కల్కా-సిమ్లా టాయ్ ట్రైన్ మళ్లీ ప్రారంభం.. టికెట్ ధర జస్ట్ 50 రూపాయలే!

Kalka-Shimla Toy Train is Back: యునెస్కో ప్రపంచ వారసత్వ సంపదగా గుర్తింపు పొందిన కల్కా–సిమ్లా టాయ్ ట్రైన్ సర్వీసులు మళ్లీ అందుబాటులోకి వచ్చాయి. వేసవి రద్దీ సమయంలో నడిపిన ప్రత్యేక హాలిడే స్పెషల్ సేవలు ముగియడంతో, ఇప్పుడు ఈ టాయ్ ట్రైన్ తన సాధారణ సర్వీసులను తిరిగి ప్రారంభించింది. తక్కువ ఛార్జీలతో పాటు ప్రకృతి అందాలను ఆస్వాదించే అవకాశం ఉండటంతో ఈ రైలు పర్యాటకులతో పాటు స్థానిక ప్రయాణికులకు కూడా ఎంతో ఉపయోగపడుతోంది.

మే 25 నుంచి జూలై 15 వరకు హాలీడే స్పెషల్

ప్రతి ఏడాది వేసవి సెలవుల్లో ప్రయాణికుల రద్దీ ఎక్కువగా ఉండటంతో, మే 25 నుంచి జూలై 15 వరకు ప్రత్యేక హాలిడే స్పెషల్ రైలును నడిపారు అధికారులు. ఆ సేవలు ముగిసిన తర్వాత, ఇప్పుడు మళ్లీ సాధారణ మిక్స్ అప్ డౌన్ టాయ్ ట్రైన్ అందుబాటులోకి వచ్చింది. ఈ టాయ్ ట్రైన్ ప్రత్యేకత ఏమిటంటే, కల్కా నుంచి సిమ్లా వరకు మధ్యలో ఉన్న అన్ని స్టేషన్లలో ఆగుతుంది. దీంతో చిన్న పట్టణాలు, గ్రామాల్లో నివసించే ప్రజలకు కూడా సౌకర్యవంతమైన రవాణా అందుతుంది. ఉద్యోగులు, విద్యార్థులు, రోజువారీ ప్రయాణికులు ఈ సేవను ఎక్కువగా వినియోగిస్తుంటారు.

రైలు షెడ్యూల్ వివరాలు

ఈ రైలు ఉదయం 8 గంటలకు కల్కా నుంచి బయలుదేరి, మధ్యాహ్నం 1:55 గంటలకు సిమ్లా చేరుకుంటుంది. తిరుగు ప్రయాణంలో సాయంత్రం 5 గంటలకు సిమ్లా నుంచి బయలుదేరి, రాత్రి 10:22 గంటలకు కల్కా చేరుకుంటుంది. ఈ టైమింగ్స్ స్థానిక ప్రయాణికులతో పాటు పర్యాటకులకు కూడా అనుకూలంగా ఉండేలా నిర్ణయించారు. కల్కా–సిమ్లా మార్గంలో ఉన్న మొత్తం 18 స్టేషన్లలో ఈ టాయ్ ట్రైన్ ఆగుతుంది. అందువల్ల మధ్యలోని చిన్న స్టేషన్ల నుంచి ప్రయాణించే వారికి ఇది ఎంతో ఉపయోగపడుతుంది. అలాగే ఈ చారిత్రాత్మక నారో గేజ్ రైల్వే మార్గంలో ప్రయాణించే వారికి కొండలు, లోయలు, పచ్చని అడవులు, సొరంగాలు, వంతెనలు లాంటి అందమైన ప్రకృతి దృశ్యాలను చూసే అవకాశం కూడా లభిస్తుంది.

టికెట్ ధర జస్ట్ రూ. 50

ఈ టాయ్ ట్రైన్ మరో ఆసక్తికర విషయం దాని తక్కువ టికెట్ ధర. కల్కా నుంచి సిమ్లా వరకు పూర్తి ప్రయాణానికి కేవలం రూ.50 చెల్లిస్తే సరిపోతుంది. మధ్యలోని స్టేషన్ల మధ్య ప్రయాణించే వారికి ఇంకా తక్కువ ఛార్జీ ఉంటుంది. అందుకే ఈ రైలు ఈ మార్గంలో అత్యంత చౌకైన రవాణా సౌకర్యాల్లో ఒకటిగా గుర్తింపు పొందింది.

టాయ్ ట్రైన్ గురించి..

ఈ రైలులో మొత్తం ఆరు జనరల్ క్లాస్ కోచ్‌లు ఉన్నాయి. ఇవన్నీ రిజర్వేషన్ అవసరం లేకుండా ప్రయాణించేందుకు అనుకూలంగా ఉంటాయి. దీంతో చివరి నిమిషంలో ప్రయాణించాల్సి వచ్చినా టికెట్ తీసుకుని సులభంగా ప్రయాణించే అవకాశం ఉంటుంది. కల్కా–సిమ్లా రైల్వే మార్గం భారతదేశంలోని అత్యంత ప్రసిద్ధ హెరిటేజ్ రైల్వే మార్గాల్లో ఒకటి. దీనికి యునెస్కో ప్రపంచ వారసత్వ సంపద హోదా కూడా ఉంది. ప్రతి సంవత్సరం వేలాది మంది దేశీయ, విదేశీ పర్యాటకులు ఈ టాయ్ ట్రైన్‌లో ప్రయాణించేందుకు ఆసక్తి చూపుతుంటారు.