Google Telangana Partnership: తెలంగాణతో గూగుల్ భారీ డీల్.. వ్యవసాయం, ట్రాఫిక్‌కు ఏఐ దన్ను!

Google Telangana Partnership:స్విట్జర్లాండ్‌లోని దావోస్‌లో జరుగుతున్న ప్రపంచ ఆర్థిక వేదిక (WEF) వార్షిక సదస్సు 2026 వేదికగా తెలంగాణ రాష్ట్రానికి భారీ టెక్ విజయం లభించింది. ప్రపంచ టెక్ దిగ్గజం గూగుల్ (Google), తెలంగాణ ప్రభుత్వంతో వ్యూహాత్మక భాగస్వామ్యానికి సిద్ధమని ప్రకటించింది. మంగళవారం జరిగిన ఈ కీలక సమావేశంలో ముఖ్యమంత్రి ఎ. రేవంత్ రెడ్డి, గూగుల్ ఆసియా పసిఫిక్ (APAC) ప్రెసిడెంట్ సంజయ్ గుప్తాతో భేటీ అయ్యారు. ఈ సందర్భంగా ఆర్టిఫిషియల్ ఇంటెలిజెన్స్ (AI), సుస్థిర అభివృద్ధి లక్ష్యంగా పలు రంగాల్లో కలిసి పనిచేయాలని నిర్ణయించారు.

వాతావరణ మార్పుల ప్రభావం, నేల ఆరోగ్యం మరియు వ్యవసాయంలో ఎరువుల అతి వినియోగం వంటి సమస్యల పరిష్కారానికి గూగుల్ తన సాంకేతికతను అందించనుంది. రైతులకు డేటా ఆధారిత అవగాహన కల్పించడంలో గూగుల్ సహకారం తీసుకోనున్నారు.

హైదరాబాద్ నగరంలో ట్రాఫిక్ రద్దీని తగ్గించేందుకు AI ఆధారిత ట్రాఫిక్ కంట్రోల్ సిస్టమ్స్ అమలు చేయాలని చర్చించారు. రాష్ట్రంలోని సైబర్ సెక్యూరిటీ మౌలిక సదుపాయాలను బలోపేతం చేసేందుకు గూగుల్ మద్దతు ఇవ్వనుంది. హైదరాబాద్‌లో ఇటీవల ప్రారంభించిన దేశంలోనే మొట్టమొదటి గూగుల్ ఫర్ స్టార్టప్స్ హబ్ ద్వారా మరిన్ని ఏఐ-ఫస్ట్ స్టార్టప్‌లకు మార్గదర్శకత్వం, వనరులను అందించనున్నారు.

ముఖ్యమంత్రి రేవంత్ రెడ్డి ఈ సందర్భంగా తెలంగాణ అభివృద్ధి నమూనా అయిన CURE, PURE, RARE ఫ్రేమ్‌వర్క్‌ను గూగుల్ ప్రతినిధులకు వివరించారు. కోర్ హైదరాబాద్‌ను కాలుష్య రహిత నగరంగా తీర్చిదిద్దే తన విజన్‌ను పంచుకున్నారు. మంత్రి శ్రీధర్ బాబు మాట్లాడుతూ యంగ్ ఇండియా స్కిల్స్ యూనివర్సిటీ, ఖాన్ అకాడమీ భాగస్వామ్యం వంటి విద్యా సంస్కరణలను వివరించగా, గూగుల్ బృందం రాష్ట్రంలోని స్కిల్లింగ్ కార్యక్రమాలను అభినందించింది. ఈ సమావేశంలో మంత్రి పొంగులేటి శ్రీనివాస రెడ్డి మరియు ఇతర ఉన్నతాధికారులు పాల్గొన్నారు.