Supreme Court: ఎస్ఐఆర్ కంటిన్యూ చేయాల్సిందే.. రాష్ట్రాలకు క్లారిటీ ఇచ్చిన సుప్రీంకోర్టు

పశ్చిమ బెంగాల్‌తో సహా పలు రాష్ట్రాల్లో ఎన్నికల జాబితాల సవరణ ప్రక్రియ (Special Intensive Revision – SIR) సందర్భంగా బూత్ లెవెల్ ఆఫీసర్లు (BLOs) బెదిరింపులకు గురవుతున్నారనే అంశంపై సుప్రీంకోర్టు తీవ్ర ఆందోళన వ్యక్తం చేసింది. ఈ ముఖ్యమైన ప్రక్రియను రాష్ట్రాలు తప్పనిసరిగా కొనసాగించాలని స్పష్టం చేసిన అత్యున్నత న్యాయస్థానం, అధికారులకు వచ్చే అడ్డంకులను, బెదిరింపులను అరికట్టకపోతే అరాచకం ఏర్పడుతుందని కేంద్ర ఎన్నికల సంఘాన్ని (ECI) గట్టిగా హెచ్చరించింది. చీఫ్ జస్టిస్ ఆఫ్ ఇండియా (CJI) సూర్య కాంత్ మరియు జస్టిస్ జాయ్‌మాల్య బాగ్చిలతో కూడిన ధర్మాసనం ఈ రోజు విచారణ చేపట్టింది. బెంగాల్‌లో రాబోయే అసెంబ్లీ ఎన్నికలకు సంబంధించి SIR ప్రక్రియ జరుగుతుందని కోర్టు స్పష్టం చేసింది. ఎన్నికల జాబితాల సవరణ ప్రక్రియను ఎటువంటి అడ్డంకులు లేకుండా మైదాన స్థాయిలో పూర్తి చేయడమే తమ ఉద్దేశమని ధర్మాసనం పేర్కొంది.

ఎన్నికల విధులు నిర్వర్తిస్తున్న అధికారులకు వస్తున్న బెదిరింపుల అంశాన్ని సుప్రీంకోర్టు చాలా తీవ్రంగా పరిగణించింది. ఈ విషయంలో రాష్ట్ర ప్రభుత్వాలు సహకరించడం లేదంటూ ఎన్నికల సంఘం తరపు న్యాయవాది రాకేష్ ద్వివేది చేసిన వాదనలపై కోర్టు దృష్టి సారించింది. ‘BLOs పనికి అడ్డంకులు లేదా సహకారం కొరవడిన సందర్భాలు మా దృష్టికి తీసుకురండి, మేము తగిన ఆదేశాలు జారీ చేస్తాము” అని ధర్మాసనం ECIకి తెలియజేసింది. ముఖ్యంగా.. SIR ప్రక్రియలో భాగంగా ఇంటింటికీ వెళ్లి ఓటర్ల వివరాలను సరిచూసే BLOలు అధిక పనిభారం, ఒత్తిడికి గురవుతున్నారని పిటిషనర్లు ఆరోపించారు. ఈ క్రమంలో బెదిరింపులు కూడా ఎదురవుతున్నాయని పేర్కొన్నారు. దీనిపై స్పందించిన ధర్మాసనం, ECIతో మాట్లాడుతూ.. ‘పరిస్థితిని చక్కదిద్దండి, లేదంటే అది అరాచకానికి దారితీస్తుంది’ అని హెచ్చరించింది. ఈ పరిస్థితిని కోర్టు చాలా తీవ్రమైనదిగా అభివర్ణించింది.

SIR ప్రక్రియను కొనసాగించడానికి రాష్ట్రాలు ఎన్నికల సంఘానికి తప్పనిసరిగా సహకరించాలని, అధికారులకు తగిన భద్రత కల్పించాలని సుప్రీంకోర్టు ఆదేశించింది. BLOలు ఒత్తిడికి లోనైతే లేదా బెదిరింపులు ఎదుర్కొంటే, వారి స్థానంలో వేరే వారిని నియమించి అయినా SIR సజావుగా జరిగేలా చూడాలని రాష్ట్రాలకు కోర్టు స్పష్టం చేసింది. పోలీస్ దళాల పంపిణీపై ECI న్యాయవాది మాట్లాడుతూ, పరిస్థితి తీవ్రమైతే రాష్ట్ర పోలీసులను డిప్యుటేషన్ కింద తీసుకుంటామని, ఇంకా మెరుగుపడకపోతే కేంద్ర బలగాలను కూడా పిలవాల్సి ఉంటుందని కోర్టుకు తెలిపారు. అయితే, ఎన్నికల ప్రక్రియ అధికారికంగా ప్రారంభమయ్యే వరకు ECI పోలీసులను తన నియంత్రణలోకి తీసుకోలేదని ధర్మాసనం స్పష్టం చేసింది. అయినప్పటికీ, బెదిరింపుల వంటి అంశాలను ఎదుర్కోవడానికి ECIకి అన్ని రాజ్యాంగపరమైన అధికారాలు ఉన్నాయని కోర్టు చెప్పింది.

‘రాజకీయ పార్టీల మధ్య నిందారోపణల్లోకి కోర్టు వెళ్లదలచుకోలేదు. BLOల విధులకు ఎలాంటి అడ్డంకులు కలుగుతున్నాయో మాకు చెప్పండి, మేము వాటిని పరిష్కరిస్తాము’ అని కోర్టు పేర్కొంటూ, ఈ అంశంపై తదుపరి విచారణ కోసం ECI, కేంద్రం, పశ్చిమ బెంగాల్ ప్రభుత్వాలకు నోటీసులు జారీ చేసింది.

ALSO READ: CM Revanth Reddy: ఉస్మానియా యూనివర్సిటీకి రూ.1000 కోట్ల కేటాయింపు.. రేపు సీఎం రేవంత్‌రెడ్డి ప్రకటన