Wootz Steel History: ఇనుమును ఉక్కుగా మార్చడం ఇప్పుడు పెద్ద విషయమేమీ కాదు. అత్యాధునిక పరిశ్రమల్లో భారీ యంత్రాలతో కొన్ని గంటల్లోనే టన్నుల కొద్దీ ఉక్కును తయారు చేస్తున్నారు. కానీ, వేల ఏళ్ల క్రితమే భారత్ లో అత్యంత నాణ్యమైన ఉక్కును తయారు చేశారంటే నమ్మగలరా? ఆధునిక సాంకేతికత అందుబాటులో లేని కాలంలోనే భారతీయులు తయారు చేసిన ఆ ప్రత్యేక ఉక్కు పేరు వూట్జ్ స్టీల్ (Wootz Steel). ప్రపంచాన్ని ఆశ్చర్యపరిచిన ఈ ఉక్కు గురించి ఇప్పుడు తెలుసుకునే ప్రయత్నం చేద్దాం..
వూట్జ్ స్టీల్ తయారీకి సంబంధించిన పురాతన సంప్రదాయం దక్షిణ భారతం లో లింక్ అయి ఉంది. ముఖ్యంగా ఇప్పటి తెలంగాణ, ఆంధ్రప్రదేశ్, కర్ణాటక, తమిళనాడు ప్రాంతాల్లో ఇనుము తయారీ, ఉక్కు ఉత్పత్తికి సంబంధించిన సాంకేతిక పరిజ్ఞానం ఉన్నట్లు చారిత్రక, పురావస్తు ఆధారాలు సూచిస్తున్నాయి. తెలుగు, తమిళం, కన్నడ ప్రాంతాల్లో కరిగించడం, ఉక్కు తయారీకి సంబంధించిన స్థానిక పదాలు వాడుకలో ఉండేవి. కాలక్రమంలో ఈ సంప్రదాయానికి సంబంధించిన పదమే మారుతూ పాశ్చాత్య ప్రపంచంలో ‘వూట్జ్’ అనే పేరుతో పాపులర్ అయ్యింది.
వూట్జ్ తయారీ విధానంలో ప్రత్యేకత దాని క్రూసిబుల్ టెక్నిక్. ఇనుమును కార్బన్ ఉన్న పదార్థాలతో కలిపి ప్రత్యేకమైన మట్టి మూసల్లో పెట్టి మూసివేసేవారు. ఆ తర్వాత వాటిని అధిక ఉష్ణోగ్రత దగ్గర వేడి చేసేవారు. ఈ ప్రక్రియలో ఇనుములోకి కార్బన్ చేరి హై కార్బన్ కలిగిన ఉక్కుగా మారేది. ఈ ఉక్కును చిన్న దిమ్మెల రూపంలో తయారు చేసి ఇతర ప్రాంతాలకు పంపించేవారు. సాధారణ ఇనుముతో పోలిస్తే ఇది ప్రత్యేకమైన లక్షణాలను కలిగి ఉండేది.
వూట్జ్ స్టీల్ కు ప్రపంచవ్యాప్తంగా గుర్తింపు రావడానికి ప్రధాన కారణం దానితో తయారైన కత్తులే. భారత్ నుంచి ఈ ఉక్కు పశ్చిమాసియా ప్రాంతాలకు చేరింది. అక్కడి కత్తి తయారీదారులు దీనిని ఉపయోగించి ప్రసిద్ధ డమాస్కస్ కత్తులు తయారు చేశారు. ఈ కత్తులపై కనిపించే నీటి అలల మాదిరి అందమైన నమూనాలు ఇప్పటికీ ఎంతో ఆసక్తిని కలిగిస్తాయి. ఉక్కులో ఏర్పడే సూక్ష్మ నిర్మాణం, కార్బైడ్ నమూనాల కారణంగానే ఈ ప్రత్యేకమైన రూపం కనిపించేది.
వూట్జ్ ఉక్కుతో తయారైన బ్లేడ్లకు పదును, గట్టితనం లాంటి లక్షణాలు ఉండేవి. అందుకే ఆయుధాల తయారీలో దీనికి ప్రత్యేకమైన గుర్తింపు ఉండేది. ఈ ఉక్కు నాణ్యత గురించి అప్పటి ప్రపంచంలో అనేక ప్రాంతాల్లో ప్రశంసలు ఉండేవి. గాలిలో ఎగురుతున్న పట్టు వస్త్రాన్ని సైతం ఈ కత్తి కోయగలిగేదని చెప్తుంటారు.
వూట్జ్ ఉక్కు తయారీ విధానం 18వ, 19వ శతాబ్దాల్లో యూరప్లోని శాస్త్రవేత్తల దృష్టిని ఆకర్షించింది. దీని ప్రత్యేక లక్షణాలకు కారణమేంటో తెలుసుకోవడానికి పరిశోధనలు జరిగాయి. మైఖేల్ ఫారడే లాంటి శాస్త్రవేత్తలు కూడా ఈ ఉక్కుపై ప్రయోగాలు చేసినట్లు చారిత్రక ఆధారాలు వెల్లడిస్తున్నాయి. పారిశ్రామిక ఉత్పత్తి విస్తరించడం, తయారీ విధానాల్లో మార్పులు రావడం, సంప్రదాయ ఉక్కు తయారీ కేంద్రాలు క్రమంగా తగ్గిపోవడంతో వూట్జ్ తయారీ సంప్రదాయం చివరకు కనుమరుగైంది. అయినా వేల ఏళ్ల క్రితమే సంక్లిష్టమైన లోహశాస్త్ర పరిజ్ఞానాన్ని ఉపయోగించి అధిక నాణ్యత కలిగిన ఉక్కును తయారు చేసిన భారతీయుల ప్రతిభకు వూట్జ్ స్టీల్ గొప్ప ఉదాహరణగా చెప్పుకోవచ్చు.
Read Also: మట్టిలో 2000 అండర్వేర్లను పాతిపెట్టిన శాస్త్రవేత్తలు.. ఇదేం విచిత్ర ప్రయోగం!?
Share
ఏషియన్ తో చేతులు కలిపిన చిరంజీవి.. ప్రపంచంలోనే?
ఎలక్ట్రానిక్స్కు ఎక్స్ట్రా వారెంటీ నిజంగా అవసరమా? ఈ ట్రిక్స్తో డబ్బు ఆదా చేసుకోండి!
