సీఎం రేవంత్ రెడ్డికి.. సంచలన లేఖ రాసిన కల్వకుంట్ల కవిత!

OBC Census: జనగణనలో ఓబీసీ కులగణన కాలమ్ చేర్చాలని కోరుతూ తెలంగాణ రాష్ట్ర అసెంబ్లీ, కౌన్సిల్ లో తీర్మానం చేయాలని తెలంగాణ రక్షణ సేన అధ్యక్షులు కల్వకుంట్ల కవిత డిమాండ్ చేశారు. సీఎం కి ఆదివారం బహిరంగ లేఖ రాశారు. ఆదివాసీల మతాన్ని నమోదు చేయడానికి జనగణనలో ప్రత్యేక కాలమ్ ఏర్పాటు చేయాలని అసెంబ్లీ, కౌన్సిల్ లో తీర్మానం చేయాలని డిమాండ్ చేశారు. డిసెంబర్ నుంచి ఇంటింటి జనగణన ప్రారంభమవుతున్న నేపథ్యంలో తెలంగాణ ప్రభుత్వం స్పందించాలని కోరారు. దేశానికి స్వాతంత్ర్యం వచ్చి 75 ఏళ్లు గడిచినా బీసీలకు జనాభా దామాషా దక్కాల్సిన ఫలాలు అందడం లేదన్నారు. దేశవ్యాప్తంగా ఓబీసీలు ఎంత మంది ఉన్నారనే దానిపై చట్టబద్దమైన లెక్కలు లేకపోవడంతోనే వారికి ఫలాలు దక్కడం లేదని తెలిపారు.

జనగణనలో..

జనగణనలో ఎస్సీ, ఎస్టీలను లెక్కించినట్టుగానే ఓబీసీలను లెక్కించాల్సిన అవసరం ఉందన్నారు. జనగణనలో కులాన్ని నమోదు చేసేందుకు ప్రత్యేక కాలమ్ ఉన్నప్పటికీ.. వారంతా ఓబీసీలకు చెందుతారని చెప్పడానికి ఎలాంటి కాలమ్ లేదని తెలిపారు. ఫలితంగా ఓబీసీ కులాల వారిని ఇతరుల కేటగిరిలో చేర్చుతారని.. ఫలితంగా ఓబీసీల జనాభా ఎంత అనే దానిపై స్పష్టత లేకుండా పోతుందన్నారు. జనగణనలో ఓబీసీలను లెక్కించాలని డిమాండ్ చేస్తూ దేశవ్యాప్తంగా అనేక ఓబీసీ సంఘాలు ఆందోళనలు చేపట్టాయని వివరించారు. వారి ఆందోళనలను పరిగణలోకి తీసుకొని జనగణనలో ఓబీసీ కులాలను లెక్కించే ప్రత్యేక కాలమ్ ఏర్పాటు చేయాలని కోరుతూ వెంటనే తెలంగాణ అసెంబ్లీని, కౌన్సిల్ ను సమావేశాలు ఏర్పాటు చేయాలన్నారు.

ప్రత్యేక మతంగా నమోదు..

దేశ మూలవాసులైన ఆదివాసీలది ప్రత్యేక జీవన శైలిని అని గుర్తు చేశారు. ప్రకృతిని, అడవిని తమ వేల్పుగా పూజించడం ఆదివాసీల ప్రత్యేకత అని తెలిపారు. ఒక్కో ఆదివాసీ తెగ ఒక్కో దేవతను, చెట్టును, పక్షిని, జంతువును పూజిస్తాయని.. గతంలో చేపట్టిన జనగణనలో వారిని ప్రత్యేక మతంగా నమోదు చేసే వారని తెలిపారు. జనగణనలో ఆదివాసీల మతం నమోదుకు ప్రత్యేక కాలమ్ లేకపోవడంతో ఆయా వర్గాల వారు ఆందోళనలో ఉన్నారని చెప్పారు. ఓబీసీల జనాభా లెక్క తేలాలన్నా, ఆదివాసీల మతాన్ని ప్రత్యేకంగా నమోదు చేయాలన్నా కేంద్ర ప్రభుత్వంపై ఒత్తిడి పెంచాల్సిన అవసరం ఉందన్నారు. ఇందుకోసం వెంటనే తెలంగాణ అసెంబ్లీ, కౌన్సిల్ ప్రత్యేక సమావేశాలు ఏర్పాటు చేసి ఓబీసీల కులగణన, ఆదివాసీల మతం నమోదుపై వేర్వేరు తీర్మానాలు చేసి కేంద్ర ప్రభుత్వానికి పంపాలని సూచించారు.

Also read: హైదరాబాద్‌లో అమిత్ షా పాదయాత్ర.. రేపు ఈ రూట్లో భారీగా ట్రాఫిక్ ఆంక్షలు!