Jagga Reddy: ప్రజల కోసం పని చేయండి మోదీ , అమిత్ షాలపై జగ్గారెడ్డి ఫైర్

Jagga Reddy: కాంగ్రెస్ ఆవిర్భావ దినోత్సవ వేడుకలు సందర్భంగా కాంగ్రెస్ సీనియర్ నేత జగ్గారెడ్డి చేసిన వ్యాఖ్యలు.. రాజకీయ వర్గాల్లో తీవ్ర చర్చకు దారితీశాయి. దేశ రాజకీయ చరిత్రను గుర్తు చేస్తూ, బీజేపీపై ఆయన చేసిన ఘాటు వ్యాఖ్యలు కార్యకర్తల్లో ఉత్సాహాన్ని నింపాయి. కాంగ్రెస్ పార్టీకి ఉన్న సుదీర్ఘ చరిత్ర, స్వాతంత్య్ర పోరాటంలో పోషించిన పాత్రను గుర్తు చేస్తూ జగ్గారెడ్డి మాట్లాడారు.

కాంగ్రెస్ పార్టీకి 140 ఏళ్ల ఘనమైన చరిత్ర ఉందని, దేశ స్వాతంత్య్రం కోసం.. ఎందరో మహానుభావులు తమ ప్రాణాలను అర్పించారని ఆయన గుర్తు చేశారు. స్వాతంత్య్ర ఉద్యమం నుంచి రాజ్యాంగ నిర్మాణం వరకు, దేశాన్ని ఆధునిక భారతదేశంగా తీర్చిదిద్దడంలో కాంగ్రెస్ కీలక పాత్ర పోషించిందని స్పష్టం చేశారు. నెహ్రూ, గాంధీ కుటుంబం మాత్రమే కాదు, దేశ నలుమూలల నుంచి వచ్చిన అనేకమంది నాయకులు కాంగ్రెస్ వేదికపై నిలబడి దేశ భవిష్యత్తును నిర్ణయించారని తెలిపారు.

ఇదే సందర్భంలో బీజేపీపై తీవ్ర విమర్శలు గుప్పించారు. బీజేపీ పార్టీ పుట్టి కేవలం 40 ఏళ్లే అయ్యాయని, అలాంటి పార్టీ కాంగ్రెస్‌ను విమర్శించడం హాస్యాస్పదమని వ్యాఖ్యానించారు. కాంగ్రెస్ పార్టీతో పోలిస్తే బీజేపీ ముని మనవడు లాంటి పార్టీ అని ఎద్దేవా చేశారు. తాతకు, ముత్తాతకు దగ్గు నేర్పినట్లు బీజేపీ వ్యవహరిస్తోందని, చరిత్రను మరిచి మాట్లాడటం సరైంది కాదని అన్నారు.

పార్లమెంటులో ప్రధాని నరేంద్ర మోదీ, కేంద్ర హోం మంత్రి అమిత్ షా చేసే వ్యాఖ్యలు.. ఆశ్చర్యకరంగా ఉన్నాయని జగ్గారెడ్డి అన్నారు. దేశ స్వాతంత్య్ర ఉద్యమంలో బీజేపీ నాయకుల పాత్ర ఏమిటని ప్రశ్నించారు. స్వాతంత్య్రం వచ్చిన సమయంలో మోదీ, అమిత్ షా చిన్నపిల్లలుగా ఉన్నారని, అలాంటి వారు ఇప్పుడు కాంగ్రెస్ పార్టీపై విమర్శలు చేయడం విచిత్రంగా ఉందని అన్నారు.

కాంగ్రెస్ పార్టీ దేశాన్ని ఏకం చేసిన పార్టీ అని, భిన్న భాషలు, సంస్కృతులు, మతాలు, వర్గాలను కలిపి ఉంచిన ఘనత కాంగ్రెస్‌కే దక్కుతుందని జగ్గారెడ్డి స్పష్టం చేశారు. రాజ్యాంగ విలువలు, లౌకికత, సామాజిక న్యాయం అనే మూలసిద్ధాంతాలపై కాంగ్రెస్ ఎప్పుడూ రాజీపడలేదని చెప్పారు. అదే సమయంలో బీజేపీ దేశాన్ని విభజించే రాజకీయాలు చేస్తోందని విమర్శించారు.

కాంగ్రెస్ హయాంలోనే ప్రజాస్వామ్యం బలపడిందని, ప్రజల హక్కులు కాపాడబడ్డాయని తెలిపారు. ఉపాధి, విద్య, ఆరోగ్యం, సంక్షేమ పథకాలు అన్ని రంగాల్లో.. కాంగ్రెస్ పాలనలోనే దేశం ముందడుగు వేసిందని గుర్తు చేశారు. బీజేపీ మాత్రం చరిత్రను వక్రీకరిస్తూ, ప్రజలను తప్పుదోవ పట్టించే ప్రయత్నం చేస్తోందని ఆరోపించారు.

Also Read: “మా నాన్న ఎవరో తెలుసా” అంటే కుదరదు.. కోర్టులోనే కలుద్దాం: సీపీ సజ్జనార్ మాస్ వార్నింగ్!

కాంగ్రెస్ ఆవిర్భావ దినోత్సవం కేవలం వేడుక మాత్రమే కాదని, దేశ ప్రజాస్వామ్యాన్ని కాపాడుకునే సంకల్పాన్ని పునరుద్ఘాటించే రోజు అని జగ్గారెడ్డి అన్నారు. రానున్న రోజుల్లో కాంగ్రెస్ మరింత బలంగా ప్రజల మధ్యకు వెళ్లి, బీజేపీ విధానాలను ఎండగడుతుందని స్పష్టం చేశారు. దేశ భవిష్యత్తును రక్షించాలంటే కాంగ్రెస్ పార్టీ మళ్లీ అధికారంలోకి రావాల్సిన అవసరం ఉందని ఆయన పిలుపునిచ్చారు.