Employee Welfare: చరిత్రలో నిలిచిపోయే నిర్ణయం.. సీఎం రేవంత్ రెడ్డికి కృతజ్ఞతలు తెలిపిన ఉద్యోగ నేతలు

Employee Welfare: తెలంగాణ రాష్ట్ర ప్రభుత్వ ఉద్యోగుల సంక్షేమం దిశగా ముఖ్యమంత్రి ఎ.రేవంత్ రెడ్డి తీసుకున్న చారిత్రాత్మక నిర్ణయాలపై ఉద్యోగ వర్గాల్లో హర్షం వ్యక్తమవుతోంది. ఉద్యోగుల కోసం ప్రత్యేకంగా ప్రమాద బీమాతో పాటు నూతన ఆరోగ్య పథకాలను ప్రకటించడంపై ఉద్యోగ సంఘాల నేతలు ముఖ్యమంత్రికి కృతజ్ఞతలు తెలిపారు. మంగళవారం ముఖ్యమంత్రి నివాసంలో టీజీవో, టీఎన్జీవో, రెవెన్యూ, ఉపాధ్యాయ, పెన్షనర్ల సంఘాల నాయకులు రేవంత్ రెడ్డిని మర్యాదపూర్వకంగా కలిశారు. తమ చిరకాల వాంఛను నెరవేర్చినందుకు ఈ సందర్భంగా వారు ముఖ్యమంత్రిని ఘనంగా సన్మానించారు.

ఈ రెండు పథకాలు రాష్ట్ర చరిత్రలో మైలురాళ్లుగా నిలిచిపోతాయని ఉద్యోగ నేతలు కొనియాడారు. ముఖ్యంగా 652 గుర్తింపు పొందిన ప్రభుత్వ, ప్రైవేటు ఆసుపత్రుల్లో సుమారు 1,998 వ్యాధులకు నగదు రహిత (Cashless) చికిత్స పొందే అవకాశం కల్పించడంపై ఉద్యోగులు హర్షం వ్యక్తం చేస్తున్నారు. గతంలో వైద్య ఖర్చుల కోసం పడిన ఇబ్బందులు ఇకపై తప్పుతాయని వారు ఆశాభావం వ్యక్తం చేశారు. ప్రభుత్వ నిర్ణయం వల్ల లక్షలాది మంది ఉద్యోగులతో పాటు వారి కుటుంబ సభ్యులకు ఆరోగ్య భద్రత చేకూరుతుందని నేతలు పేర్కొన్నారు.

ముఖ్యమంత్రిని కలిసిన వారిలో తెలంగాణ ఉద్యోగ ఉపాధ్యాయ పెన్షనర్ల ఐక్య కార్యాచరణ సమితి (JAC) నాయకులు మారం జగదీశ్వర్, ఏలూరి శ్రీనివాసరావు, వి.లచ్చిరెడ్డి, కె.రామకృష్ణ తదితరులు ఉన్నారు. ఉద్యోగుల సమస్యల పట్ల ప్రభుత్వం సానుకూలంగా స్పందిస్తోందని.. ఈ పథకాల అమలుతో తమ జీవితాల్లో భద్రత పెరిగిందని వారు వివరించారు. ముఖ్యంగా ప్రమాద బీమా సౌకర్యం కల్పించడం వల్ల విధి నిర్వహణలో అనుకోని సంఘటనలు ఎదురైనప్పుడు కుటుంబాలకు ఆర్థిక భరోసా లభిస్తుందని ప్రతినిధులు హర్షం వెలిబుచ్చారు.

ఉద్యోగ వర్గాల సంక్షేమమే ధ్యేయంగా ప్రభుత్వం పనిచేస్తోందని ఈ సందర్భంగా ముఖ్యమంత్రి రేవంత్ రెడ్డి పునరుద్ఘాటించారు. రాబోయే రోజుల్లో ఉద్యోగుల ఇతర సమస్యలను కూడా దశలవారీగా పరిష్కరిస్తామని హామీ ఇచ్చారు. ప్రభుత్వ యంత్రాంగంలో కీలకమైన ఉద్యోగులు సంతోషంగా ఉన్నప్పుడే పాలన సమర్థవంతంగా సాగుతుందని ఆయన అభిప్రాయపడ్డారు. ముఖ్యమంత్రిని కలిసిన బృందంలో పలు జిల్లాల నుంచి వచ్చిన ఉద్యోగులు.. ఉపాధ్యాయులు పెద్ద సంఖ్యలో పాల్గొని తమ మద్దతును ప్రకటించారు.

Read Also: CM Revanth Reddy: పాలకుర్తి అభివృద్ధికి ప్రభుత్వ పూర్తి సహకారం అందిస్తాం : సీఎం రేవంత్ రెడ్డి

Join WhatsApp Channel

Share

• 
• 
• 
• 
• 
•