Kacheguda Railway Station: ఇదొక మహా నగరంలోని రైల్వే స్టేషన్. ఇక్కడికి పగలు ప్రయాణీకుల కంటే, రాత్రి వేళ సందర్శకుల రద్దీ అధికం. కారణం తెలియాలంటే ఈ కథనం పూర్తిగా చదవండి. అయితే ఈ రైల్వే స్టేషన్ వెళ్లారంటే మాత్రం, అక్కడ పొందే అనుభూతి మాత్రం మరే రైల్వే స్టేషన్ వద్ద మీరు పొందలేరు. ఇంతకు ఈ రైల్వే స్టేషన్ ఎక్కడ ఉంది? అక్కడ ఏం జరుగుతోంది? అక్కడి వింతలు ఏమిటో తెలుసుకుందాం.
ఒకే స్టేషన్‌కి రాత్రివేళ వెలుగులు మెరిసేలా డిజైన్ చేయాలంటే ఆ స్పాట్‌లో ఏదో స్పెషల్ ఉండాల్సిందే! హైదరాబాదు హృదయానికి దగ్గరగా ఉన్న కాచిగూడ రైల్వే స్టేషన్‌లో ఇప్పుడు చూస్తే ఏ కోణంలో చూసినా ఓ కొత్త అనుభూతి. కానీ చాలామందికి తెలియని విషయాలేంటంటే.. ఇక్కడ చరిత్రను మాట్లాడించే రైల్వే మ్యూజియం ఉంది, దేశంలో మొట్టమొదటి డిజిటల్ రైల్వే స్టేషన్లలో ఒకటి ఇదే, ఇంకా చాలానే ఉన్నాయనుకోండి. టికెట్ కోసం మాత్రమే కాకుండా.. ఫోటో కోసం, జ్ఞాపకాల కోసం, విజిట్ చేయాల్సిన ఒక ప్రదేశంగా కాచిగూడ ఇప్పుడు ట్రెండింగ్‌లో ఉంది.
కాచిగూడ రైల్వే స్టేషన్ వెళుతున్నారా?
హైదరాబాద్‌కు వచ్చారు కానీ కాచిగూడ రైల్వే స్టేషన్ చూడలేదా? ఓహ్! మీరు నిజంగా ఓ చారిత్రాత్మక అద్భుతాన్ని మిస్ అవుతున్నారు. ఈ స్టేషన్ ఇప్పుడు కేవలం ప్రయాణాల కోసమే కాదు..చూడదగ్గ ప్రదేశంగా కూడా మారుతోంది. పాతగౌరవాన్ని స్మరిస్తూ, కొత్త సౌకర్యాలతో మెరుస్తూ కనిపించే ఈ స్టేషన్ ఇప్పుడు కొత్త వెలుగు కిరణాలను చిమ్ముతోంది.
రాత్రి చీకట్లో మెరిసే కాచిగూడ
ఇప్పుడిప్పుడే పూర్తి అయిన ఫసాడ్ లైటింగ్ చూస్తే మీరు నిజంగా ఫిదా అవుతారు. రాత్రిపూట ఈ స్టేషన్ ఎలా వెలిగిపోతుందో చూడడానికి ప్రత్యేకంగా రావాలనిపిస్తుంది. పసుపు, నీలం, ఎరుపు రంగుల కాంతులతో మెరిసే స్టేషన్, నిజంగా ఓ మినీ చార్మినార్ అనిపిస్తుంది.
స్టేషన్ లోపల దాగి ఉన్న చరిత్ర.. రైల్వే మ్యూజియం!
ఇంతకీ అసలైన వింత ఎక్కడ ఉందంటే… కాచిగూడ రైల్వే స్టేషన్ లోపల ఉండే చిన్న అరుదైన రైల్వే మ్యూజియం లో. ఇది చిన్నదైనా అందులో ఉన్న వివరాలు మాత్రం మహా విశేషం. ఇక్కడ మీరు చూసేదేంటంటే.. పాత కాలపు రైలు టికెట్లు, స్టాంపులు, పెద్ద పెద్ద ఇంజన్ల మినియేచర్ మోడల్స్, మొదటగా ప్రయాణించిన రైలు కాలపు కక్షీలు, రైల్వే ఉద్యోగుల తొలితరం యూనిఫామ్స్, పూర్వపు లాంతర్లు, పాత కాలపు టికెట్ కటింగ్ మెషీన్లు, ఇంకా రైల్వే అభివృద్ధికి సంబంధించి రేర్ ఫోటోలు ఇక్కడ మీకు కనిపిస్తాయి.
అభివృద్ధి జోరుమీదే
అమృత్ భారత్ పథకం కింద రూ.421 కోట్ల బడ్జెట్‌తో ఇంకా మల్టీ లెవెల్ పార్కింగ్, ఎయిర్ కన్కోర్స్, ఆధునిక వేటింగ్ హాల్స్ పనులు కొనసాగుతున్నాయి. పైగా, స్టేషన్ మొత్తాన్ని ప్లాటినం రేటింగ్‌కి చేర్చేలా గ్రీన్ ఎనర్జీ ప్రమాణాలు పాటిస్తున్నారు.
డిజిటల్ సదుపాయాలు
కాచిగూడ స్టేషన్ దేశంలో మొట్టమొదటి డిజిటల్ పేమెంట్ ఎనేబుల్డ్ రైల్వే స్టేషన్లలో ఒకటి. ఇక క్యాష్‌తో టికెట్ కోసం లైన్‌లో నిలబడే రోజులు పోయాయి. మొబైల్‌తో స్కాన్ చేసి, సెట్ అయిపోతుంది!
ఇక వెళ్లాలంటే ఎలా?
మీరు హైదరాబాద్ నగరంలో ఎక్కడ నుంచైనా, కాచిగూడ స్టేషన్‌కు రైలు, మెట్రో, బస్సు, క్యాబ్ ఏదైనా సులభంగా దొరుకుతుంది. కానీ ఒకసారి స్టేషన్‌కు వెళ్తే.. ఫసాడ్ లైటింగ్, రైల్వే మ్యూజియం, చారిత్రక నిర్మాణం చూసిన తర్వాత అక్కడ ఉండిపోవాలనిపిస్తుంది! హైదరాబాద్‌లో చారిత్రాత్మకంగా నిలిచిన కాచిగూడ స్టేషన్ ఇప్పుడు ఒక టూరిజం స్పాట్ లా మారుతోంది. ప్రయాణానికి ముందు 10 నిమిషాలు పెట్టి చుట్టూ చక్కర్లు కొడితే.. మీరు చూసేదే రైలు స్టేషన్ కాదు, ఒక జీవించిపోతున్న చరిత్ర!
Share
Sunil Narang: ప్రొడ్యూసర్ ను హర్ట్ చేసిన కుబేర టీం.. ఇదే చివరి సినిమా కానుందా?
Suburban Train Service: రూ. 29కే ఏసీ రైలు ప్రయాణం, మీకూ వెళ్లాలనుందా?
