భారత్‌ లో జపాన్ ఎలక్ట్రిక్ స్కూటర్ల జోరు.. 10 వేల యూనిట్లు దాటేసిన అమ్మకాలు!

India’s Electric Scooter Market: భారత్ లో ఎలక్ట్రిక్ స్కూటర్ల వినియోగం పెరుగుతున్న నేపథ్యంలో జపాన్‌కు చెందిన హోండా, సుజుకి, యమహా కంపెనీలు దుమ్మురేపుతున్నాయి. 2026లో ఇప్పటివరకు ఈ మూడు సంస్థల ఇ స్కూటర్ల అమ్మకాలు 10 వేల యూనిట్ల మార్కును దాటాయి. అయితే, మొత్తం ఎలక్ట్రిక్ టూ వీలర్ మార్కెట్‌ తో పోలిస్తే వీటి వాటా ఇంకా తక్కువగానే ఉంది. ధరలు, మార్కెట్లోకి ఎంట్రీ ఇచ్చిన టైమ్, డీలర్ నెట్‌ వర్క్ లావటి అంశాలు ఈ కంపెనీల అమ్మకాలపై ప్రభావం చూపుతున్నాయి.

10,735 యూనిట్లకు చేరిన అమ్మకాలు!

వాహన్ రిటైల్ లెక్కల ప్రకారం, 2026 జనవరి 1 నుంచి అక్టోబర్ 8 వరకు హోండా, సుజుకి, యమహా కంపెనీలు కలిపి 10,735 ఎలక్ట్రిక్ స్కూటర్లను అమ్మాయి. ఒక క్యాలెండర్ సంవత్సరంలో ఈ మూడు జపాన్ సంస్థల అమ్మకాలు తొలిసారిగా 10 వేల మార్కును దాటాయి. ఈ మూడు కంపెనీలలో హోండా అత్యధిక అమ్మకాలతో ముందంజలో ఉండగా, సుజుకి రెండో స్థానంలో నిలిచింది. యమహా తన తొలి ఎలక్ట్రిక్ స్కూటర్‌తో మార్కెట్లో వాటాను పెంచుకునే ప్రయత్నం చేస్తోంది.

హోండా వాటా 51 శాతానికి పైగా!

హోండా మోటార్‌సైకిల్ అండ్ స్కూటర్ ఇండియా 2026లో అక్టోబర్ 8 వరకు 5,536 ఎలక్ట్రిక్ స్కూటర్లను అమ్మింది. ఈ మూడు కంపెనీల మొత్తం అమ్మకాల్లో హోండా వాటా 51 శాతానికి పైగా ఉంది. యాక్టివా-ఇ, QC1 మోడళ్లతో ఎలక్ట్రిక్ వాహనాల విభాగంలోకి వచ్చిన హోండా, సెప్టెంబర్‌లో అత్యధికంగా 1,107 యూనిట్లను అమ్మింది. ఒక నెలలో వెయ్యి యూనిట్ల అమ్మకాలను దాటడం ఇదే తొలిసారి. తాజాగా పరిచయం చేసిన QC3 ఇ-స్కూటర్ కూడా అమ్మకాలను పెంచేందుకు ఉపయోగపడే అవకాశం ఉంది.

సుజుకి ఇ-యాక్సెస్‌ కు మంచి ఆదరణ

సుజుకి మోటార్‌ సైకిల్ ఇండియా తన ఇ-యాక్సెస్ ఎలక్ట్రిక్ స్కూటర్‌తో ఈ ఏడాది జనవరిలో మార్కెట్లోకి ప్రవేశించింది. అక్టోబర్ 8 నాటికి ఈ మోడల్ అమ్మకాలు 4,133 యూనిట్లకు చేరాయి. మూడు కంపెనీల మొత్తం అమ్మకాల్లో సుజుకి వాటా సుమారు 39 శాతంగా ఉంది. జూలైలో 606 యూనిట్లు, ఆగస్టులో 674 యూనిట్లు, సెప్టెంబర్‌లో 657 యూనిట్లు అమ్ముడయ్యాయి. ఈ స్కూటర్ ఎక్స్‌ షోరూమ్ ధర రూ.1.88 లక్షలుగా ఉంది.

యమహా ఈసీ-06 అమ్మకాలు ఎలా ఉన్నాయంటే?

యమహా తన తొలి ఎలక్ట్రిక్ స్కూటర్ ఈసీ-06ను రివర్ మొబిలిటీ సహకారంతో అభివృద్ధి చేసింది. 2026లో అక్టోబర్ 8 వరకు 1,066 యూనిట్లను విక్రయించింది. మూడు కంపెనీల మొత్తం అమ్మకాల్లో యమహా వాటా సుమారు 10 శాతంగా ఉంది. ఈ మోడల్‌ కు సెప్టెంబర్‌లో అత్యధికంగా 232 యూనిట్ల అమ్మకాలు నమోదయ్యాయి. మార్కెట్లో తన స్థానాన్ని బలోపేతం చేసుకోవడానికి యమహా మరింత విస్తృతమైన విక్రయ వ్యవస్థను ఏర్పాటు చేసుకోవాల్సి ఉంటుంది.