Secunderabad Train Accident: స్మార్ట్‌ ఫోన్లు, ఇయర్‌ ఫోన్ల వినియోగం పెరుగుతున్న నేపథ్యంలో యువతకు గట్టి హెచ్చరికను పంపే విషాద ఘటన సికింద్రాబాద్‌ లో చోటుచేసుకుంది. రైల్వే ట్రాక్‌పైకి వెళ్లిన 17 ఏళ్ల యువకుడు రైలు ఢీకొని ప్రాణాలు కోల్పోయాడు. ఈ ఘటనకు సంబంధించి పోలీసులు సీసీటీవీ ఫుటేజీని పరిశీలించగా కీలక విషయాలు వెలుగులోకి వచ్చాయి. ఇయర్‌ ఫోన్స్ పెట్టుకుని రైల్వే ట్రాక్‌పైకి వెళ్లినట్లు ఫుటేజీలో కనిపించిందని రైల్వే పోలీసులు వెల్లడించారు.
సికింద్రాబాద్‌లోని బోలారం రైల్వే స్టేషన్ సమీపంలో ఈ ప్రమాదం జరిగింది. మధ్యాహ్నం సమయంలో రైల్వే అధికారులకు సమాచారం అందడంతో సిబ్బంది వెంటనే అప్రమత్తమయ్యారు. డౌన్ లైన్ పక్కన యువకుడి మృతదేహాన్ని గుర్తించారు. రైల్వే ప్రొటెక్షన్ ఫోర్స్ (RPF), ప్రభుత్వ రైల్వే పోలీసులు (GRP) ఘటనా స్థలానికి చేరుకుని విచారణ చేపట్టారు. మృతుడిని ఆల్వాల్ పరిధిలోని తుర్కపల్లి గ్రామానికి చెందిన తోలుచూరి వివేక్‌గా గుర్తించారు. అతడి తండ్రి కృష్ణమూర్తి ఘటనా స్థలానికి చేరుకుని మృతదేహాన్ని గుర్తించారు. చిన్న వయసులోనే కుమారుడు ప్రాణాలు కోల్పోవడంతో కుటుంబంలో తీవ్ర విషాదం నెలకొంది.
ఘటనా స్థలంలో పోలీసులకు కొన్ని వస్తువులు లభించాయి. మృతుడి వద్ద నుంచి ఐఫోన్ 16 ప్రో మ్యాక్స్ ను స్వాధీనం చేసుకున్నారు. అలాగే ప్రమాదం జరిగిన ప్రాంతానికి సమీపంలో ఒక జత తెల్లటి ఇయర్‌ ఫోన్‌లను గుర్తించారు. దీంతో యువకుడు ఇయర్‌ ఫోన్స్ ఉపయోగిస్తున్న సమయంలో ప్రమాదం జరిగి ఉంటుందని తొలుత పోలీసులు భావించారు. అయితే, ప్రమాదం ఎలా జరిగిందనే విషయంలో స్పష్టత కోసం పోలీసులు సీసీటీవీ కెమెరాల ఫుటేజీని పరిశీలించారు.
తన కుమారుడి మృతిపై కొన్ని సందేహాలను తండ్రి కృష్ణమూర్తి వ్యక్తం చేయడంతో పోలీసులు విచారణను మరింత లోతుగా చేపట్టారు. ఈ క్రమంలో రైల్వే స్టేషన్ పరిసరాల్లోని సీసీటీవీ ఫుటేజీని పరిశీలించారు. యువకుడు రైల్వే ట్రాక్ ప్రాంతంలోకి ప్రవేశించి, ఇయర్‌ ఫోన్స్ పెట్టుకుని ట్రాక్ మీద నడుస్తున్నట్లు ఫుటేజీలో కనిపించిందని పోలీసులు తెలిపారు. రైల్వే ట్రాక్ పైకి వెళ్లిన సమయంలో రైలును గుర్తించలేకపోవడం ప్రమాదానికి కారణం అయ్యిందని రైల్వే అధికారులు తెలిపారు. ఈ ఘటనపై భారతీయ నాగరిక్ సురక్షా సంహిత (BNSS) సెక్షన్ 194 కింద కేసు నమోదు చేసి దర్యాప్తు చేపట్టారు.
ఈ ఘటన నేపథ్యంలో రైల్వే అధికారులు ప్రజలకు కీలక సూచనలు చేశారు. రైల్వే ట్రాక్‌లు పూర్తిగా నిషేధిత ప్రాంతాలని, వాటిపై నడవడం, అనధికారికంగా ప్రవేశించడం ప్రాణాలకు ప్రమాదకరమని హెచ్చరించారు. ముఖ్యంగా రైల్వే లైన్ల సమీపంలో ఇయర్‌ ఫోన్స్ పెట్టుకోవడం వల్ల రైలు హారన్లు, హెచ్చరికలు వినిపించకపోవచ్చని తెలిపారు.
హైదరాబాద్ పోలీస్ కమిషనర్ వి.సి. సజ్జనార్ కూడా రోడ్లపై నడుస్తున్నప్పుడు, వాహనాలు నడుపుతున్నప్పుడు ఇయర్‌ఫోన్స్ వినియోగం ప్రమాదకరమని హెచ్చరించారు. ఫోన్లు, మ్యూజిక్ కంటే ప్రాణాల భద్రతకే ప్రాధాన్యత ఇవ్వాలని యువతకు సూచించారు. చిన్నపాటి నిర్లక్ష్యం కూడా ఎంతటి విషాదానికి దారితీస్తుందో ఈ ఘటన మరోసారి గుర్తుచేస్తోంది.
ఆధునికత పేరుతో చెవులకు తగిలించుకుంటున్న ఇయర్‌ఫోన్లు వినోదాన్ని పంచుతున్నాయా… లేక కళ్లముందే పొంచి ఉన్న మృత్యువు కేకను కూడా వినిపించకుండా ప్రాణాలను కబళించే మాయా తెరగా మారుతున్నాయా?
నిండు జీవితం కంటే ఆ ఫోన్ కాల్ అంత అత్యవసరమా, ఇంట్లో ఎదురుచూసే కుటుంబ సభ్యుల కంటే ఆ పాటలు అంత… pic.twitter.com/RVjOaEhH2i
— V.C. Sajjanar, IPS (@SajjanarVC_IPS) October 27, 2026
Read Also: అర్నాబ్ తుఫాను ఎఫెక్ట్.. వందే భారత్ సహా 42 రైళ్లు రద్దు!
Share
ఓటీటీలోకి అడుగు పెట్టిన సీఎం విజయ్ కొడుకు ఫస్ట్ మూవీ... ఎక్కడ చూడొచ్చంటే ?
రోజూ బ్రష్ చేస్తున్నా నోటి దుర్వాసన తగ్గడం లేదా? దీనికి కారణాలు ఇవే
