షాలు సాధారణంగా తేలికపాటి నుండి మోస్తరు స్థాయిలో ఉంటాయి. ఇవి ఎండ నుంచి ఉపశమనం ఇస్తాయే కానీ, రోజువారీ కార్యాచరణకు పెద్దగా ఆటంకం కలిగించేలా ఉండవు. ముఖ్యంగా మధ్యాహ్నం లేదా రాత్రి వేళల్లో వర్షాలు పడే అవకాశముందని వాతావరణ శాఖ పేర్కొంది. అందువల్ల, పని చేసేవారు, స్కూల్‌కి వెళ్లే పిల్లలు, బస్ – ట్రైన్ ప్రయాణికులు చిన్న గొడుగు, రైన్‌కోట్‌ను తీసుకెళ్లడం మంచిది.

Also Read: Chenab Rail Bridge: చలిలో గడ్డకట్టి.. వర్షంలో తడిసి.. కూలీలు కట్టిన అద్భుతమే.. చీనాబ్!

రహదారుల పరిస్థితిపై జాగ్రత్తలు అవసరం
హైదరాబాద్‌లో వర్షాలు పడితే రహదారుల పరిస్థితి ఎలా ఉంటుందో అందరికీ తెలిసిన సంగతే. ముఖ్యంగా బంజారాహిల్స్, లక్డికాపూల్, అబిడ్స్ ప్రాంతాల్లో చిన్న వానకే నీరు చేరి ట్రాఫిక్ నిలిచిపోవడం మామూలే. దీంతో GHMC ఇప్పటికే ముందస్తు ఏర్పాట్లు చేస్తున్నట్టు సమాచారం. డ్రైనేజీ లైన్లను శుభ్రం చేయటం, నీటి నిలువలకు వెంటనే స్పందించే కంట్రోల్ రూం ఏర్పాటు వంటి చర్యలు చేపట్టారు.

రుతుపవనాల రాకకు ఇది సంకేతమేనా?
ఈ రకమైన మేఘాలు, తేలికపాటి వర్షాలు, ఇవన్నీ రుతుపవనాల రాకకు సంకేతాలుగానే భావిస్తున్నారు వాతావరణ నిపుణులు. సాధారణంగా జూన్ రెండవ వారంలో రుతుపవనాలు ఆంధ్రా, తెలంగాణ రాష్ట్రాలపైకి ప్రవేశిస్తాయి.

ప్రజల కోసం కొన్ని సూచనలు
వర్షం ఎప్పుడైనా పడొచ్చు కాబట్టి బయటికి వెళ్లేటప్పుడు గొడుగు లేదా రైన్‌కోట్ వెంట ఉంచుకోండి. ట్రాఫిక్ జామ్‌లు సాధారణమే, వర్షం కురిసే రోజుల్లో ముందస్తుగా ప్రణాళిక చేసుకుని బయల్దేరండి. వర్షపు నీటిలో నడవద్దు. దుర్వాసన, రోగాల వ్యాప్తికి అవకాశం ఉంటుంది. తడి ప్రాంతాల్లో విద్యుత్ లైన్ల దగ్గర జాగ్రత్త పాటించండి.

వర్షాలు పడతాయి, మళ్లీ వేడి పెరగడం ఇది సహజ ప్రక్రియ. కానీ మన ఆరోగ్యం, ట్రావెలింగ్, పనులపై వీటి ప్రభావాన్ని తగ్గించుకోవాలంటే మనం ముందు జాగ్రత్తలు తీసుకోవాలి. ఇప్పుడు వర్షం వస్తుందంటే, ఆనందం పంచుకోవడం సరే.. కానీ సురక్షితంగా ఉండడం మరింత ముఖ్యం. అందుకే.. హైదరాబాద్ వాసులు సిద్ధంగా ఉండండి.. వర్షపు చినుకులు కురిసే ఈ వారం ప్రత్యేకంగా ఉండబోతోంది!