Visakha News: మీది విశాఖపట్నమా? ఈ యాప్‌తో ఆ కష్టాలన్నీ చెల్లు..!

Visakha News: విశాఖపట్నం నగరంలో రోజురోజుకూ ట్రాఫిక్ సమస్యలు పెరిగిపోతున్నాయి. ముఖ్యంగా పీక్ అవర్స్‌లో ప్రధాన రోడ్లపై వాహనాల రద్దీ వల్ల ప్రజలు తీవ్ర ఇబ్బందులు పడుతున్నారు. స్కూల్స్, కాలేజీలు, ఆఫీసులు వెళ్లే సమయంలో ట్రాఫిక్ జామ్‌లు, సిగ్నల్స్‌లో గడిపే నిమిషాలే కాదు, గంటలే ఇబ్బంది పెడుతున్నాయి. వీటికి పరిష్కారం చూపించేందుకు ఇప్పుడు విశాఖపట్నం నగర పోలీసులు ఒక కొత్త డిజిటల్ పథకానికి శ్రీకారం చుట్టారు. అదే ASTraM యాప్!

ASTraM అంటే ఏమిటి?
ASTraM అనేది Actionable Intelligence Sustainable Traffic Management అనే పదబంధానికి సంక్షిప్త రూపం. దీనర్థం.. చురుకైన డేటా ఆధారిత ట్రాఫిక్ నిర్వహణ. ఈ యాప్‌ను విశాఖపట్నం ట్రాఫిక్ పోలీస్ శాఖ ప్రత్యేకంగా అభివృద్ధి చేసింది. దీనివల్ల నగరంలోని వాహనదారులకు, పోలీసులకు కూడా ట్రాఫిక్ నియంత్రణకు సంబంధించి రియల్ టైమ్ సమాచారం అందుబాటులో ఉంటుంది.

ఎవరు ప్రారంభించారు?
ఈ యాప్‌ను రాష్ట్ర హోం మంత్రి అనిత, విశాఖ పోలీస్ కమిషనర్ శంఖా బ్రతా బాగ్చి సమక్షంలో అధికారికంగా లాంఛనంగా ప్రారంభించారు. ప్రారంభోత్సవ కార్యక్రమంలో పలువురు పోలీస్ ఉన్నతాధికారులు, సాంకేతిక నిపుణులు పాల్గొన్నారు. ఈ కార్యక్రమంలో హోం మంత్రి మాట్లాడుతూ.. ఇది ప్రజల భాగస్వామ్యంతో సాగే డిజిటల్ మార్పు.. విశాఖ ప్రజలకు ఇది ఉపయోగపడేలా చూస్తాం అని హామీ ఇచ్చారు.

ఏయే సౌకర్యాలు ఉంటాయి?
ASTraM యాప్ ద్వారా రియల్ టైమ్ ట్రాఫిక్ సమాచారం తెలుసుకోవచ్చు. ఏ రోడ్డులో ట్రాఫిక్ ఎక్కువగా ఉందో, దాన్ని ఎలా ఎస్కేప్ అవ్వాలో, ఏ ప్రాంతాల్లో ఏవైనా ప్రమాదాలు జరిగాయో, డైవర్షన్లు ఉన్నాయో.. ఆల్ అలర్ట్స్ తక్షణమే యూజర్ మొబైల్‌కి వస్తాయి. అలాగే ట్రాఫిక్ పోలీసులకు కూడా ఇది ఒక ముఖ్యమైన టూల్ అవుతుంది. వారు రోడ్డు పరిస్థితులను, వాహనాల ప్రవాహాన్ని, ప్రమాద స్థలాలను, హైడెన్సిటీ జంక్షన్లను వెంటనే గుర్తించి చర్యలు తీసుకోవచ్చు.

ట్రైనింగ్ కూడా..
వీటిని సమర్థంగా వినియోగించేందుకు ట్రాఫిక్ సిబ్బందికి వారం రోజుల ప్రత్యేక శిక్షణ ఇవ్వబడుతోంది. ఈ శిక్షణ అనంతరం, మూడు నెలల్లో యాప్‌ను పూర్తిస్థాయిలో అమలు చేయాలని అధికారులు భావిస్తున్నారు. అంటే.. వచ్చే మూడు నెలల తర్వాత విశాఖ నగర ట్రాఫిక్ వ్యవస్థ పూర్తిగా డిజిటల్ ఆధారితంగా మారబోతోంది.

బెంగుళూరు ప్రేరణే!
ఈ యాప్ అభివృద్ధికి బెంగుళూరు నగర ట్రాఫిక్ యాప్ (BTP App) ప్రేరణగా నిలిచిందని విశాఖ అధికారులు వెల్లడించారు. బెంగుళూరులో ఇది విజయవంతం కావడంతోనే, అదే తరహాలో విశాఖలోనూ ప్రయోగం చేస్తున్నారు. ప్రజల నుంచి అనుకూల స్పందన వస్తే.. ఈ యాప్‌ను రాష్ట్రవ్యాప్తంగా విస్తరించే అవకాశం ఉందని తెలుస్తోంది.

Also Read: IMD Alerts: 6 రోజులు భారీ వర్షాల దాడి! దక్షిణ రాష్ట్రాల్లో అలర్ట్.. బయటికి వెళ్ళకండి!

వాహనదారులకు ఏంటా ఉపయోగం?
❄ టెక్నాలజీ ఆధారంగా ట్రాఫిక్ పరిస్థితులపై ముందస్తు సమాచారం
❄ సమీపంలో ట్రాఫిక్ జామ్ ఉంటే ప్రత్యామ్నాయ మార్గాలు
❄ పబ్లిక్ ట్రాన్సిట్ సమాచారం, RTC బస్సులు, ట్రాఫిక్ గమనికలు
❄ యాప్ ద్వారా పోలీసులకు సమాచారం పంపే సదుపాయం (ప్రమాదాల సమాచారం, రూల్ బ్రేకింగ్)
❄ వేగవంతమైన స్పందన.. ట్రాఫిక్ క్లియర్ చేయడానికి తక్షణ చర్యలు

ప్రజలు ఏమంటున్నారు?
సాధారణంగా డిజిటల్ యాప్స్‌పై మిక్స్‌డ్ స్పందన వస్తుంటుంది. కానీ ASTraM యాప్‌పై విశాఖ వాసులు అంచనాలకు మించి స్పందిస్తున్నారు. మా కాలేజీకి వెళ్లే టైమ్‌లో చాలా ట్రాఫిక్ ఉంటుంది. యాప్‌లోనే ముందుగానే అలర్ట్ వస్తే.. బాగా ఉపయోగపడుతుంది అంటున్నారు విద్యార్థులు. రోడ్డు మీద ఎక్కడ ఏం జరుగుతుందో తెలిసినపుడు మన ప్రయాణం చాలా సాఫీగా ఉంటుంది అంటున్నారు క్యాబ్ డ్రైవర్స్.

మెరుగైన నగర జీవనానికి ఈ యాప్ కీలకం
పెరుగుతున్న వాహనాల సంఖ్య, రోడ్ల అభివృద్ధికి భిన్నంగా నగరంలో ఉండే జంక్షన్‌లు, బాటల్లు ఇవన్నీ ట్రాఫిక్ సమస్యలకు దారితీస్తున్నాయి. అయితే ASTraM యాప్ వల్ల ఇప్పుడైనా పరిస్థితులు మారే అవకాశాలు కనిపిస్తున్నాయి. ప్రజల భాగస్వామ్యంతో, పోలీసుల చొరవతో ఈ యాప్ విజయవంతమైతే.. విశాఖపట్నం నగర జీవనం మరో మెట్టు ఎక్కినట్టే. ఇది విశాఖే.. టెక్నాలజీతో ముందడుగు వేస్తున్న నగరంగా మారుతోంది. ఇక ట్రాఫిక్‌కు కళ్లెం పడటం ఖాయం అనిపిస్తోంది. మీ ఫోన్‌లో ASTraM యాప్ ఉంటే.. ట్రాఫిక్ సమస్య మీకు లేనట్లే!

Share

• 
• 
• 
• 
• 
•