Mumbai Local Train Horror: ముంబై లోకల్ ట్రైన్‌లో జరిగిన దారుణ ఘటన ఆలస్యంగా వెలుగులోకి వచ్చింది. ఓ వ్యక్తి తోటి మహిళా ప్రయాణికురాలి పట్ల అసభ్యంగా ప్రవర్తించడమే కాకుండా ప్రతిఘటించినందుకు ఆమెను ఏకంగా రైలు నుంచి కిందికి తోసేశాడు. ఈ ఘటనలో బాధిత యువతి తన ఎడమ చేతిని కోల్పోవడమే కాకుండా.. తలకు 16 కుట్లు పడేంత తీవ్రంగా గాయపడింది.
బాధిత యువతి ముంబయిలోని బోరివలి నుంచి విరార్ వైపు వెళ్తున్న లోకల్ ట్రైన్‌లో ప్రయాణిస్తోంది. మార్గమధ్యంలో నాయిగావ్ ఈస్ట్‌కు చెందిన 53 ఏళ్ల జితేంద్ర హిర్ముఖే అనే వ్యక్తి ఆమెను అసభ్యకరంగా తాకుతూ వేధించడం మొదలుపెట్టాడు. మొదట యువతి నిలదీసినా అతడి ప్రవర్తనలో మార్పు రాలేదు. దీంతో ఆగ్రహానికి గురైన బాధితురాలు చెప్పుతో అతడిపై దాడి చేసింది. ఆపై నిందితుడు అసభ్య పదజాలంతో యువతిని దూషిస్తూ తన చెప్పుతో ఆమెపై తిరిగి దాడి చేశాడు.
రైలు నాయిగావ్ స్టేషన్‌కు చేరుకున్న తర్వాత కూడా వీరి మధ్య వాగ్వాదం కొనసాగింది. ఈ క్రమంలో నిందితుడు ఆమెను ఒక్కసారిగా కిందికి తోసేశాడు. దీంతో ఆమె రెండు బోగీల మధ్య ఉన్న ఖాళీ స్థలంలో పడిపోయింది. తిరిగి ప్లాట్‌ఫారమ్ పైకి ఎక్కేందుకు ప్రయత్నిస్తుండగానే రైలు కదలడంతో, ఆమె ఎడమ చేయి రైలు చక్రాల కింద నలిగిపోయింది. మోచేయి వరకు చేయి తెగిపడటంతో పాటు తలకు తీవ్ర గాయాలయ్యాయి. అక్కడే ఉన్న పోలీసు అధికారి, స్టేషన్ లోని ప్రయాణికులు ఆమెను పైకి తీసుకొచ్చి.. హుటాహుటీనా ఆస్పత్రికి తరలించారు. ఈ గందరగోళం మధ్య చాకచక్యంగా తప్పించుకున్న నిందితుడ్ని గంటల వ్యవధిలోనే పోలీసులు అదుపులోకి తీసుకున్నారు.
మరోవైపు ఆసుపత్రి బెడ్‌పై చికిత్స పొందుతున్న బాధితురాలు.. తనకు జరిగిన అన్యాయాన్ని తలచుకుని కన్నీరుమున్నీరయ్యారు. ‘నేను బోరివలిలో రైలు ఎక్కా. నాయిగావ్ స్టేషన్ సమీపిస్తుండగా అతను నన్ను అసభ్యంగా తాకడం మొదలుపెట్టాడు. రైలు దిగిన తర్వాత కూడా నా వెంటపడి వేధించాడు. నీ ఇంట్లో తల్లి, చెల్లి లేరా? అని ప్రశ్నించినా వినలేదు. నేను తిట్టడంతో అతడు కూడా నన్ను తిట్టి, చెప్పుతో కొట్టి కిందకు తోసేశాడు. నా జీవితమే నాశనమైంది. నాకు న్యాయం కావాలి. అతడికి కఠిన శిక్ష పడాలి’ అని ఆమె ఆవేదన వ్యక్తం చేసింది.
Also Read: మృత్యుంజయుడు.. ఏనుగు రెండుసార్లు తొక్కినా చెక్కుచెదరలేదు.. ఒళ్లు గగుర్పొడిచే వీడియో!
అయితే ఈ ఘటనపై పోలీసులు నమోదు చేసిన కేసు తీరుపై బాధితురాలి కుటుంబ సభ్యులు తీవ్ర అసంతృప్తి వ్యక్తం చేస్తున్నారు. నిందితుడిపై హత్యాయత్నం కింద కేసు నమోదు చేయకపోవడంపై వారు అనుమానాలు వ్యక్తం చేస్తున్నారు. ఈ నేపథ్యంలో న్యాయం కోసం బాధిత కుటుంబం.. మహారాష్ట్ర నవనిర్మాణ్ సేన పార్టీని ఆశ్రయించింది. దీంతో ఆ పార్టీ నేతలు రైల్వే పోలీసు సీనియర్ ఇన్‌స్పెక్టర్‌ను కలిసి నిందితుడిపై కఠిన సెక్షన్లు నమోదు చేయాలని డిమాండ్ చేశారు.
Share
ఈవెంట్కు రూ.10 వేలు ఇచ్చినా కోకాపేటలో ప్లాట్ కొనేవాడిని.. బుచ్చిబాబు
నోరూరించే రుచితో క్యాబేజీ రోటి పచ్చడి..క్షణాల్లోనే రెడీ అవుతుంది!
