ఆగస్టు 1న భోగాపురం విమానాశ్రయం ప్రారంభం.. ప్రత్యేకతలు తెలిస్తే పరేషాన్ కావాల్సిందే!

Alluri Sitarama Raju International Airport: ఆంధ్రప్రదేశ్‌లోని విజయనగరం జిల్లా భోగాపురంలో నిర్మించిన అల్లూరి సీతారామరాజు అంతర్జాతీయ విమానాశ్రయం ప్రారంభానికి సిద్ధమైంది. ఆగస్టు 1న ప్రధానమంత్రి నరేంద్ర మోదీ ఈ విమానాశ్రయాన్ని అధికారికంగా ప్రారంభించనున్నారు. ఉత్తరాంధ్రలో నిర్మితమైన తొలి గ్రీన్ ఫీల్డ్ అంతర్జాతీయ విమానాశ్రయం కావడంతో దీనికి ప్రత్యేక ప్రాధాన్యం ఏర్పడింది.

ఉత్తరాంధ్ర అభివృద్ధికి ఊతం

ఈ విమానాశ్రయం అందుబాటులోకి రావడంతో ఉత్తరాంధ్ర ప్రజలకు విమాన ప్రయాణం మరింత సులభం కానుంది. ముఖ్యంగా విజయనగరం, శ్రీకాకుళం, విశాఖపట్నం పరిసర ప్రాంతాల ప్రజలకు ఇది ఎంతో ఉపయోగపడనుంది. భవిష్యత్తులో దేశీయ, అంతర్జాతీయ విమాన సర్వీసులు పెరగడంతో ఈ ప్రాంతానికి మెరుగైన కనెక్టివిటీ లభించనుంది.

భోగాపురం ఎయిర్ పోర్టు ప్రత్యేకతలు ఇవే!

భోగాపురం విమానాశ్రయాన్ని సుమారు 2,200 ఎకరాల విస్తీర్ణంలో నిర్మించారు. ఇందులో 3,800 మీటర్ల పొడవైన కోడ్ 4E రన్‌ వే ఏర్పాటు చేశారు. ఈ రన్‌ వేపై పెద్ద పరిమాణంలోని అంతర్జాతీయ విమానాలు కూడా సులభంగా ల్యాండ్ అయ్యేలా రూపొందించారు. భవిష్యత్తులో అంతర్జాతీయ విమాన రాకపోకలు పెరిగినా ఎలాంటి ఇబ్బంది లేకుండా ఈ విమానాశ్రయం సేవలు అందించేలా ప్రణాళిక రూపొందించారు.

ఏడాదికి 60 లక్షల మంది ప్రయాణికులకు సేవలు

ప్రాజెక్టు తొలి దశలో సంవత్సరానికి 60 లక్షల మంది ప్రయాణికులకు సేవలు అందించే సామర్థ్యంతో టెర్మినల్‌ను నిర్మించారు. ప్రయాణికుల సంఖ్య పెరిగే కొద్దీ.. ఈ సామర్థ్యాన్ని మరింత విస్తరించే అవకాశం ఉంది. ఆధునిక సౌకర్యాలతో టెర్మినల్‌ను తీర్చిదిద్దారు. ప్రయాణికులకు సౌకర్యవంతమైన చెక్-ఇన్, భద్రతా వ్యవస్థలు, వేగవంతమైన సేవలు అందుబాటులో ఉండేలా ప్రత్యేక ఏర్పాట్లు చేశారు. ఈ ప్రతిష్టాత్మక ప్రాజెక్టును జీఎంఆర్ గ్రూప్ అభివృద్ధి చేసింది. దేశంలో పలు అంతర్జాతీయ విమానాశ్రయాల నిర్వహణలో అనుభవం ఉన్న జీఎంఆర్ సంస్థ భోగాపురం విమానాశ్రయాన్ని కూడా అత్యాధునిక ప్రమాణాలతో నిర్మించింది.

పర్యాటక, వ్యాపార రంగానికి మరింత ఆదరణ

విశాఖపట్నానికి సుమారు 45 కిలోమీటర్ల దూరంలో ఈ విమానాశ్రయం ఉంది. దీంతో విశాఖ నగరంతో పాటు ఉత్తరాంధ్ర జిల్లాల ప్రజలకు ప్రయాణ సౌకర్యం మరింత మెరుగుపడనుంది. అలాగే పర్యాటక రంగానికి కూడా మరింత ఊతమివ్వనుంది. అరకు, బొర్రా గుహలు, బీచ్‌లు, బౌద్ధ క్షేత్రాలు వంటి పర్యాటక ప్రాంతాలకు దేశ విదేశాల నుంచి మరింత మంది సందర్శకులు వచ్చే అవకాశం ఉంది.

అంతేకాకుండా, పరిశ్రమల అభివృద్ధికి కూడా ఈ విమానాశ్రయం కీలకంగా మారనుంది. కొత్త పెట్టుబడులు రావడం, వ్యాపార కార్యకలాపాలు విస్తరించడం, స్థానిక యువతకు ఉపాధి అవకాశాలు పెరగడం లాంటి ప్రయోజనాలు కలుగుతాయని అధికారులు భావిస్తున్నారు. రవాణా సౌకర్యాలు మెరుగుపడటంతో ఉత్తరాంధ్ర ఆర్థికాభివృద్ధికి ఈ విమానాశ్రయం కీలక పాత్ర పోషించనుంది. భోగాపురం అల్లూరి సీతారామరాజు అంతర్జాతీయ విమానాశ్రయం ప్రారంభం ఉత్తరాంధ్రకు ఒక కొత్త మైలురాయిగా నిలవనుంది.