Mehdipatnam accident: హైదరాబాద్ నగరంలో మంగళవారం ఘోర సంఘటన చోటుచేసుకుంది. మెహదీపట్నంలోని 5వ నంబర్ బస్ స్టాప్ వద్ద నిలిపివేసిన తెలంగాణ రాష్ట్ర రోడ్డు రవాణా సంస్థ (TGSRTC) బస్సు ఒక్కసారిగా మంటల్లో చిక్కుకుంది. అదృష్టవశాత్తూ ఈ ఘటనలో ఎవరికీ ప్రాణాపాయం కలగలేదు. అయితే బస్సు మొత్తం మంటల్లో కాలిపోయి బూడిదైపోయింది.
ప్రాథమిక సమాచారం ప్రకారం, మోయినాబాద్‌ రూట్ నంబర్ 288 లో నడుస్తున్న బస్సు మెహదీపట్నం బస్టాండ్‌కు చేరిన కొద్ది నిమిషాలకే ఈ ప్రమాదం జరిగింది. ఆ సమయంలో బస్సులో ఉన్న దాదాపు 40 మంది ప్రయాణికులు దిగిపోయారు. బస్సును అక్కడి నుండి తరలించడానికి డ్రైవర్ జునైద్ ఇగ్నిషన్ ఆన్ చేయగానే ముందు భాగంలో ఒక్కసారిగా మంటలు ఎగిసిపడ్డాయి.
డ్రైవర్ జునైద్, కనడక్టర్ మల్లేశ్ చాకచక్యంగా బయటకు దూకడంతో ఎలాంటి గాయాలు కాకుండా సురక్షితంగా బయటపడ్డారు. ఆ సమయానికి బస్సులో ఎవరూ లేకపోవడంతో ప్రాణ నష్టం జరగకపోవడం పెద్ద అదృష్టం. అయితే, కేవలం కొన్ని నిమిషాల్లోనే మంటలు బస్సు అంతటా వ్యాపించి, వాహనం మొత్తం కాలి బూడిదైంది.
వార్త తెలిసిన వెంటనే అగ్నిమాపక సిబ్బంది ఘటనాస్థలానికి చేరుకుని మంటలను అదుపులోకి తెచ్చారు. కానీ అప్పటికే బస్సు 76 శాతం వరకు దగ్ధం అయిపోయింది. ఈ ప్రమాదానికి గురైన బస్సు నంబర్ TS 07 UC 0279, మెహదీపట్నం డిపోకు చెందినదని RTC అధికారులు తెలిపారు.
మెహదీపట్నం పోలీసులు ఘటనాస్థలానికి చేరుకుని పరిస్థితిని సమీక్షించారు. ఎటువంటి ప్రాణ నష్టం జరగకపోవడం అదృష్టం. మంటలు అదుపులోకి వచ్చాయి. ప్రాథమికంగా షార్ట్ సర్క్యూట్ కారణంగానే ఈ అగ్ని ప్రమాదం జరిగిందని అంచనా వేస్తున్నాం. పూర్తి వివరాలు వెలుగులోకి రావడానికి దర్యాప్తు కొనసాగుతోందని పోలీసులు తెలిపారు.
RTC అధికారులు కూడా ఈ ఘటనపై సమగ్ర విచారణ చేపట్టారు. వాహనాల రిపేర్లు, విద్యుత్ వైర్ల మైన్టెనెన్స్ వంటి అంశాలపై దృష్టి సారించనున్నట్లు సమాచారం. బస్సు ప్రయాణించే ముందు టెక్నికల్ చెకప్ తప్పనిసరి అయినప్పటికీ, ఈ ఘటన తర్వాత మరింత జాగ్రత్తలు తీసుకోవాలని వారు నిర్ణయించారు.
ఈ ఘటన స్థానికులలో భయాందోళనలు రేపింది. ఉదయం పీక్ అవర్స్‌లో జరిగిన ఈ ప్రమాదం చూసి అక్కడి ప్రయాణికులు ఒక్కసారిగా ఆందోళనకు గురయ్యారు. కొంతసేపు బస్ స్టాప్ వద్ద రాకపోకలు ఆగిపోయాయి. తర్వాత పోలీసులు పరిస్థితిని నియంత్రించి ట్రాఫిక్‌ను మామూలు స్థితికి తీసుకువచ్చారు.
ఇక సోషల్ మీడియాలో ఈ ఘటన వీడియోలు వైరల్ అయ్యాయి. బస్సు ముందు భాగంలో ఒక్కసారిగా మంటలు ఎగిసిపడటం, చుట్టుపక్కల ప్రజలు భయంతో కేకలు వేయడం వంటి దృశ్యాలు నెటిజన్లలో ఆందోళన కలిగించాయి. పలు ప్లాట్‌ఫారమ్‌లలో ఈ వీడియోలు షేర్ అవుతూ RTC వాహనాల భద్రతపై చర్చలు మళ్లీ ఊపందుకున్నాయి.
Also Read: Viral Video: మెట్రో స్టేషన్ లో షాక్.. యెల్లో లైన్‌ దాటిన సెక్యూరిటీ.. అదే సమయంలో!
నగరంలో గతంలో కూడా RTC బస్సుల్లో ఇలాంటి అగ్ని ప్రమాదాలు జరగడం గమనార్హం. వాహనాల మైన్టెనెన్స్ లోపాలు, పాత బస్సుల వినియోగం, తగిన సమయానికి తనిఖీలు లేకపోవడమే కారణమని చాలా మంది నెటిజన్లు విమర్శిస్తున్నారు. బస్సులు తరచూ టెక్నికల్ సమస్యలను ఎదుర్కొంటున్న నేపథ్యంలో RTC తక్షణ చర్యలు తీసుకోవాలని ప్రజలు డిమాండ్ చేస్తున్నారు.
ఈ సంఘటనతో RTC అధికారులు మరింత అప్రమత్తమయ్యారు. వాహనాల చెకప్, ఎలక్ట్రికల్ సిస్టమ్‌లను పునఃపరిశీలించడం, అవసరమైతే పాత బస్సులను విరమించడం వంటి చర్యలు చేపట్టాలని అధికారులు యోచిస్తున్నారు.
సమీప భవిష్యత్తులో ఇలాంటి ఘటనలు మళ్లీ జరగకుండా నిరోధక చర్యలు తీసుకోవాలని ప్రయాణికులు కోరుతున్నారు. మెహదీపట్నం బస్టాండ్‌లో జరిగిన ఈ ప్రమాదం ఎలాంటి ప్రాణ నష్టం లేకుండా ముగిసినా, వాహన భద్రతపై మరోసారి ఆందోళనలు వ్యక్తమవుతున్నాయి.
ఈ ఘటన రాష్ట్రంలో ప్రజా రవాణా వాహనాల భద్రతపై ఒక పెద్ద ప్రశ్నను లేవనెత్తింది. పీక్ అవర్స్‌లో ఈ విధంగా మంటలు చెలరేగడం ఎంత ప్రమాదకరమో ఈ సంఘటన చాటి చెప్పింది. భవిష్యత్తులో ప్రయాణికుల ప్రాణ భద్రతను దృష్టిలో ఉంచుకుని RTC మరింత సమగ్రంగా చర్యలు తీసుకోవాలని నిపుణులు సూచిస్తున్నారు.
Share
Bigg Boss telugu: నన్ను దూరం పెట్టారు.. అతడే జడ్జ్ గా ఎందుకు?
Vithika sheru: మట్టి వినాయకుడిని చేసిన హీరోయిన్.. వామ్మో ఈ టాలెంట్ కూడా ఉందా?
