బెంగళూరు-ముంబై వందే భారత్ స్లీపర్ vs ఫ్లైట్.. ఏది బెటర్?

Bengaluru-Mumbai Vande Bharat Sleeper vs Flight: బెంగళూరు నుంచి ముంబై వెళ్లే ప్రయాణికులకు త్వరలో కొత్త ఆప్షన్ అందుబాటులోకి రానుంది. వందే భారత్ స్లీపర్ రైలు ఈ రెండు నగరాల మధ్య ప్రారంభం కాబోతోంది. అయితే, ఇప్పటికే అందుబాటులో ఉన్న విమానాలతో పోలిస్తే ఈ రైలు ఎంతవరకు ఉపయోగకరంగా ఉంటుంది? ప్రయాణ సమయం, టికెట్ ధర, సౌకర్యం లాంటి అంశాల్లో ఏది బెస్ట్ అనేది ఇప్పుడు తెలుసుకుందాం..

ప్రయాణ సమయంలో భారీ తేడా

బెంగళూరు నుంచి ముంబైకి నాన్‌ స్టాప్ విమానంలో ప్రయాణిస్తే సుమారు రెండు గంటల సమయం పడుతుంది. అయితే, విమాన ప్రయాణాన్ని కేవలం ఆ రెండు గంటలతోనే లెక్కించలేం. చెక్ ఇన్, సెక్యూరిటీ తనిఖీలు, విమానాశ్రయానికి వెళ్లడం, అక్కడి నుంచి ఇంటికి చేరుకోవడానికి అదనపు సమయం అవసరం. మరోవైపు వందే భారత్ స్లీపర్ రైలులో వెళ్లడానికి సుమారు 17 గంటలు పడుతుంది. వేగం విషయంలో విమానంతో రైలుకు పోలికే ఉండదు. అయితే ఈ రైలు ప్రధానంగా రాత్రి ప్రయాణానికి అనుకూలంగా ఉంటుంది.

టికెట్ ధర ఎంత?

బెంగళూరు-ముంబై మార్గంలో విమాన టికెట్ ధర ప్రయాణ తేదీ, ఎయిర్‌ లైన్, బుకింగ్ సమయం వంటి అంశాలపై ఆధారపడి మారుతుంది. కొన్ని తేదీల్లో వన్‌ వే ఎకానమీ టికెట్లు సుమారు రూ.4,700 నుంచి రూ.6,300 మధ్య అందుబాటులో ఉండొచ్చు. అయితే సెలవులు, పండుగలు లేదా రద్దీ సమయాల్లో ధరలు మరింత పెరిగే అవకాశం ఉంటుంది. వందే భారత్ స్లీపర్ రైలు టికెట్ ధరను అధికారికంగా ప్రకటించిన తర్వాతే విమానంతో పోల్చే అవకాశం ఉంటుంది. ఈ రైలులో ఏసీ స్లీపింగ్ బెర్త్‌ లు ఉండనున్నందున, సుదీర్ఘ ప్రయాణంలో ప్రయాణికులకు మెరుగైన సౌకర్యం లభించే అవకాశం ఉంది. టికెట్ ధర విమాన ఛార్జీకి దగ్గరగా ఉంటే ప్రయాణికులు ఏది సెలెక్ట్ చేసుకోవాలనుకునే విషయం ఆలోచించాల్సి ఉంటుంది. అదే రైలు ఛార్జీ తక్కువగా ఉంటే బడ్జెట్ ప్రయాణికులకు మంచి ఆప్షన్‌ కానుంది.

రాత్రి ప్రయాణానికి రైలు అనుకూలంగా

వందే భారత్ స్లీపర్ రైలుకు ఉన్న బెనిఫిట్ రాత్రి ప్రయాణం. ప్రయాణికులు రాత్రి రైలు ఎక్కి బెర్త్‌ లో నిద్రపోతూ ప్రయాణం చేయవచ్చు. ఉదయం ముంబై చేరుకునే అవకాశం ఉంటుంది. విమానంలో ప్రయాణించాలంటే ముందుగా విమానాశ్రయానికి చేరుకోవాలి. చెక్ ఇన్, సెక్యూరిటీ లాంటి ఫార్మాలిటీస్ పూర్తి చేయాలి. రైలు ప్రయాణంలో మాత్రం అంతగా ఫార్మాలిటీస్ ఉండవు. ముఖ్యంగా ఎక్కువ లగేజీతో ప్రయాణించే వారికి స్లీపర్ రైలు సౌకర్యంగా అనిపించవచ్చు.

దేంట్లో ప్రయాణం చేయడం మంచిది?

వేగం ముఖ్యమైతే విమానంలో వెళ్లడం మంచిది. రెండు గంటల విమాన ప్రయాణానికి 17 గంటల రైలు ప్రయాణం అస్సలు పోటీ ఇవ్వలేదు. అయితే రాత్రి ప్రయాణం, బెర్త్‌ లో నిద్ర, విమానాశ్రయాల హడావుడికి దూరంగా ఉండటం లాంటివి ఇష్టపడే వారికి వందే భారత్ స్లీపర్ బెస్ట్ ఆప్షన్ గా చెప్పుకోవచ్చు.