రైల్వే ట్రాక్‌ లపై డ్రోన్లతో నిఘా.. ప్రయాణాలకు ఇబ్బంది లేకుండానే తనిఖీలు!

Railway Drone Surveillance: రైల్వే వ్యవస్థలో భద్రతను మరింత పెంచేందుకు కొత్త టెక్నాలజీని ఉపయోగిస్తున్నారు. ఇందులో భాగంగా పశ్చిమ రైల్వే రాజ్‌కోట్ డివిజన్ కీలక ప్రయోగం చేపట్టింది. సౌరాష్ట్ర ప్రాంతంలోని హపా–కనాలస్ మధ్య 31 కిలోమీటర్ల రైల్వే మార్గంలో డ్రోన్ ఆధారిత పర్యవేక్షణ వ్యవస్థను పరీక్షించారు. ఈ డ్రోన్ ద్వారా రైళ్లకు విద్యుత్ సరఫరా చేసే ఓవర్‌ హెడ్ ఎక్విప్‌మెంట్ (OHE)ను పరిశీలించారు. సాధారణంగా రైల్వే సిబ్బంది భౌతికంగా తనిఖీలు చేయాల్సిన ప్రాంతాలను డ్రోన్ ద్వారా గాల్లో నుంచే పరిశీలించారు.

రైళ్లకు అంతరాయం లేకుండానే తనిఖీలు!

రైల్వే విద్యుదీకరణ వ్యవస్థలో OHE చాలా కీలకమైనది. ఎలక్ట్రిక్ రైళ్లకు అవసరమైన విద్యుత్‌ను అందించే 25 kV AC ట్రాక్షన్ సిస్టమ్లో ముఖ్యమైన భాగం. ఇప్పటి వరకు OHE తనిఖీల కోసం కొన్ని సందర్భాల్లో విద్యుత్ సరఫరాను నిలిపివేయడం లేదంటే, ట్రాఫిక్ బ్లాక్‌లు తీసుకోవాల్సి వచ్చేది. అయితే, డ్రోన్ నిఘా ద్వారా రైళ్ల రాకపోకలకు అంతరాయం కలగకుండా తనిఖీలు చేసే అవకాశం ఉంటుంది. దీంతో సాధారణ రైలు సర్వీసులను యథావిధిగా కొనసాగిస్తూ నిర్వహణ పనులను పర్యవేక్షించే అవకాశం ఉంటుంది.

చిన్న లోపాలను కూడా గుర్తించే డ్రోన్!

ఈ డ్రోన్‌లో అధిక రిజల్యూషన్ ఆప్టికల్ కెమెరాను ఏర్పాటు చేశారు. దీని ద్వారా OHEలో సాధారణంగా కంటికి వెంటనే కనిపించని చిన్న లోపాలను కూడా గుర్తించే అవకాశం ఉంది. లూజ్ గా ఉన్న విద్యుత్ కాంటాక్టులు, నిర్మాణ భాగాల అమరికలో మార్పులు, స్ప్లిట్ పిన్లు లేకపోవడం లాంటి సమస్యలను డ్రోన్ కెమెరా ద్వారా గుర్తించవచ్చు. సిబ్బంది కాలినడకన చేసే తనిఖీలతో పోలిస్తే కొన్ని ప్రాంతాలను వేగంగా, మరింత విస్తృతంగా పరిశీలించడానికి ఉపయోగపడుతుంది.

ముందుగానే సమస్యలను గుర్తించే అవకాశం!

రైల్వే అధికారులు చెబుతున్న ప్రకారం, చిన్న లోపాలను ప్రారంభ దశలోనే గుర్తించడం వల్ల వాటిని పెద్ద సమస్యగా మారకముందే పరిష్కరించే అవకాశం ఉంటుంది. దీంతో OHEలో అకస్మాత్తుగా ఏర్పడే సాంకేతిక సమస్యలు, విద్యుత్ అంతరాయాలను తగ్గించే అవకాశం ఉంటుంది. అంతేకాకుండా ముందస్తు నిర్వహణకు ఇది ఉపయోగపడుతుంది. ఒక పరికరంలో లోపం కనిపించిన వెంటనే సంబంధిత సిబ్బంది మరమ్మతు చర్యలు చేపట్టవచ్చు. ఫలితంగా రైళ్ల ఆలస్యాన్ని కూడా కొంతవరకు తగ్గించవచ్చు.

రైల్వే భద్రతలో టెక్నాలజీకి ప్రాధాన్యం

హపా–కనాలస్ మార్గంలో నిర్వహించిన ఈ ప్రయోగం విజయవంతమైతే ఇలాంటి డ్రోన్ ఆధారిత తనిఖీలను మరిన్ని ప్రాంతాల్లో ఉపయోగించే అవకాశం ఉంది. ముఖ్యంగా రద్దీగా ఉండే రైల్వే మార్గాల్లో రైళ్ల రాకపోకలకు అంతరాయం కలగకుండా నిర్వహణ చేపట్టేందుకు ఈ టెక్నాలజీ ఉపయోగపడుతుందని అధికారులు భావిస్తున్నారు.