Rains : తెలుగు రాష్ట్రాలను మబ్బులు కమ్మేశాయి. ఏపీ, తెలంగాణలో వర్షాలు కురుస్తున్నాయి. నైరుతికి అల్పపీడనం తోడైంది. అనేక ప్రాంతాల్లో వానలు పడుతున్నాయి. హైదరాబాద్కు ఎల్లో అలర్ట్ జారీ చేశారు. జూన్ 30 వరకు భారీ వర్షాలు కురిసే ఛాన్స్ ఉందని ప్రకటించారు. కోస్తాంధ్ర, రాయలసీమలోనూ హెవీ రెయిన్స్ అంటున్నారు. జూన్ 27 నుంచి 4 రోజుల పాటు వానలే వానలు అని వాతావరణ శాఖ చెబుతోంది. రెండు రాష్ట్రాల్లో గంటకు 40 నుంచి 60 కి.మీ వేగంతో బలమైన గాలులు వీస్తాయని వెల్లడించింది. తెలంగాణ, ఆంధ్రప్రదేశ్, కర్నాటక అంతటా ఉరుములు, మెరుపులతో కూడిన వర్షాలు కురిసే అవకాశం ఉంది. తమిళనాడులో జూన్ 27, 28న భారీ వర్షాలు పడుతాయనేది వెదర్ రిపోర్ట్.
భారతదేశంలో రుతుపవనాలు ఊపందుకున్నాయి. దేశవ్యాప్తంగా అనేక రాష్ట్రాల్లో భారీ నుంచి అతి భారీ వర్షాలు కురిసే అవకాశం ఉందని భారత వాతావరణ శాఖ (IMD) హెచ్చరికలు జారీ చేసింది. గుజరాత్, కర్ణాటక, కేరళతో పాటు ఇతర రాష్ట్రాల్లో వచ్చే వారం రోజుల పాటు భారీ వర్షాలు కురుస్తాయని అంచనా.
కేరళలో రెడ్ అలర్ట్
కేరళలో రుతుపవనాలు బలంగా కొనసాగుతున్నాయి. వయనాడ్, మలప్పురం, ఇడుక్కి జిల్లాల్లో రెడ్ అలర్ట్ జారీ చేశారు. ఏడు జిల్లాల్లో ఆరెంజ్ అలర్ట్ అమలులో ఉంది. ఎర్నాకులం, ఇడుక్కి, త్రిస్సూర్లో వర్షాల వల్ల వరదలు వచ్చాయి. త్రిస్సూర్లోని లోయర్ షొలయార్లో 218 మి.మీ. వర్షపాతం నమోదైంది. జూన్ 27 వరకు కాసరగోడ్, కన్నూర్తో సహా తీరప్రాంతాల్లో 3.1-3.3 మీటర్ల ఎత్తు గల అలలు రావచ్చని హెచ్చరిక జారీ చేయబడింది.
గుజరాత్లో భారీ వర్ష హెచ్చరిక
గుజరాత్లో జూన్ 27 నుండి జూలై 3 వరకు భారీ నుంచి అతి భారీ వర్షాలు కురిసే అవకాశం ఉందని IMD తెలిపింది. గుజరాత్లోని 144 మండలాల్లో ఇప్పటికే వర్షాలు పడుతున్నాయి. జూనాగఢ్లోని మలియా హటినాలో 135 మి.మీ. వర్షపాతం కురిసింది.
కర్ణాటకలో ఆరెంజ్ అలర్ట్
కర్ణాటకలో జూన్ 28 వరకు భారీ వర్షాలు కురిసే అవకాశం ఉందని కర్ణాటక రాష్ట్ర సహజ విపత్తుల నిర్వహణ కేంద్రం (KSNDMC) తెలిపింది. కొన్ని జిల్లాల్లో రెడ్ అలర్ట్ జారీ చేశారు. బెంగళూరులో మోస్తరు వర్షాలు పడతాయని తెలిపింది. గంటకు 50-60 కి.మీ. వేగంతో గాలులు వీచే అవకాశం ఉంది. హాసన్ జిల్లాలో కొండచరియలు విరిగిపడి జాతీయ రహదారి 75 పై ట్రాఫిక్ అంతరాయం ఏర్పడింది.
ఇతర రాష్ట్రాల్లో వర్ష హెచ్చరికలు
మధ్యప్రదేశ్, ఛత్తీస్గఢ్, ఒడిశా, జార్ఖండ్, ఉత్తరప్రదేశ్, రాజస్థాన్, హిమాచల్ ప్రదేశ్, జమ్మూ-కాశ్మీర్లో కూడా భారీ వర్షాలు కురిసే అవకాశం ఉంది. హిమాచల్ ప్రదేశ్లోని కులు జిల్లాలో పిడుగుల వల్ల ఐదుగురు మరణించారు. ఏడుగురు గల్లంతయ్యారు. వర్షాల వల్ల స్థానికంగా వరదలతో పాటు కొండచరియలు విరిగిపడే అవకాశం ఉందని IMD హెచ్చరించింది.
రుతుపవనాల కారణంగా దేశవ్యాప్తంగా వాతావరణం మారింది. ప్రజలు అప్రమత్తంగా ఉండాలి. వాతావరణ హెచ్చరికలను పాటించాలి. సురక్షిత ప్రాంతాల్లో ఉండటం అన్నిటికంటే ముఖ్యం.
Share
ICC New Rules T20's : పవర్ ప్లే నిబంధనల్లో ఐసీసీ మార్పులు
Twitter Killer: 9 మంది అమ్మాయిలను 100 ముక్కలు చేసిన ట్విట్టర్ కిల్లర్కు ఉరిశిక్ష
