వికారాబాద్ జిల్లాలో విషాదం.. ఆర్మీ జవాన్ ఆత్మహత్య

Army Soldier Dies: పండుగ వేళ ఆ ఇంట్లో నవ్వులు విరియాలి.. కానీ, ఊహించని విషాదం ఆ కుటుంబాన్ని ముంచెత్తింది. దేశ సరిహద్దుల్లో కాపలా కాస్తూ అందరికీ అండగా నిలిచే ఒక జవాన్, కన్నవారికి తీరని శోకాన్ని మిగిల్చి వెళ్ళిపోయారు. వికారాబాద్ జిల్లాలో చోటుచేసుకున్న ఈ ఘటన స్థానికంగా తీవ్ర దిగ్భ్రాంతిని కలిగించింది.

సెలవుల్లో ఇంటికి వచ్చి..

యాలాల్ మండలం లక్ష్మీనారాయణపూర్ గ్రామానికి చెందిన బోయిని మల్లేశం (28) ఆర్మీలో జవాన్‌గా విధులు నిర్వహిస్తున్నారు. దసరా పండుగను కుటుంబ సభ్యులతో కలసి జరుపుకోవాలనే ఉద్దేశంతో ఆయన కొద్ది రోజుల కిందటే సెలవుపై ఊరికి వచ్చారు. నిన్నటివరకు భార్య, బంధువులతో ఎంతో సంతోషంగా గడిపారు. ఇంట్లో అందరితో సరదాగా మాట్లాడిన మల్లేశం, రాత్రి అందరూ నిద్రపోయిన తర్వాత బెడ్‌రూమ్‌లోకి వెళ్లి ఉరివేసుకుని ప్రాణాలు తీసుకున్నారు.

ఎనిమిది నెలల క్రితమే పెళ్లి

ఉదయాన్నే విగతజీవిగా పడి ఉన్న మల్లేశంను చూసి కుటుంబ సభ్యులు గుండెలు పగిలేలా రోదించారు. కేవలం ఎనిమిది నెలల క్రితమే ఆయనకు వివాహమైందని బంధువులు కన్నీటిపర్యంతమయ్యారు. నూరేళ్ల జీవితాన్ని పంచుకోవాల్సిన భర్త ఇలా అర్థాంతరంగా దూరమవడంతో ఆ నవవధువు రోదనలు వర్ణనాతీతంగా మారాయి.

సంఘటనా స్థలానికి చేరుకున్న పోలీసులు కేసు నమోదు చేసుకుని, ఆత్మహత్యకు గల స్పష్టమైన కారణాలపై విచారణ జరుపుతున్నారు. పండుగ పూట దేశ రక్షణలో ఉండే జవాన్ ఇలా బలవన్మరణానికి పాల్పడటంతో లక్ష్మీనారాయణపూర్ గ్రామంలో తీవ్ర శోకఛాయలు అలుముకున్నాయి.

Also Read: ప్రభుత్వ ఆస్తులు ధ్వంసం చేస్తే ఊరుకునేది లేదు: పవన్ కల్యాణ్