Pawan Kalyan: బ్యాటరీపై నడిచే బైక్లు, కార్లు చూసే రోజులు ఇప్పుడు తప్పనిసరి అయ్యాయి. కానీ ఓ బాలుడు తయారు చేసిన సైకిల్ను ఒక రాష్ట్ర ఉప ముఖ్యమంత్రి స్వయంగా తొక్కితే? అది ఏదో పెద్ద కంపెనీ మోడల్ కాదు, ఓ ఇంటర్మీడియట్ విద్యార్థి తన ఆలోచనతో, తన శ్రమతో తయారు చేసిన కొత్త ఆవిష్కరణ. అంతేకాదు, ఆ విద్యార్థికి నేరుగా ప్రశంసలు తెలిపేందుకు, ప్రోత్సహించేందుకు క్యాంప్ కార్యాలయంలో పిలిపించుకుని మాట్లాడిన ఆ నేత.. ఎవరో కాదు, జనసేన అధినేత పవన్ కళ్యాణ్!
విజయనగరం జిల్లా జాడవారి కొత్తవలసకు చెందిన రాజాపు సిద్ధూ, ఇంటర్మీడియట్ చదువుతూ కాలేజీకి వెళ్లేందుకు ఉపయోగపడేలా ఒక ప్రత్యేకమైన ఎలక్ట్రిక్ సైకిల్ రూపొందించాడు. మొబైల్ ఛార్జర్లా ఇంట్లోనే ప్లగ్ పెట్టి, సుమారు 3 గంటలపాటు బ్యాటరీ ఛార్జ్ చేస్తే.. ఏకంగా 80 కిలోమీటర్ల దూరం వెళ్లగల సామర్థ్యం ఉన్న అద్భుత సైకిల్. అందులో ఫ్యూయల్ ఖర్చు లేదు, పొల్యూషన్ లేదు, శబ్దం లేదు. ఇదంతా ఒక సాఫ్ట్వేర్ ఇంజినీర్ తయారు చేస్తే చెల్లేదేమో. కానీ ఓ విద్యార్థి తాను తయారు చేసుకున్నాడు అంటే అదొక గొప్ప ఆవిష్కరణే!
ఈ సైకిల్ వీడియోలు సామాజిక మాధ్యమాల్లో తెగ వైరల్ అయ్యాయి. కొన్ని వేల వ్యూస్తో పాటు నెటిజన్ల ప్రశంసలు కూడా వచ్చాయి. వీటిని గమనించిన పవన్ కళ్యాణ్, తన మంగళగిరిలోని క్యాంపు కార్యాలయానికి సిద్ధూని ఆహ్వానించారు. హాజరైన సిద్ధూ.. తన చేతులమీదుగా తయారుచేసిన సైకిల్ను పవన్ కళ్యాణ్కు చూపించాడు. ఆ వెంటనే పవన్ కళ్యాణ్ స్వయంగా ఆ సైకిల్పై కూర్చుని నడిపి తనదైన శైలిలో పరిశీలించారు.
తర్వాత ఆయన మాటల్లో.. ఇది కేవలం సైకిల్ కాదు.. ఒక యువ ఆవిష్కర్త కలలు కలిగిన చిహ్నం. ఇలాంటి విద్యార్థులను ఆదరించాలి. దేశ అభివృద్ధి ఇలాంటి చేతుల్లోనే ఉంటుంది అంటూ ఒక లక్ష రూపాయల ప్రోత్సాహక విరాళం అందించారు. అంతేకాదు, సైకిల్పై సిద్ధూని కూర్చోబెట్టి తానే తొక్కుతూ అందరికీ సందేశం ఇచ్చారు.
ఈ సందర్భంగా పవన్ కళ్యాణ్ మాట్లాడుతూ.. విద్యార్ధులలోని సాంకేతికత పట్ల ఆసక్తిని ప్రోత్సహించడమే తమ ప్రభుత్వ లక్ష్యమన్నారు. పర్యావరణానికి మేలు చేసే ఇలాంటివి మరిన్ని రావాలన్నారు. రాష్ట్రంలో సైన్స్ అండ్ టెక్నాలజీ విభాగానికి మంత్రిగా ఉన్న ఆయన, ఇలాంటి టాలెంట్ను గుర్తించేందుకు ప్రత్యేకంగా సమయం కేటాయించారు.
సిద్ధూ తయారు చేసిన ఈ సైకిల్ చాలా సాధారణమైన రూపంలో ఉండినా, దాని వెనుక ఉన్న ఆలోచన, నిర్మాణం మాత్రం అసాధారణం. పాతపాటి భాగాలు, చిన్న మోటార్, బ్యాటరీతో కూడిన యంత్రాన్ని తన దగ్గర ఉన్న వనరులతో రూపొందించడమే కాదు, అది పనిచేయడం, ప్రయాణానికి తగినంత బలంగా ఉండడం.. అన్నీ పరీక్షించి చేశాడు. ఒక రోజు పెద్ద ఎలక్ట్రిక్ వాహనాలు తయారుచేసే ఇంజినీర్ కావాలని పవన్ ఆకాంక్షించారు. పవన్ ఇచ్చిన ప్రోత్సాహంతో, అతని ఉత్సాహం రెట్టింపైంది.
Also Read: Indian Railways plan: ఈ రాష్ట్రాలకు గుడ్ న్యూస్.. కొండలు బద్దలు చేసుకుంటూ.. ట్రైన్స్ రాబోతున్నాయ్!
పవన్ ప్రత్యేకంగా అభినందించడంతో సిద్దు స్వగ్రామంలో ప్రస్తుతం ఇతని పేరు మారుమోగిపోతోంది. స్కూల్ పిల్లల నుంచి పెద్దలవరకు.. మన గ్రామం నుంచి ఇలాంటి ఆవిష్కరణ వచ్చిందా! అంటూ గర్వపడుతున్నారు. ఎవరూ చెప్పకుండానే సోషల్ మీడియాలో అతని గురించి వైరల్ అవుతోంది.
ఇలాంటి యువకులు మన సమాజానికి మార్గదర్శకులవలె ఉంటారు. ప్రభుత్వం, సాంకేతిక రంగాలు, కళాశాలలు.. వీరి ప్రయత్నాలను ప్రోత్సహిస్తేనే విజ్ఞాన భారతి స్ఫూర్తి నిజమవుతుంది. బడిలో చదివే పిల్లాడు దేశానికి ఇంజినీర్ కావడమంటే.. అదే అసలైన అభివృద్ధి అని విద్యావేత్తలు అంటున్నారు.
ఈ కథ ఓ సైకిల్ గురించేమో అనుకుంటే పొరపాటే! ఇది ఒక కల, ఒక నమ్మకం, ఒక నాయకుడి ప్రోత్సాహం, ఒక యువ ప్రతిభకు తగిన గుర్తింపు. ఈ రోజు ఓ సైకిల్ తయారు చేశాడు.. రేపు, దేశం చూసే కార్లు తయారు చేసే శక్తి సిద్ధూలో ఉంది. అలాంటి వారిని గుర్తించి ముందుకు నడిపించడం నిజమైన నాయకత్వం. పవన్ కళ్యాణ్ చేసినదే అదేనంటూ సోషల్ మీడియాలో పవన్ ఫ్యాన్స్ తెగ కామెంట్ చేస్తున్నారు.
Share
Atlee - The Rock: అల్లు అర్జున్ కోసం పాండ్యా, రాక్... ఇక థియేటర్లు దద్దరిల్లిపోవాల్సిందే ?
Lizard in Samosa: సమోసాలో బల్లి ప్రత్యక్షం.. ఎక్కడంటే?
