రాయగడ–గుంటూరు ఎక్స్‌ ప్రెస్ టైమింగ్స్ ఛేంజ్.. ఆగస్టు 24 నుంచి కొత్త వేళలు ఇవే!

Rayagada to Guntur Train Timing Changed: రాయగడ నుంచి గుంటూరు మధ్య ప్రతిరోజూ నడిచే ఎక్స్‌ ప్రెస్ రైలుకు సంబంధించిన దక్షిణ కోస్తా రైల్వే కీలక ప్రకటన చేసింది. రైలు నంబర్ 17244 రాయగడ–గుంటూరు డైలీ ఎక్స్‌ ప్రెస్ సమయాల్లో మార్పులు చేస్తున్నట్లు వెల్లడించింది. కొత్త టైమింగ్స్ ఆగస్టు 24 నుంచి అమల్లోకి రానున్నాయి. రాయగడ, జిమిడిపేట స్టేషన్లలో ఈ రైలు ఇకపై 10 నిమిషాల ముందుగానే బయలుదేరనుంది. దీంతో పాత టైమింగ్స్‌ ను గుర్తుపెట్టుకుని స్టేషన్‌కు వచ్చే ప్రయాణికులు రైలు మిస్ అయ్యే అవకాశం ఉంది. అందుకే కొత్త షెడ్యూల్‌ను తప్పనిసరిగా గమనించాలని రైల్వే అధికారులు సూచించారు.

రాయగడ నుంచి 10 నిమిషాల ముందే..

ఇప్పటివరకు రైలు నంబర్ 17244 రాయగడ స్టేషన్ నుంచి మధ్యాహ్నం 3 గంటలకు బయలుదేరేది. అయితే ఆగస్టు 24 నుంచి ఈ సమయాన్ని 10 నిమిషాలు ముందుకు మార్చారు. కొత్త షెడ్యూల్ ప్రకారం రైలు మధ్యాహ్నం 2:50 గంటలకు రాయగడ నుంచి బయలుదేరుతుంది. అంటే, ఇప్పటివరకు 3 గంటలకు రైలు ఎక్కేందుకు అలవాటు పడిన ప్రయాణికులు ఇకపై ముందుగానే స్టేషన్‌కు చేరుకోవాల్సి ఉంటుంది. ప్రయాణికులు చివరి నిమిషం వరకు వేచి ఉండకుండా కొంత ముందుగానే ప్లాట్‌ఫామ్‌కు చేరుకోవడం మంచిది.

జిమిడిపేటలోనూ మారిన టైమింగ్స్

జిమిడిపేట స్టేషన్‌లో కూడా రైలు చేరుకునే, బయలుదేరే సమయాలను 10 నిమిషాలు ముందుకు మార్చారు. పాత షెడ్యూల్ ప్రకారం రైలు మధ్యాహ్నం 3:16 గంటలకు జిమిడిపేటకు చేరుకుని, 3:18 గంటలకు బయలుదేరేది. కొత్త టైమింగ్స్ ప్రకారం రైలు మధ్యాహ్నం 3:06 గంటలకు జిమిడిపేటకు చేరుకుంటుంది. అక్కడ రెండు నిమిషాల హాల్ట్ అనంతరం 3:08 గంటలకు బయలుదేరుతుంది. జిమిడిపేట నుంచి ప్రయాణించే వారు కూడా కొత్త సమయాలను తప్పనిసరిగా గుర్తుంచుకోవాలి.

ఏపీ–ఒడిశాను కలిపే కీలక రైలు

రాయగడ–గుంటూరు ఎక్స్‌ ప్రెస్ ఆంధ్రప్రదేశ్, ఒడిశా రాష్ట్రాల మధ్య ప్రయాణించే ముఖ్యమైన రైళ్లలో ఒకటి. ప్రతిరోజూ నడిచే ఈ ఎక్స్‌ ప్రెస్ అనేక మంది ప్రయాణికులకు ఉపయోగపడుతోంది. వ్యాపారం, ఉద్యోగం, విద్య, వ్యక్తిగత అవసరాల కోసం ఈ మార్గంలో ప్రయాణించే వారు ఈ రైలును ఎక్కువగా వినియోగిస్తుంటారు. ఈ రైలు తన ప్రయాణంలో దాదాపు 30 స్టేషన్లలో ఆగుతుంది. రాయగడ నుంచి గుంటూరు వరకు సుమారు 13 గంటల 50 నిమిషాల ప్రయాణ సమయం ఉంటుంది.

యధాతథంగా గుంటూరు–రాయగడ రైలు

ప్రస్తుతానికి ఈ మార్పులు కేవలం రైలు నంబర్ 17244 రాయగడ–గుంటూరు ఎక్స్‌ ప్రెస్ కు మాత్రమే వర్తిస్తాయి. గుంటూరు నుంచి రాయగడ వెళ్లే రైలు సమయాల్లో ఎలాంటి మార్పు చేయలేదు. ఆ రైలు పాత షెడ్యూల్ ప్రకారమే కొనసాగుతుంది. ఆగస్టు 24 నుంచి కొత్త సమయాలు అమల్లోకి వస్తున్నందున ప్రయాణికులు టికెట్‌ లోని వివరాలు, తాజా రైలు షెడ్యూల్‌ను పరిశీలించి ప్రయాణం ప్లాన్ చేసుకోవాలని రైల్వే అధికారులు సూచించారు. కేవలం 10 నిమిషాల మార్పు అయినప్పటికీ, రైలు మిస్ కాకుండా ముందుగానే స్టేషన్‌కు చేరుకోవడం మంచిదని అధికారులు తెలిపారు.