ఏడాదిలో కేవలం 2 నెలలు మాత్రమే కనిపించే అందమైన నగరం.. పర్యాటకుల ఫేవరెట్ స్పాట్

ప్రపంచంలో కొన్ని పర్యాటక ప్రదేశాలు బీచ్‌ల కోసం, మరికొన్ని ప్రదేశాలు పర్వతాల కోసం ప్రసిద్ధి చెందాయి. అయితే ఒక నగరం మాత్రం పూర్తిగా భిన్నమైన అనుభూతిని అందిస్తుంది. ప్రతి శీతాకాలంలో ఈ నగరం మంచుతో తయారైన ప్రత్యేక ప్రపంచంగా మారిపోతుంది. నైపుణ్యం కలిగిన కళాకారులు, ఇంజినీర్లు వేలాది మంచు బ్లాకులతో కోటలు, భవనాలు, శిల్పాలను నిర్మిస్తారు. ఈ అద్భుత దృశ్యం కేవలం రెండు నెలలు మాత్రమే కనిపిస్తుంది. వసంతకాలం ప్రారంభం కాగానే మంచు కరిగిపోవడంతో ఈ నగరం మాయమవుతుంది. అందుకే ఇది ప్రపంచంలోనే అత్యంత ప్రత్యేకమైన పర్యాటక ప్రదేశాల్లో ఒకటిగా గుర్తింపు పొందింది. ఈ నగరం పేరు హార్బిన్. చైనా దేశంలో ఉంది.

హార్బిన్ ఎందుకు అంత ప్రత్యేకం?

హార్బిన్ చైనాలోని హీలాంగ్‌జియాంగ్ ప్రావిన్స్ (రాష్ట్రం) రాజధాని. ఇది దేశంలోనే అత్యంత చల్లని ప్రాంతాల్లో ఒకటి. తీవ్ర చలివల్ల సాంగ్‌హువా నది పూర్తిగా గడ్డకడుతుంది. ఆ మంచును భారీ బ్లాకులుగా కోసి కళాకారులు అద్భుత నిర్మాణాలను రూపొందిస్తారు. ఇలా ఏర్పడే హార్బిన్ ఐస్ అండ్ స్నో వరల్డ్ ప్రపంచంలోనే అతిపెద్ద మంచు థీమ్ పార్కుల్లో ఒకటిగా ఫేమస్.

మంచుతో నిర్మించిన అద్భుత కళాఖండాలు

ఈ పార్కులో కనిపించే ప్రతి నిర్మాణం సందర్శకులను ఆశ్చర్యపరుస్తుంది. భారీ మంచు కోటలు, రాజభవనాలు ప్రత్యేక ఆకర్షణగా నిలుస్తాయి. మంచుతో చేసిన సొరంగాలు, జారుడు బల్లలు పిల్లలు, పెద్దలను అలరిస్తాయి. మంచుతో తయారు చేసిన వరల్డ్ ఫేమస్ కట్టడాల ప్రతిరూపాలు కూడా ఇక్కడ కనిపిస్తాయి. రాత్రి వేళల్లో రంగురంగుల ఎల్‌ఈడీ లైట్లు వెలిగితే ఈ ప్రత్యేక కళాకృతులు మరింత అద్భుతంగా మెరిసిపోతాయి. ప్రతి సంవత్సరం కొత్త డిజైన్లు, కొత్త థీమ్‌లతో ఈ ఉత్సవాన్ని మరింత ఆకర్షణీయంగా తీర్చిదిద్దుతారు.

రాత్రివేళల్లో మరింత అందంగా కనిపించే ఐస్ సిటీ

పగటి సమయంలో హార్బిన్ అందంగా కనిపించినా, రాత్రి మాత్రం అసలు మాయాజాలం మొదలవుతుంది. వేలాది రంగుల లైట్లు మంచు నిర్మాణాలను బ్లూ, గ్రీన్, గులాబీ, రంగుల్లో ప్రకాశింపజేస్తాయి. ఆ దృశ్యం సినిమా సెట్స్‌ను తలపిస్తుంది. అందుకే ఫోటోగ్రాఫర్లు, పర్యాటకులు ప్రపంచం నలుమూలల నుంచి ఇక్కడికి వస్తుంటారు.

మంచు శిల్పాలకే కాదు, మరెన్నో ఆకర్షణలు

హార్బిన్‌లో ఐస్ పార్క్ మాత్రమే కాదు, అనేక శీతాకాల వినోదాలు కూడా ఉన్నాయి. సన్ ఐలాండ్‌లో భారీ మంచు శిల్పాలను చూడవచ్చు. ఐస్ స్కేటింగ్, ఐస్ స్లైడ్స్ వంటి వినోదాలను ఆస్వాదించవచ్చు. స్థానిక డాంగ్‌బెయ్ వంటకాలు చలికాలంలో శరీరానికి వేడిని అందిస్తాయి. రష్యన్ శైలిలో నిర్మించిన భవనాలు, చర్చిలు నగరానికి ప్రత్యేకమైన అందాన్ని తీసుకొస్తాయి.

Also Read: రోజంతా కూర్చొని పనిచేసేవారిలో చెప్పుకోలేని ఆ ఒక్క ఆరోగ్య సమస్య తీవ్రం.. డాక్టర్ల హెచ్చరిక

హార్బిన్ నగర చరిత్ర చాలా స్పెషల్

19వ శతాబ్దం చివర్లో చైనీస్ ఈస్టర్న్ రైల్వే నిర్మాణం తర్వాత హార్బిన్ వేగంగా అభివృద్ధి చెందింది. రష్యాతో పాటు అనేక దేశాల ప్రజలు ఇక్కడ స్థిరపడ్డారు. ఆ ప్రభావం ఇప్పటికీ నగరంలోని నిర్మాణాలు, చర్చిలు, ఆహార సంస్కృతిలో కనిపిస్తుంది.

హార్బిన్ వెళ్లడానికి సరైన సమయం ఎప్పుడు?

హార్బిన్ అంతర్జాతీయ ఐస్ అండ్ స్నో ఫెస్టివల్ సాధారణంగా డిసెంబర్ చివర్లో లేదా జనవరి ప్రారంభంలో ప్రారంభమవుతుంది. ఇది ఫిబ్రవరి చివరి వరకు కొనసాగుతుంది. జనవరిలో మంచు శిల్పాలు పూర్తిస్థాయిలో సిద్ధంగా ఉండటంతో ఆ సమయాన్ని సందర్శించడానికి ఉత్తమం. ఇక్కడ ఉష్ణోగ్రతలు మైనస్ 20 డిగ్రీల సెల్సియస్ కంటే తక్కువకు పడిపోతాయి. కాబట్టి థర్మల్ దుస్తులు, గ్లోవ్స్, బూట్లు, టోపీ వంటి చలికాల దుస్తులు తప్పనిసరిగా తీసుకెళ్లాలి.

విభిన్న ప్రయాణ అనుభవాలను ఇష్టపడే వారికి హార్బిన్ అద్భుత ట్రావెల్ డెస్టినేషన్. కేవలం రెండు నెలల పాటు మాత్రమే కనిపించే ఈ మంచు నగరం ప్రతి సంవత్సరం లక్షలాది మంది పర్యాటకులను ఆకర్షిస్తుంది. కళ, సంస్కృతి, చరిత్ర, శీతాకాల సాహసాలను ఒకేచోట ఆస్వాదించాలనుకునే వారికి హార్బిన్ జీవితంలో ఒక్కసారైనా తప్పకుండా సందర్శించాల్సిన ప్రదేశంగా నిలుస్తుంది.

Also Read: మహిళలు ఇంట్లో చేసే ఈ తప్పుల వల్లే ఆర్థిక కష్టాలు.. వాస్తు శాస్త్రంలో ఏముందంటే

Share

• 
• 
• 
• 
• 
•