2027 జనగణనలో బీసీ లెక్కలు ఏవి? కేంద్రంపై మంత్రి పొన్నం ప్రభాకర్ ఫైర్!

Ponnam Prabhakar: తెలంగాణ శాసనసభ వేదికగా మంత్రి పొన్నం ప్రభాకర్ చేసిన ప్రసంగం ప్రస్తుతం దేశవ్యాప్తంగా సాగుతున్న కుల గణన చర్చలో అత్యంత ప్రాధాన్యత సంతరించుకుంది. బీసీ వర్గాలకు సామాజిక న్యాయం అందించాలనే లక్ష్యంతో కాంగ్రెస్ ప్రభుత్వం చేపట్టిన చర్యలు, కేంద్ర ప్రభుత్వం నిర్వహించబోయే రాబోయే జనగణనలో పాటించాల్సిన విధానాలపై ఆయన స్పష్టమైన ప్రతిపాదనలను సభ ముందు ఉంచారు.

తెలంగాణ కుల సర్వే..  దేశానికే రోల్ మోడల్

కాంగ్రెస్ ప్రభుత్వం అధికారంలోకి వచ్చిన వెంటనే తెలంగాణలో చేపట్టిన సమగ్ర కుటుంబ, కుల సర్వే దేశానికే ఒక సరికొత్త మార్గదర్శకంగా నిలిచిందని పొన్నం ప్రభాకర్ స్పష్టం చేశారు. ప్రతీ కుటుంబం, వ్యక్తికి సంబంధించిన సామాజిక, ఆర్థిక, విద్యా, ఉపాధి వివరాలను అత్యంత శాస్త్రీయంగా సేకరించామని తెలిపారు. ఈ ప్రామాణికమైన డేటా ఆధారంగానే రాష్ట్రంలో బీసీలకు విద్య మరియు ఉద్యోగాల్లో 42 శాతం రిజర్వేషన్లు కల్పించేందుకు ప్రభుత్వం చట్టపరమైన చర్యలు ప్రారంభించిందని, ఇది తెలంగాణ సాధించిన ఒక విప్లవాత్మక అడుగు అని ఆయన కొనియాడారు.

కేంద్ర జనగణన ప్రశ్నావళిపై ఆందోళన

సుప్రీంకోర్టు విధించిన 50 శాతం రిజర్వేషన్ల పరిమితిని అధిగమించాలంటే ఖచ్చితమైన కుల గణాంకాలు అవసరమన్నారు. అయితే కేంద్ర ప్రభుత్వం రూపొందించిన 2027 జనగణన ప్రశ్నావళి ఆశాజనకంగా లేదని మంత్రి ఆందోళన వ్యక్తం చేశారు. ప్రాథమికంగా వచ్చిన 32 ప్రశ్నల జాబితాలో గానీ, ఆగస్టు 14న సవరించిన 40 ప్రశ్నల ఫారమ్‌లో గానీ ఎస్సీ, ఎస్టీ వివరాలకు స్థానం ఇచ్చి.. బీసీ, ఓబీసీ కేటగిరీలను పూర్తిగా విస్మరించడం సరైంది కాదన్నారు. జనాభాలో సగానికి పైగా ఉన్న బీసీల వివరాలను సేకరించకుండా వారికి తగిన సంక్షేమ పథకాలు, రాజకీయ ప్రాతినిధ్యం ఎలా కల్పిస్తారని ఆయన కేంద్రాన్ని ప్రశ్నించారు.

డ్రాప్‌డౌన్ విధానంలో శాస్త్రీయ సేకరణ

కుల గణనను ఏదో పేరుకు మాత్రమే కాకుండా సాంకేతికతతో కూడిన ‘డ్రాప్‌డౌన్’ పద్ధతిలో చేపట్టాలని పొన్నం ప్రభాకర్ సూచించారు. సమాచారాన్ని ‘ఓపెన్’ పద్ధతిలో నమోదు చేస్తే స్పెల్లింగ్ తప్పులు, ఉపకులాల వ్యత్యాసాలు, ప్రాంతీయ పేర్ల వల్ల లెక్కలు తారుమారయ్యే ప్రమాదం ఉందన్నారు. తెలంగాణలో అనుసరించినట్లుగా స్పష్టమైన వర్గీకరణలతో డిజిటల్ పద్ధతిలో డేటా సేకరిస్తేనే అసలైన బీసీ జనాభా బయటకు వస్తుందని, దీనిపై రాహుల్ గాంధీ, మల్లికార్జున ఖర్గే కూడా ఇప్పటికే ప్రధాని మోదీకి లేఖ రాశారని గుర్తుచేశారు.

శాసనసభ తీర్మానం.. ‘మేమెంతో మాకంతా’

‘జనాభా ఎంత ఉంటే.. హక్కులు, అవకాశాలు అంతే స్థాయిలో ఉండాలి’ అనే సూత్రం నెరవేరాలంటే బీసీ లెక్కలు తప్పనిసరి అని సభలో స్పష్టం చేశారు. 2027 జాతీయ జనగణనలో బీసీ, ఓబీసీ కాలమ్‌ను తప్పనిసరిగా చేర్చేలా కేంద్రంపై ఒత్తిడి తెచ్చేందుకు తెలంగాణ శాసనసభ ద్వారా ఏకగ్రీవ తీర్మానం చేయాలని పిలుపునిచ్చారు. తెలంగాణ సాధించిన సామాజిక విజయాన్ని దేశమంతటా వర్తింపజేయడమే లక్ష్యంగా కేంద్ర ప్రభుత్వం తక్షణమే స్పందించి ప్రశ్నావళిని మార్చాలని ఆయన డిమాండ్ చేశారు.

Also Read:PM విశ్వకర్మ నుండి UPI వరకు.. మోదీ 25 ఏళ్ల పాలనపై బీజేపీ మాస్టర్ ప్లాన్! 

Join WhatsApp Channel

Share

• 
• 
• 
• 
• 
•