‘మాపై కోపంతో ఆ పనులన్నీ ఆపేశారు’.. గత ప్రభుత్వంపై విరుచుకుపడ్డ మంత్రి నారాయణ!

Nellore Development: నెల్లూరు నగరాన్ని అన్ని విధాలా అభివృద్ధి చేయడమే ధ్యేయంగా కూటమి ప్రభుత్వం అడుగులు వేస్తోంది. ఇందులో భాగంగానే తాజాగా నగరంలోని పలు డివిజన్లలో మంత్రి నారాయణ కీలక పనులకు శ్రీకారం చుట్టారు. ప్రజలకు ఇచ్చిన ప్రతీ మాటను నిలబెట్టుకుంటామని ఆయన ఈ సందర్భంగా స్పష్టం చేశారు.

కోట్లతో అభివృద్ధి పనులకు శ్రీకారం

నెల్లూరు నగరంలోని 9 డివిజన్లలో సుమారు 4 కోట్ల రూపాయల విలువైన అభివృద్ధి పనులకు మంత్రి నారాయణ శంకుస్థాపనలు , ప్రారంభోత్సవాలు నిర్వహించారు. రాష్ట్రంలో మౌలిక వసతుల కల్పన కోసం ముఖ్యమంత్రి చంద్రబాబు నాయుడు ఏకంగా 50 వేల కోట్లు మంజూరు చేశారని, స్వాతంత్ర్యం వచ్చిన తర్వాత ఏ ప్రభుత్వమూ ఈ స్థాయిలో నిధులు కేటాయించలేదని ఆయన కొనియాడారు. కక్షసాధింపు చర్యల్లో భాగంగా గత ప్రభుత్వం ఆపేసిన అన్ని పనులను తాము అధికారంలోకి రాగానే పునరుద్ధరించినట్లు తెలిపారు.

తాగునీరు, డ్రైనేజీ వ్యవస్థలపై ప్రత్యేక దృష్టి

నగర ప్రజల ప్రధాన సమస్యలైన తాగునీరు, మురుగునీటి పారుదల వ్యవస్థలపై ప్రభుత్వం ప్రత్యేకంగా దృష్టి పెట్టింది. నెల్లూరులో ఈ ఏడాది డిసెంబర్ చివరి నాటికి ప్రతీ ఇంటికి కుళాయి కనెక్షన్ అందిస్తామని, సంగం బ్యారేజీ ద్వారా సాగు, తాగునీటిని ఇస్తామని మంత్రి హామీనిచ్చారు. అలాగే, సుమారు 800 కోట్ల రూపాయలతో అండర్ గ్రౌండ్ డ్రైనేజీ (యూడీజీ) పనులు శరవేగంగా జరుగుతున్నాయని, వచ్చే ఏడాది జూన్ 12 నాటికి ఈ పనులన్నీ పూర్తి చేసి నెల్లూరును దోమలు లేని నగరంగా మారుస్తామని చెప్పారు.

కూటమి కమిటీల నిర్ణయమే శిరోధార్యం

రాబోయే ఎన్నికల్లో అభ్యర్థుల ఎంపికపై కూడా మంత్రి స్పష్టతనిచ్చారు. కూటమి కమిటీల్లో సుదీర్ఘంగా చర్చలు జరిపిన తర్వాతే అభ్యర్థుల జాబితాను ప్రకటిస్తామని తెలిపారు. ప్రజలకు ఎన్నికల సమయంలో ఇచ్చిన ప్రతీ హామీని పక్కాగా నెరవేరుస్తామని, రాష్ట్రంలోని 123 మున్సిపాల్టీల్లోనూ అభివృద్ధి పనులను వేగవంతం చేశామని మంత్రి నారాయణ పునరుద్ఘాటించారు.

Also Read: ఏపీలో మేయర్ సీట్లపై పీఠముడి.. టీడీపీ-జనసేన మధ్య మళ్లీ చర్చలు, ఇదే ఫైనల్