Chandra Grahanam 2025: సెప్టెంబర్ 07వ తేదీ ఆదివారం రాత్రి ఆకాశంలో అరుదైన దృశ్యం కనపడనుంది. చంద్రుడు గ్రహణములోకి ప్రవేశించనున్నాడు. రాత్రి 9.50 గంటల నుండి 08వ తేదీ సోమవారం వేకువ జాము 1.31 గంటల వరకు ఈ చంద్రగ్రహణం కొనసాగుతుంది. హిందూ సంప్రదాయాల ప్రకారం, గ్రహణ సమయానికి 6 గంటల ముందు నుంచే ఆలయ తలుపులను మూసివేయడం ఆనవాయితీగా వస్తోంది. అందువల్ల టీటీడీ ఆధ్వర్యంలోని తిరుపతి, పరిసర ప్రాంతాల్లోని ఆలయాలను ఆదివారం మధ్యాహ్నం నుంచే మూసివేయనున్నారు. ఈ నిర్ణయాన్ని అధికారికంగా టీటీడీ ప్రకటించింది.
భక్తులు అధికంగా దర్శనానికి వచ్చే తిరుచానూరు శ్రీ పద్మావతి అమ్మవారి ఆలయాన్ని ఆదివారం మధ్యాహ్నం 2.15 గంటలకు మూసివేస్తారు. అనంతరం గ్రహణం ముగిసిన తరువాత సోమవారం ఉదయం 4 గంటలకు ఆలయ తలుపులు తెరిచి శుద్ధి కార్యక్రమాలు, పుణ్యవచనం నిర్వహిస్తారు. అనంతరం ఉదయం 8 గంటల నుండి భక్తులను సర్వదర్శనానికి అనుమతించనున్నారు.
తిరుపతిలోని ప్రముఖ దేవాలయాలలో ఒకటైన శ్రీ గోవిందరాజస్వామి ఆలయంలో కూడా ప్రత్యేక ఏర్పాట్లు చేశారు. ఆదివారం మధ్యాహ్నం 1.30 గంటల నుండి 3.00 గంటల వరకు శుద్ధి, పూలంగి సేవ, శాత్తుమొర వంటి కైంకర్యాలు ఏకాంతంగా జరుగుతాయి. అనంతరం మధ్యాహ్నం 3.30 గంటలకు ఆలయం మూసివేయబడుతుంది. సోమవారం ఉదయం 4.30 గంటలకు ఆలయ తలుపులు తెరవబడతాయి. పలు సేవల అనంతరం ఉదయం 9.30 గంటల నుండి భక్తులను దర్శనానికి అనుమతించనున్నారు.
శ్రీనివాస మంగాపురంలోని శ్రీ కళ్యాణ వేంకటేశ్వరస్వామి ఆలయాన్ని ఆదివారం మధ్యాహ్నం 1.30 గంటల నుండి 3.00 గంటల వరకు ఏకాంత సేవలతో నిర్వహించి 3.30 గంటలకు మూసివేస్తారు. సోమవారం ఉదయం 4.45 గంటలకు తిరిగి ఆలయ తలుపులు తెరవబడతాయి. అనంతరం ఏకాంత సేవలు పూర్తి అయిన తర్వాత ఉదయం 8.30 గంటల నుండి భక్తులకు దర్శన అవకాశం కల్పిస్తారు.
తిరుపతిలోని పవిత్ర స్ధలమైన కపిలతీర్థం శ్రీ కపిలేశ్వరస్వామి ఆలయాన్ని ఆదివారం మధ్యాహ్నం 1.30 గంటలకు మూసివేస్తారు. సోమవారం ఉదయం 3 గంటలకు తిరిగి ఆలయాన్ని తెరుస్తారు. శుద్ధి, సుప్రభాతం, అభిషేకం, అర్చన సేవలు అనంతరం ఉదయం 7 గంటల నుండి సర్వదర్శనానికి భక్తులను అనుమతించనున్నారు.
Also Read: Turakapalem mystery: ఆ ఊరికేమైంది? 20 మరణాల మిస్టరీ ఏమిటి? రంగంలోకి సీఎం..!
అమరావతిలోని ఎస్వీ ఆలయం, నారాయణవనం, కార్వేటినగరం, కడప, ఒంటిమిట్ట తదితర ఆలయాలను కూడా ఆదివారం మధ్యాహ్నం 1.50 గంటలకు మూసివేస్తారు. సోమవారం ఉదయం 3 గంటలకు తిరిగి ఆలయాలను తెరిచి పుణ్యవచనం, శుద్ధి అనంతరం భక్తులకు దర్శనాన్ని కల్పిస్తారు.
ఆలయాలు మూసివేస్తారని తెలిసిన భక్తులు కొంత నిరాశ వ్యక్తం చేసినా, సంప్రదాయం కాబట్టి అందరూ అంగీకరిస్తున్నారు. ‘‘గ్రహణ సమయంలో దేవాలయాలు మూసివేయడం అనాదిగా వస్తున్న ఆచారం. ఇది శాస్త్రోక్తమే’’ అని పండితులు పేర్కొంటున్నారు. మరోవైపు, ఆలయాల శుద్ధి అనంతరం దర్శనానికి అనుమతించనున్నందుకు భక్తులు సంతోషం వ్యక్తం చేస్తున్నారు.
గ్రహణ సమయంలో గర్భిణీలు, వృద్ధులు, పిల్లలు ఇంట్లోనే ఉండాలని వైద్యులు సూచిస్తున్నారు. అలాగే ఆహారం వండకూడదు, ముందే తయారుచేసిన ఆహారాన్ని తినకూడదు. గ్రహణం ముగిసిన తరువాత స్నానం చేసి పుణ్యవచనం చేసుకోవాలని శాస్త్రం చెబుతోంది. మొత్తం మీద, సెప్టెంబర్ 07 చంద్రగ్రహణం సందర్భంగా తిరుపతి, పరిసర ప్రాంతాల్లోని ఆలయాలు మూసివేయబడ్డాయి. గ్రహణం ముగిసిన వెంటనే ఆలయ శుద్ధి అనంతరం తిరిగి భక్తులకు దర్శనాన్ని కల్పించనున్నారు. టీటీడీ తీసుకున్న ఈ నిర్ణయం సంప్రదాయానికి అనుగుణంగా ఉండటమే కాకుండా, భక్తుల విశ్వాసానికి మరింత బలాన్నిస్తుంది.
Share
Mahabubabad News: యూరియా లొల్లి.. నడిరోడ్డుపై ఇద్దరు మహిళలు పొట్టుపొట్టు కొట్టుకున్నారు, వీడియో వైరల్
Ashwin-Babar : పాకిస్తాన్ మాజీ కెప్టెన్ బాబర్ జట్టులోకి రవిచంద్రన్ అశ్విన్?
